ديڤيد ويصا
فيه ظاهرة علميّة نفسيّة اسمها "الاحتراق النَّفسي" ..
وده إنهاك نفسي (زي الإنهاك الجسدي كده) ..
بيحصل لأي طبيب نفسي أو مُشير أو قسّيس ..
من كُتر سماعه لمشاكل الناس وصراعاتهم ..
وأحيانًا بسبب توحُّده معاهم لدرجة انه يعيش مشاكلهم ..
وعشان يتجنّبوا ده، بياخدوا راحة نص ساعة مثلًا ..
بين سماع مشاكل شخص، وسماع مشاكل اللي وراه ..
عشان يستردّوا طاقتهم ويفصلوا نفسهم (نفسيًّا) عن اللي سمعوه!
--
لو انت خدمتك فيها رعاية أو متابعة ..
فكّر في ال ٥ حاجات اللي هقولهم دول:
(١)
إنت مسؤول انك تسمع الناس وتساعدهم يفكّروا صح ..
لكن انت مش مسؤول عنهم ولا مفروض تاخد قرارات بدالهم ..
حلو انك تفكَّر معاهم، بس ايّاك تفكر بدالهم!
(٢)
أغلب مشاكل الناس علاقاتيّة بالأساس (تربية، جواز، ارتباط، وهكذا) ..
ودي محتاجة نُضج منهم عشان يتعاملوا مع أوضاع قائمة ..
لأن مش بسهولة هيقدروا يسيبوا العلاقات دي ويمشوا ..
إيّاك تحس بالذّنب بسبب مشاكلهم، مهما حاولوا يشيّلوك المسؤوليّة ..
لازم تساعدهم يشيلوا شيلتهم بوعي، لأن مش دورك تشيلها بدالهم!
(٣)
إيّاك تسمع مشاكل الناس لدرجة انك تغرق معاهم فيها ..
لأن ساعتها مش بس هُمّا اللي هيحتاجوا مساعدة، لكن انت كمان ..
دايمًا حافظ على مسافة بينك وبين مشاكلهم، عشان تقدر تساعدهم ..
وافتكر ان "المواجدة" معناها انك تكون جوّاهم وهُمّا بيعبّروا عن أوجاعهم ..
مش انك تاخُد وجعهم بدالهم، وتقع معاهم في حفرة المشكلة!
(٤)
إدّي نفسك حرية انك تاخد راحة بين كل مشكلة والتانية ..
مهما كان الضغط عليك من الناس، ومهما كان اللوم منهم عليك ..
وافتكر ان الرب يسوع نفسه "صرف الجموع" أكتر من مرة (مت٣٦:١٣؛ ٢٣:١٤)
عشان يقدر يختلي بنفسه، أو يمارس مهام تانية ليها أولويّة ..
الاهتمام بنفسك مش أنانية، لأن ده احتياج لأي شخص عاوز يساعد غيره!
(٥)
مهمّتك الأساسيّة في الرعاية (مهما كنت حكيم وشاطر) ..
مش انك تفضل تدّي نصايح للناس في مشاكلهم (وان كان ده مهم) ..
لكن انّك تشكّل أذهانهم بكلمة الله، عشان يقدروا يعتمدوا على نفسهم ..
تشكيل شخصيات قويّة هو الهدف، لأنك مش عايش للناس طول الوقت!
--
الخلاصة:
الخدمة الحقيقيّة هي جسر بيوصل الله من خلاله للناس ..
إنت مش بديل لله، فمتخلّيش الناس تعتمد عليك اعتماديّة مرضيّة ..
وانت مش مسؤول بدل الناس، فمتخلّيش مشاكل الناس تبقى مشاكلك ..
حافظ على قعدتك اليوميّة قُدّام الله وكلمته ..
لأن الله هو مصدر الحياة، مش انت ..
إنت مُجرّد قناة بتسري فيها الحياة للناس!
ديڤيد ويصا
