مع بدء شهر رمضان المبارك، بدأ عرض حلقات برنامج «نور الدين»، الذي يقدمه الدكتور علي جمعة مفتي الديار المصرية السابق.
وخلال حلقات البرنامج، استمع الدكتور علي جمعة لأسئلة فئات مختلفة ما بين الأطفال والشباب والشابات، وتلقى أسئلتهم على الرحب والسعة.
وأجاب «جمعة» على عدد واسع من الأسئلة، التي جاءت بعضها جريئة إلى حد ما، كما رد على استفسارات دائما ما يواجهها الأهالي خلال تحدثهم إلى أبنائهم.
خلال السطور التالية، يستعرض «المصري لايت» إجابات الدكتور علي جمعة على أجرأ 5 أسئلة طرحت عليه، وهي كما يلي:
«ليه ربنا خلقنا؟»
توجهت طفلة إلى الدكتور على جمعة بسؤال حول «هو ليه ربنا خلقنا؟».
وقال «جمعة»: «ربنا خلقنا وقال لنا، وما خلقت الجن والإنس إلا ليعبدون، خلق الملائكة والجن وخلقنا وخلق عوالم كتيرة زينا علشان نعبده».
أردف: «كل عالم من العوالم دول بيعبدربنا بطريقته، الملائكة لا يعصون الله أبدا، إحنا خلقنا وعندنا عقل واختيار، وأسجد لنا ملائكة وقال لنا أنتم لو استقمتم هتكونوا أفضل من الملائكة وفى منا اللى بيستقيم ومنا من لا يستقيم».
«ليه مش بنشوف ربنا؟»
توجهت طفلة إلى الدكتور على جمعة حول «ليه مش بنشوف ربنا؟».
وقال «جمعة»: «ربنا خارج الدائرة، هل إحنا نقدر نشوف أمواج الردار، أو تيار الأشعة اللى بعمل بها حاجات في جسمنا، الإنسان بيشوف بعين والضوء وبينعكش على الحاجة، طيب فين الضوء اللى هينعكس على ربنا».
وتابع: «الضوء لا ينفع يتسلط على أي حاجة، وربنا ليس مخلوق ومش ممكن يكون مخلوق، ربنا خارج الدائرة الكونية التي فيها، التي فيها كل المخلوقات، ويوم القيامة هنكون على طرف الدائرة وساعتها هنشوف ربنا بس إزاى منعرفش يبقى كل اللى علينا نعمل عمل صالح علشان نشوف ربنا».
«لماذا خلق الله العرش؟»
قال الدكتور على جمعة إن الشريعة لم توضح المادة التي خلق الله منها العرش، لافتا إلى أن عرش الرحمن، يمكن أن يكون خلق من اللولوء أو الذهب أو الجواهر أو الزمرد.
ورد الدكتور على جمعة، على سؤال طفلة أخرى، حول لماذا خلق الله العرش، قائلا: «اتعمل لأن ربنا سبحانه وتعالى رسم الدنيا على وضع معين، وفى عوالم، عالم الأرض وحواليه مجرة ومجموعة ضخمة من الكواكب، والشمس بتلف والأرض بتلف، وكل ده منطلق في الفضاء حوالين نجم اسمه «فيجا»، وكل دول بيلفوا حوالين العرش، والكون فيها حاجات بنشوفها بالعين، وفى حاجات لا نستطيع رؤيتها، ومنها الكون المرصود وده بنقدر نشوفه، والضوء بيجرى فيه 300 ألف كيلو في الثانية، ويعنى في ثانية تروح مرسي مطروح، شوف الكون المرصود ده كله 93 مليار سنة، والكون كله 575 مليار سنة، يعنى لو قسمناهم يبقى شايفين سدس الكون، والباقى لم نراه».
وأوضح: «لما ربنا خلى الكون يلف، خلاه يلف حول العرش، والعرش ربنا عمله مخلوق عظيم مبهر، وربنا قهره واستولى عليه يبقى نعرف إن الله القاهر فوق عباده ونقوم ساجدين لله».
«مين خلق ربنا؟»
أجاب الدكتور على جمعة عن سؤال طرحه أحد الأطفال، مفاده: «مين خلق ربنا؟».
وقال «جمعة»: «ربنا خارج الزمان، لو كان في حد خلقه كان هيبقى في زمان، مفيش حد خلقه».
وتابع: «ده لو كان فيه حد خلقه يبقا كان فيه زمان وحد قبليه، وطالما فيه تغير يبقا فيه زمان، حتى لو مليارات السنين..مقدرش أقول مين اللى خلقه لأن مفيش حد خلقه.. أومال هو هنا على طول؟.. أيوه.. لأنه مفيش زمان، ومحدش بيعد ومحدش بيقول إنت عمرك يا رب مليون سنة، لأنه سبحانه وتعالي خارج الزمان».
«ليه إحنا نتحجب والولاد لأ؟»
اجاب الدكتور على جمعة، مفتي الديار المصرية السابق، على سؤال طفلة حول: «ليه إحنا نتحجب والولاد لا؟».
وقال «جمعة»: «البنات جمال والولاد مش جمال، فلازم يتحجبوا، ربنا خلقك جميلة وفاتنة ويا أرض اتهدى ما عليكى قدى، فربنا قالك علشان منعملش دوشة اتحجبي. فبقيتى أكثر جمالا وبهائا، فربنا قالك الجمال ده بتاعك انتى، وامرك بيدك انك تتحجبي أو لا».
وتابع: «الولاد عندهم حجاب برضوا بس من السرة إلى الركبة».
