شعر : حنان فكرى
مين اللى لسه ماماتشى فيكى يا مصر ؟؟
مين اللى فرط و اللى ورط
واللى خاين والعميل
مين اللى لسه ماسالشى دمه يا مصر؟؟
مين اللى هون و اللى حول فجر الضنا لقتيل
نصرخ فى مين
نلجا لمين ؟
و اللى حاميكى و مستخبى ف الكراسى عوووويييييل
و اللى مخاويكى و نفسه فيكى اعوج نجيس الديييييل
*************************
مين اللى لسه ماماتشى فيكى يا مصر ؟؟
مين اللى عايش واللى حايش
عن عينيكى النور ؟؟
مين الى جوع واللى شرد
و اللى لفق للحقيقية الزور
مين اللى على السوووووور
مين اللى جاى له الدووووور
ليه يا بلد قسمتنا فيكى قبور
يا ام الشهيد الباكية لسه فى بورسعيد
لمى الدموع
و الحسرة ملو الكف
لفى الدفة قبلى
اسيوط هناك
جسم الملايكة حتة حتة
ع القضيب
يترجى : سيب لى
يا وطن فيك ذكرى واحدة
بدون وجع
كان لسه لى حلم فيك
فاكره يطيب لى
*******
مستنى ايه يا شعب و انت
كل يوم
الموت بيخطف فيك عريس
لَموا العيال
متمزعين وفى قلب كيس
و الصرخة مكتومة فى زور
وقفت بعرضه المتاريس
مستنى ايه
يا شعب فُك عن البصيرة غماك
اصرخ وثوررررر
مستنى ايه ؟ جَر السواقى فى ضلهم
اخرته تجف الزروع
و يندبح له الف تور
*********
ااااااااااااااااااه يا بلللللد
مين اللى لسه مماتشى فيكى
اااااااه يا بللللللد
بتبيعى لحمك و اللى منك واللى ليكى
اااااااااه يا بلللد
قطعت ودانها و لسه برضه بنناديكى
