د. أمير فهمي زخارى المنيا
من اشهر الخرافات:-
" لو خدت علاج للضغط هتعود عليه"
" لو خدت علاج للسكر هتعود عليه "
" لو خدت علاج نفسي هتعود عليه"
" لو خدت بخاخه صدر هتعود عليها "
❗ مش عارفه سبب انتشار الخرافات دي ايه وليس لها اي سند علمي نهائيا
تعالوا معي نعرف حقيقة كل خرافه ونرد عليها ...
أولا: " لو خدت علاج للضغط هتعود عليه"
علاج الضغط مستمر مع المريض لان الضغط مرض مزمن نادرا جدا لا يتم الشفاء منه، مش لان المريض بدأ علاج واتعود عليه...
لا يمكن التوقف عن تناول دواء الضغط دون الرجوع للطبيب المختص، حيث ترد أسئلة حول إيقاف دواء ارتفاع الضغط وتساؤلات عديدة تشمل هل يمكن التوقف عن علاج الضغط أو هل يمكن التوقف عن أخذ دواء الضغط أو هل من الممكن الاستغناء عن حبوب الضغط أو متى يمكن التوقف عن علاج الضغط وغيرها الكثير.
علاج الضغط المرتفع دوره انه يقلل من مستوي الضغط من (مرتفع) ليصبح (مظبوط) ... لو شخص معندوش ضغط واخد علاج ضغط ده هيسبب انه ضغطه ينخفض ويحصل هبوط عنيف ويضطر يوقف العلاج ... مش هيحصل انه هيتعود علي العلاج وميعرفش يبطله.
في سؤال: هل يمكن التوقف عن أخذ أدويه الضغط فى حاله ثبوت قياس الضغط عند الطبيعى؟
الأجابه لا لا ... لأن كون الضغط بقى طبيعي ده معناه أن دواء الضغط فعال والتوقف عن أستخدامه أو تقليل جرعته أو تغيير نوعه يرجع الى الطبيب...
ثانيا: " لو خدت علاج للسكر هتعود عليه "
كذلك علاجات السكر لو شخص معندوش سكر واخد علاج سكر يحصل له إنخفاض شديد في مستوي السكر وهيضطر يوقف العلاج.. مش هيحصل تعود ..
❌ لو مريض سكر وقرر انه مياخدش علاج عشان فكرة انه ميتعودش عليه ده هيسبب إرهاق شديد للبنكرياس وتدهور سريع في حاله السكر.. وقتها بيحتاج علاج مكثف للسكر وأحيانا انسولين.
مقارنه بانه يبدا علاج سكر بدري اول ما يتم تشخيصه ده بيحسن كتير جدا من حاله سكره ويتفادي حدوث مضاعفات سكر مثل (أمراض كلي - قلب - شرايين - اعصاب طرفيه - شبكيه العين).
ثالثا:" لو خدت علاج نفسي هتعود عليه"
لا تسبب الأدوية النفسية الإدمان بنفس الطريقة التي تسببها المواد الأخرى مثل الكحول والمخدرات، لأن الذين يُعالجون بمضادات الاكتئاب مثلًا لا يعانون من رغبة شديدة بتناول الدواء، ولا يتعرضون للنشوة أو السلوكيات الأخرى التي يسببها الإدمان التقليدي، ولا تحدث عندهم نفس العواقب السلبية والتأثيرات الجانبية التي كثيرًا ما نلاحظها عند تناول العديد من الأدوية الأخرى.
تؤثر الأدوية النفسية على إفراز العديد من المواد الكيميائية في الدماغ والتي تلعب بدورها دورًا هامًا في تنظيم العواطف والسلوكيات وأنماط التفكير، وعادة ما تكون هذه الأدوية أكثر فعالية عندما تُشارك بالعلاج النفسي السلوكي.
رجاء لا تسمع لتلك الخرافة وارجع لطبيبك الأول لتغير نوعيه الدواء أو منعه نهائيا منعا لحدوث انتكاسات خطيره .
رابعا: " لو خدت بخاخه صدر هتعود عليها "
حساسيه الصدر ومرض السدة الرئوية أمراض مزمنة عشان كده صاحبها بيحتاج بخاخات لفترات طويله متقطعة حسب حالته .. مش لأنه خد بخاخه مره فاتعود عليها
الخلاصه:
⛔ المعلومات الطبية الخاطئة تسبب ضرر خطير جدا علي صحة المريض .. ويجب الاهتمام بنشر الثقافة الطبية وتصحيح المعلومات الخاطئة المنتشرة. والى اللقاء في الجزء التانى من خرافات طبيه... تحياتي.
د. أمير فهمي زخارى المنيا
