د. أمير فهمي زخارى المنيا
ايه الحاجات المجهولة في لغتنا اليومية؟
الحاجة اللي بيتحط مكانها نقط وانت تكمل بقي ودي موجودة في كلمات كتير عندنا في مصر على افتراض ان اللي قدامك فهمك أتوماتيكي يعني وبالنظرة بيفهمك علطول...
زي مثلا واحد يقولك "وكده يعني" بعد الجملة.. وكده يعني ايه؟ هو انت ليه خليت الموضوع قاعدة وان الحكاية دي و "كده يعني".
او واحد يقولك "ما هو رايح زي ما انت عارف" زي ما انا عارف ايه؟؟ انا اول مرة اسمع القصة دي منك يا عم انت، انت لبستني وخلتني عارف القصة كلها وإنها منتشرة كمان؟
وواحد تاني يقولك جاب هدومه وكيت وكيت" طيب انا خرجت بأية من الجملة غير انه جاب هدومه؟ ما انا معرفش كيت وكيت دي اللي في بالك المعني في بطن الشاعر..
او الجملة الشهيرة "وكده يعني ودياولو" ومش عارف بصراحة هي كلمة دياولو دي كلمة عربي ولا أجنبي؟ جابوها منين دي اصلا "دياولو"!
وساعات بنعمل الحركات دي في بعض الامراض حتى منقولش اسم المرض ونقول "أصله جاله المرض الوحش" ...! او "المرض البطال" تحس انه جاله مرض قليل الادب..
وواحد كمان يقولك "ما هو راح اسكندرية واسماعيلية ومش عارف ايه " طيب يعني انا اللي اعرف إذا كنت انت بتحكي القصة ومش عارف ايه امال مين اللي يعرف؟
وفي كمان من لغة المجهول المصرية كلمة "فلان وعلان وترتان" او تلتان مش عارف.. يعني دول تلات مجاهيل في جملة واحدة المفروض تفهمها...!
وفي بعض الاغاني برضه زمان بيستخدموا اللغة دي زي مثلا "ياللي ظلمتوا الحب وقولتوا عليه مش عارف ايه" وبرضه ام كلثوم كررتها تاني وقالت "ازاي يا تري اهو ده اللي جري" وكمان قالت "هو صحيح الهوى غلاب؟؟ معرفش انا".. يا سلام اما جملة مفيدة صحيح متعرفيش انتي؟؟ طيب هاروح اسأل ماما...!
وأحيانا تقول لحد فين يا عم المقص مش لاقيه يقولك هتلاقيه هنا ولا هناك! او انت منين يا عم الحاج يقولك انا م النواحي دي...! ودي بتتقال في بعض القري "انا م النواحي دي"...
وطبعا في العصر الحديث انقلبت لغة المجهول الي كمان جملة "بس يا سيدي وقامت معيطة" او "بس وتكسرت المركب ميت حتة"...!
ومن اهم سمات اللغة دي جملة "ولا كاني ولا ماني ولا دكان الزلاباني" او جملة "ولا عيل ولا تيل" (وعن معنى كلمة “لا عيل ولا تيل”، أن العيل هو الطفل والتيل هو الوريث، يعني أن هذا الشخص ليس لديه أطفال أو وريث).
تقريبا الناس بتطلع اللغة دي بسبب دلعهم وهم صغيرين بجمل مجهولة أكثر زي مثلا "كوتي كوتي" او "انكغة انكغة" والطفل يقول ع الكبير "ماله العبيط ده؟" ...!
او اللي يقول "يا ختي كميلة" او " يلاااا الكورة رايحة فين.. يلااا المعلقة رايحة فين؟ " وطبعا الطفل بيفتح بقه ويقول "هاه رايحة فين يا ابن العبيطة؟ " !
وبدأ الموضوع يتطور يوم بعد يوم لحد ما وصل لخدمة العلماء وتقولك "هذه المكالمة قد تكون مسجلة" او "هذا الهاتف قد يكون مغلقا" يعني حتى الست اللي بتتكلم مبتقدرش تجزم بحاجة او خايفة توعدك ومتوفيش تقولك فيه تلاقي ما فيش.
وبدأ الموضوع يتطور اكتر واكتر لحد ما وصل للوحات المرور ساعات تمشي في طريق تلاقي "المنيا 47 كيلو" وواحد ممكن يسأل ياه هي المنيا كلها على بعض 47 كيلو طبعا ده ترميه م العربية علطول.. المهم تلاقي اليافطة مكتوبة "المنيا 47" تمشي بعدها بشوية تلاقي "المنيا 48 كيلو" تقول علطول ربنا يخليلنا الحكومة دي عاملة الطرق بالورب يا عم الحاج مش طوالي يعني هو الطريق بيطول ولا مين اللي بقي فين بالضبط؟؟ ودي ياما شوفتها في يفط كتير في امكان كتير تلاقي الطرق بتطول.
ووصل الامر للخطابات الحكومية ويطلع رئيس الوزراء يقولك "وكما تعلمون فان في الخمس سنوات الماضية حققنا ..." ويقول اي حاجة.. يعني برضه مشي على نفس النظام وقال "كما تعلمون" لا واللهي يا حبي انت ماقلتلناش قبل كده حاجة من دي ...!
ووصل استخدام اللغة دي للشوارع والحارات زي كلمة "عندها" وكله نفسه يعرف هي مين طبعا.. فبدأوا يحددوا الموضوع بقت "عند ام بودرة" او "عند ام ترتر" ودول اكيد قرايب ام بودرة وام ترتر ها عمل زي كابتن محمود بكر "واحد هيقولي انت بتقول اييييه؟ اسكت.. اقوله طيب".
يعني اللغة المخفية انتشرت قوي سواء بالتلميحات او على افتراض انها حاجة معروفة يعني.. زي كمان كلمة "احمد ومحمد واسمه ايه دا هون".. او الكلمة الشعبية الشهيرة رائدة اللغة المخفية "أبصر ايه" يقولك "الواد سعيد واحمد وأبصر ايه".. او مثلا جملة "هتجيب شنطة وجزمة وبتاع".. مش عارف ايه البتاع اللي في الاخر ده؟
لغة شهيرة قوي وليها زبونها دايما خصوصا في التصريحات الحكومية كمان شغالة قوي وواكلة معاهم يعني.. زي ما انتوا عارفين...
وللحديث بقية زى ما انتوا عارفين... تحياتي.
د. أمير فهمي زخارى المنيا
