د. أمير فهمى زخارى المنيا
* نحط نقطة زيت على وش برطمان الصلصة عمرها ما تعمل عفن.
* عصير الجوافة أو الموز عليه نص ليمونه ميخلهوش يسود.
* واحنا بنخزن الفراخ نقطع معاها شرايح ليمون ونحطها بعد ما تتصفي كويس فى كيس التخزين.
* مانفتحش على الفول كتير أثناء التدميس، الهواء هو اللى بيخلى القشرة بتاعته تسود وياريت يتسوى فى إناء فتحته ضيقة زى الدماسة عشان نقلل مساحة احتكاك سطحه بالهواء.
* شوية خل فى مياه غسيل المواعين بتفرق كتير بتمنع التصاق الصابون وبتنضف وتطهر وتلمع المواعين.
* فصين توم ع البسلة بتغير الطعم تماما للأحلى.
* للاحتفاظ بالخضرة وقت اكتر حطي معلقه أو شوكة معاها فى كيس التخزين ونقفل الكيس كويس بعدما نفضي منه الهوا.
* لحفظ الليمون نلف كل ليمونه فى ورق فويل او ورق جرايد ونحطهم فى علبه كده بيعيش مده أطول.
* بعد ما نتبل البانيه نحطه فى البقسماط وعلى الفريزر نص ساعه هيتماسك معانا ومش هيفك ابدا واحنا بنحمره.
* لو عندك كاتيل استانلس اغلي فيه مياه وملح ليمون حينضف ويبقي بيلمع.
* اللحمة مش بيتحطلها ملح الا ف آخر نص ساعة وشوية سكر صغيرين ونص معلقة صغيرة بيكربوناتو لو اللحمة كبيرة بيساعدوا على التسويه بسرعه.
* مانحطش زيت واحنا بنسلق مكرونة هنستخدمها فى بشاميل أو وايت صوص عشان بيزحلق الكريمة من على المكرونة وبتبقى كأنها مسلوقة.
* البصل الأبيض للطبخ والأحمر للسلطات والساندوتشات.
* نشوح الفراخ بملح وفلفل قبل ما نضيف مياه الشوربة بتفرق جدا فى الطعم.
* معلقة صغيرة خل مع شوربة الرز بتخليه يطلع أبيض زاهى ومفلفل وشكله جميل.
* نضيف على عصير الليمون ربع كوبايه لبن بيبقي تحفه.
* الطماطم بعد ما تتعمل بالخلاط بتتصفي من القشر والتفل عشان مايبقاش فيها طعم مرار.
* للتخلص من اي دهون على البوتجاز حطى كربانوتو وملح ليمون وخل بتشيل اي دهووون.
* لو مش عاوزين الكفتة تكش مننا نضيف معلقه بقسماط ونص معلقه بيكنج بودر عليها.
دول كانوا الجزء الأول لشوية نصايح لستات المطبخ وازواجهم اللى بيحبوا الأكل.. والى اللقاء في الجزء الثاني... مع تحيات Maro food.
د. أمير فهمى زخارى المنيا
