الاربعاء ٢٨ نوفمبر ٢٠١٢ -
٠٨:
٠٨ م +03:00 EEST
بقلم: مـــاش
ما تخافي
يا أمي عليا أنا هنا
على أرضك .. وسط زرعك وطوبك
وسط ناس عرفوكي وسطنا
برجع اسمك ليكي وعليكي بحط توبك
ما تخافي
على جروح وشنا
على رصاص مضروب في جسمنا
على معاملة كالغزاة ضدنا
هنفضل محافظين اسمك في قلبنا
ما تخافي
لو قالوا عليا إيه
بلطجي حرامي قابض من البيه
ابتسامتي على وشي لوشك
رسموها ع الحيطان
جوة في شوارع الميدان
متلون بلون الأحمر
لأجلك ما تفضلي
حروف اسامينا واحدة
كلنا اسمك انتي
وعارفة يا أمي
لو مت اليوم .. ما تخافي على الإنسان
أصلي هاكون في قلب الميدان ..
مش أرض مش شارع .. مش مكان
هافضل القلب والأصل
هافضل الاسم الحقيقي ليكي ..
كل يوم اصراري حريتك تتطل ..
دمي لو نزل لارضك ما هازعل عليه
الحقيقة انت اللي فضلتي لما باعوكي باسمه إيه
خانوك حكامك وهربوا
ونفضل هنا كلنا واقفين
بيسرقوكي وينهبوكي ولخوفهم مننا متقيدين
ويسألونا الصبر يا جدعان .. انتم ليه مش صابرين!
وبيستنوا مننا السكون ..
ويبدأوا يقتلوا فينا الحياة
الشباب في زهره
عشان يسكتوا كام مليون
ما تخافي ..
حريتك أهم عندنا
انت أعظم أسم على اسمنا
انت اللي ليكي بيتقال شعرنا
ما تخافي
بس اوعي تنسي .. وتصدقي كلامهم عننا
الميدان وإرادة شعــب ... لافتات تتحدث عن نفسها
English
