يا دكتور انا عندي وجع في ضهري ومسمع في رجلي ده يبقى ايه؟

كالعادة هانجيب كوباية الشاي ونركز في الموضوع عشان ده موضوع مهم جداً

⬅️ في البداية عايزين نشرح حاجة صغيرة هي مكونات الظهرعشان نقدر نفهم الآلام  دي بتيجي ازاي.. 

⬅️ آخر العمود الفقري فوق منطقة العصعص فيه حاجة اسمها الفقرات القَـطَنية وعددهم 5 فقرات .. بين كل فقرة وفقرة غضروف او ديسك يبقى المجموع 5 فقرات و 4 ديسكات. 

كل فقرة من ورا فيها نفق صغير .. وده موجود في كل الفقرات.. النفق الصغير ده مع النفق الصغير اللي في الفقرة اللي فوقه واللي تحته بيكونوا نفق طويل من الجمجمة لحد العصعص.. النفق ده بيمشي فيه الحبل الشوكي.. وده كابل الكهربا الرئيسي اللي نازل من المخ وبيوزع أعصاب على الجسم كله.

✅ يعني دلوقتي نقدرنتخيل الترتيب ده (فقرة قطنية - ديسك - فقرة قطنية) وورا فيه حبل شوكي زي اللي في الصورة.

 

✅ بص يا سيدي .. زي ما اتفقنا ان الحبل الشوكي هو كابل الكهربا الرئيسي بيخرج منه فروع للجسم كله.. عند الفقرات القطنية بيخرج (كابل) عصب مهم جداً اسمه عصب النسا ويطلق عليه مجازاً "عرق النسا".

✅ عرق النسا ده بيغذي أماكن كتير في الجسم منها الإحساس في الرجلين.

 

✅ الناس اللي عندهم (انزلاق غضروفي) او (ديسك) .. بيكون المشكلة عندهم ان الغضروف اللي بين الفقرات القطنية اتزحلق لورا (اتفعص بين الفقرتين فبتبُظ لورا 😃) زي مايكون عندك رغيفين توست حاططهم فوق بعض وفي النص مربى كتير وضغط على التوست جامد هاتلاقي جزء من المربى خرج من الساندوتش 😃.

✅ المربى اقصد الغضروف لما يخرج منه جزء برة الرغيفين (اقصد الفقرتين) مابيطلعش في الهوا بيقوم خابط في مين؟ الله ينور عليك في الحبل الشوكي (عند توزيع الكابل المهم عصب النسا "عرق النسا". 

✅ وزي ما اتفقنا عصب النَسا بيغذي احساس مناطق ايه؟ الله ينور عليك .. الرجلين.

✅ وبكده عرفنا ليه الديسك او الانزلاق الغضروفي بيسبب آلام في الرجل.

 

✅ آه فيه كتير طبعاً زي حاجة اسمها ضيق العمود الفقري , أو خُراج في العمود الفقري.

✅ الناس اللي عندها هشاشة عظام والسيدات فوق الخمسين وكبار السن أحياناً بيحصل عندهم كَسْر في الفقرات وبيسبب نفس الأعراض تقريباً.

✅ الحل الوحيد ومفيش غيره انك هاتروح لطبيب عظام (أخصائي أو استشاري) عشان يحدد المرض بالضبط بالكشف الاكلينيكي لأن زي ما قلنا ممكن يتشابه مع أمراض أخرى.

شفاكم الله وعافاكم .. التشخيص ماينفعش بالنت ولا بالبركة لازم فحص وإشاعات إذا لزم الأمر لأن ممكن يكون كسر زي ما قلنا والمضاعفات تحصل والعواقب تبقى غير محمودة.