د. أمير فهمى زخارى المنيا
* الحبهان اكسريه قبل ما تضيفيه للأكل والحركة دي بتبرز نكهة الحبهان.
* لما تيجي تقلى وحبيتي تزودي زيت سخنيه الاول والا الاكل هيشرب كله.
* ربع معلقه صغيره بيكينج بودر على الملوخية والبامية وهي بتستوى وأي خضار بتخليها تحتفظ بلونها الأخضر.
* نضفي الكرشة والممبار بالسفن اب والبيكربونات الصوديوم او الكربوناتو + ملح الليمون هتنضف معاكي بسهوله.
* قبل ما تقورى البتنجان ادعكى ايدك بليمونه علشان متسودش وممكن تاخدي القلب بعد تقويره وتشوحيها في الزيت مع فصين توم وتبرد ضيفي شويت طحينه كلي بقا احلي بابا غنوج.
* قبل ما تقشرى الكوسه ادهنى ايدك زيت علشان الصمغ هيبهدل ايدك.
* بعد ما تخلصى خلطه المحشى وقبل الحشو ضيفى عليها معلقتين زيت هتخليه يلمع ويفلفل ويبقى جميل.
* قطعى فلفل حامى وحطيه بين المحشى، دي بتزيد حلاوته ولذاذته.
* ضيفى على الرز دايما ميه مغليه مش بارده علشان ميعجنش.
* الخضار المجمد حركى الكيس في السوبر ماركت الاول (رجيه) لو كتله واحده يبقى ده اتفك واتجمد تاني خلي بالك.
* اوعي تشتري كميات كبيرة من الخضار علشان مايدبلش هاتي اول بأول طازه علشان الفيتامينات الموجودة فيها.
* استعمال السكين في تقشير البطاطس بيشيل طبقة الفيتامين فقشريها بالمقشرة بتزيل القشرة فقط او يفضل تسلقيها كدا بتستفيدي بالفيتامينات اكتر.
* لتسهيل ازالة قشر الطماطم غطسيها في الميه المغلية لدقايق وبعدين ارفعيها هتسهلك ازالت القشرة.
* لسلق الخضار اغلي الميه الاول وبعدين حطي الخضار بعد غسله.
* لما تيجى تعملى لحوم ضيفى عليها نص معلقه صغيره سكر بتخليها تستوى كويس وطعمها احلى.
* معلقة صغيره سكر على الصلصة المسبكة مش هتعملك حموضه وتخليها أحلي.
دول كانوا الجزء الثانى لشوية نصايح لستات المطبخ وازواجهم اللى بيحبوا الأكل.. والى اللقاء في الجزء الثالث... مع تحيات Maro food.
د. أمير فهمى زخارى المنيا
