د. أمير فهمى زخارى المنيا
المقال اليوم خفيف وجميل لثلاث معلومات
1- حد عنده فكرة ان ماركة اديداس و بوما لأثنين اخوات ؟؟
2- حد عنده فكره عن سبب تسميه زنقه الستات بالإسكندرية بهذا الأسم؟؟
3- عارفين الكافيهين التاريخيين ( جروبى والامريكيين ) يطلعوا مين؟؟
المعلومة الأولى:
حد عنده فكرة ان اديداس و بوما اخوات ؟؟
انا هقولكم حكايتهم
الاخوين آدى دايسلر و رودى دايسلر
كانوا من صانعي الاحذية بألمانيا وقرروا انشاء مصنع واسماه الاخوان دايسلر لصناعة الاحذية عام 1924م
وآدي كان صاحب فكرة احذية كرة القدم
بعد ازدهار عملهم شاركوا فى صنع احذية للرياضيين خلال الدورة الاولمبية 1928م وكذلك دورة الالعاب الاولمبية 1936 ببرلين
عام 1947م انفصل الاخوان دايسلر عن بعضهما وقرر كل فرد انشاء شركة خاصة به
فانشأ ( آدى ) شركة اديداس
وانشأ ( رودى ) شركة بوما
من وقتها وهم أقوى متنافسين في مجالهم.
المعلومة التانيه:
زنقة الستات أشهر المناطق التجارية في الإسكندرية
اسمها زنقة لستات
ولستات ده اسم تاجر تونسي يهودى اول من فتح محل بالزنقة واتعرف المكان علي اسمه
والزنقة دى تطلق علي الحارة الصغيرة
حرفها المصريين من زنقة لستات لزنقة الستات...
تيجى بقه للمعلومة التالته:
لعشاق وسط القاهرة عارفين الكافيهين التاريخيين ( جروبى و الامريكيين )
الجديد فى الموضوع ان جروبى يبقى ابو الامريكيين !!!!!!
عارفين ازاى ؟؟؟؟؟ انا اقولكم ...
سنة 1884م كان فيه حلواني سويسري اسمه جاكوب جروبى , هاجر لمصر ومعاه ابنه وكان اسمه اكيللى , فتح محل فى الاسكندرية سنة 1890م وسماه على اسم عيلته
***** جروبى *****
جاب معاه اصناف من الحلويات المصريين مسمعوش عنها قبل كده الايس كريم ( الجيلاتى ) - الكريم شانتى - المارون جلاسيه - الميل فوى - والاكلير
وفى سنة 1909م بدأ ينتشر ويفتح فروع فى القاهرة واشتهر بغلاء اسعاره
واقتصار رواده على الباشوات والطبقة الراقية
ابنه اكيللى فكّر فى فكرة جديدة انه يفتح محل على نفس نظام جروبى ولكن بأسعار اقل لاجتذاب طبقة الافندية والطلبة وكان محل الامريكيين المواجه لمحل جروبى فى وسط القاهرة
واستمر الامريكيين وجروبى ملكا لعائلة جروبى لغاية ما احفاده سيزار وبيانكى باعوا مؤسسة جروبى للمالك الحالي الشركة العربية للأغذية عام 1981م
ودى كانت حكاية عمى جروبى هو وابنه اكيللى صاحب فكرة الأمريكيين...
والى اللقاء في معلومات خفيفه...تحياتى.
د. أمير فهمى زخارى المنيا
