كتب - محرر الاقباط متحدون
كشف سيف شكري لاعب منتخب مصر للمصارعة، اسباب هروبه الى بولندا من معسكر المنتخب الذي اقيم مؤخرا في دولة قيرغيزستان، وذلك في مقطع فيديو نشره عبر حسابه على فيسبوك ، وفيما يلي نص تصريحاته :
انا عملت كدة عشان مبقاش بطل إفريقيا اكتر من مرة ومش باخد 1٪من واحد قاعد دكة طول السنة في الاهلي والزمالك بيلعب كورة ده ميرضيش ربنا.
ليه انا ابويا يكون مديون بسببي، أنا بفضل الله بطل إفريقيا 5 مرات، مرتين بالميدالية الذهبية ومرتين بالفضية ومرة بالبرونزية ومصنف عالميا اكتر من مرة وبطل العرب.
النشيد الوطني لما اتعزف كنت فخور جدا اني عملت ده وكان احلى احساس حسيته في حياتي
رجعت مصر وأنا فرحان جدا وفخور جدا على أساس في دماغي حاجات تانية والدنيا هتحلو وهيكون في فلوس وعربية وشقة.
قالولي طبعا هيكون فيه مرتب وفيه مكافأة، والخير جاي، سألت على المرتب، قالولي هيكون 745 جنيه في الشهر بعد خصم الضرائب.
مصدقتش قلت للموظف انت بتكلمني انا ، قالي آه والف مبروك دول 745 جنيه .
قلت طيب مش مشكلة في مكافأة الميدالية الذهبية، قالي 5000، وقتها شعرت بالصدمة .
اتصدمت طبعا بعد سماعي الرقم لكن رجعت اتمرنت تاني وتعبت تاني واتصبت تاني، وأبويا صرف عليا تاني.
ابويا تعب معايا جدا وامي كمان ، ابويا صرف عليا دم قلبه، لان المصارعة بتحتاج مصاريف كتيرة جدا ، وكل ده على والدي.
وأنا مش عارف أعمل حاجة مش قادر أساعده، ونفسي اساعده واحصد الميدالية الذهبية في الأولمبياد وده حلمي ومش عارف اعمل كدة بسبب الصعوبة.
ياريت محدش يزايد عليا في حبي لبلدي، وطني في قلبي ودمي ومفيش حد يقدر يشكك في ده للحظة واحدة.
انا حصلت على بطولة إفريقيا أكتر من مرة، ليه مفيش حد يستقبلني في المطار.
وزارة الشباب والرياضة معرفتش اسمي إلا بعد ما مشيت.
كل ما افوز بميدالية مش بلاقي حتى راديو يعمل حوار معايا لمدة 5 ثواني أو خبر ينشر عني.
للأسف الوضع زي ما هو حتى الآن ، انا مش معايا أي حاجة ولا حتى عجلة.
بشكر كل واحد دعمني، ووقف جنبي.
وتقدم بالاعتذار لوالديه قائلا :" اسف ليكم كوني عملت كدة واخدت الخطوة من غير ما أقولكم قبلها وبعدت عنكم وإن شاء الله أشوفكم على خير.
كان لازم أخد الخطوة دي عشان كان لازم أشيل عنك يا أبويا.
