د.امير فهمي زخاري
يقول عبد الرحمن الأبنودى
ظللت معظم سنوات الطفولة أتعجب من هذا الدعاء الذى لا أفهمه.. فى كل مناسبة تدخل المرأة الجارة أو القريبة فى يدها .. حناء. سكر. شاي . صابون, تطلق زغرودتها فى وجه العروس وتعقبها بالدعاء الخالد..
بالعمارة والتمارة وجيزة النصارى..
يا رب ماذا يقلن..؟!
يوماً سألت فاطنة قنديل (والدته) عن ما هى هذه العمارة ومعنى كلمة التمارة وما دخل النصارى فى كل هذا التغريب..؟!
تعجبت الأم .. كيف يا ولدى مش خابر العمارة والتمارة وجيزة النصارى..؟!
يا ولدى طبعاً ده جواز واللى يجوّز بنته بيبقى خايف واللى زينا لازم يطمنه علشان كدة بنقوله الكلمات دول عشان يتطمنوا وفى نفس الوقت دعاء علشان ربنا يوفقهم ويثبت قلوبهم على الود والعشرة والجوازة تدوم..
أقول لها كل ده جميل.. إيه بقى العمارة والتمارة والحمارة والنجارة وكل اللى إنتوا بتقولوه ده..؟!
تجيب فاطنة قنديل اسمع يابو لسان طويل..
دلوك الجوازة الواحدة مننا تدعى فيها بإيه؟ بإنها تعيش وتدوم والناس تخلف عيال والرجل ومرته يحبوا بعض ويعيشوا على الحلوة والمرة لحد ما يفتكرهم الحى الذى لا ينام.. مش كدة واللا غير كدة..؟!
أجيبها فى انتظار الإجابة "كدة".. تقول .نمسكهم واحدة واحدة بالترتيب...
بالـعمارة...
يعنى عليهم وعلى الله عمار الديارة يعنى يعيشوا ويعمروا البيت..بإيه؟ طبعاً بالخِلفة الصالحة لأن الخِلفة وحِس العيال فى البيت هى اللى تعمر الدار.. البيت إللى من غير خلفة فقرى وزى القبر ساكت لا ضحكة ولا بكى ولا يامّا ولا يابا.. أدى العمارة.
طب والتمـارة...
.تقول "التمارة أن الواحدة اللى خدها جوزها عشان يعولها ويأكلها ويشربها يتمر فيها العيش والمعروف تقاسمه الحزن زى ما بتقاسمه الفرح وتمرض لمرضه وتشقى لشقائه ساعتها يكون المرأه "تمر" فيها العيش.. والمعروف اتقابل بالمعروف أهى دى ياولدى التمارة ..
طب وجيزة النصارى ...
وإيه إللى دخل النصارى فى الحكاية وللا هية عشان السجع تمارة وعمارة ونصارى وكدة يعنى؟!!..تغضب فاطنة قنديل من السخرية المختبئة وتقول:
أهى إللى بتضحك عليها دى أهم حاجة فى التلاتة
إنها دعاء لله علشان مايكسرش المحبة وتدوم الجوازة.. ده دعاء بعدم الطلاق.. لأن النصارى يا ولدى ما بيطلقوش.. إللى خدها هى إللى خدها.. هى إللى هتتشعلق فى رقبته طول العمر.. زعلوا من بعض.. أتقندلوا.. راحو.. جُم.. آخرتها لبعض عشان معندهمش طلاق..
فإحنا بنتمنى للواد والبت إللى هيتجوزوا إن جوازهم يبقى جيزة نصارى يعنى جواز دايم علطول ما يتكسرش ولا فيش حاجة تعطله...
ومادام عمرت الدار وخلفت عيال، ومادام تمر فيها المعروف وبقت تخاف على حاجة جوزها وماله وعياله لازم الجوازة هتدوم زى جوازات النصارى ..
عشان كدة ما فيش غيرها فى حنكنا لما بندخل على أى فرح على طول نهلل..
بالعمارة والتمارة وجيزة النصارى.
تحياتى للجميع.
