د. أمير فهمى زخارى
فكان شرب شاي "العصرية " في البلكونة ... وكان الجو جميل، والمشاهد كذلك!!
وكان العشاء .... جبن وبطيخ، في البلكونة ... وكان إستقبال أصدقاء والدي المٌقربين، والأهل في البلكونة ....
وعلى المستوي الإجتماعي الأقل:
مكان تقميع البامية، وقطف الملوخية ... منشر للغسيل .... تربية طيور ....
لعب طاولة (بفانلة داخلية، وساند إيده علي السور)، مع شفط شاي بصوت تسمعه من الدور الخامس ... وفي الصيف، يصاحب هذا ( تفتفة لٌب ... أو بذر عنب )!!
دلوقتى البلكونة صارت الوجه الآخر للمخزن.
علب كرتونية مغلقة مكتوب على كل منها محتواها: كتب هيثم المدرسية (هيثم تخرج في الجامعة ويعمل في إيطاليا منذ خمس سنوات)، أوراق بابا الرسمية (باب رحل عن عالمنا قبل سبع سنوات)، إبر وخيوط تريكو (السيدة حنان توقفت عن أعمال الإبرة منذ ما يزيد على عقدين)، أقمشة (تحولت على الأغلب إلى بودرة بفعل عوامل التعرية)، معلقات من الثوم مثبتة بمسامير من السقف، أشولة من البصل مرصوصة على الأرض.
والبعض، حرصاً من الشمس، لا بسبب الحجاب، كان عامل ستائر علي كوبيسته خشب، زي كبائن الاسكندرية!!!
مع التكاثر .... البعض " قفّلها " لتكون حجرة ... فبدأت بشاعة المظهر الخارجي للعمارات في مصر.. ضياع الذوق العام .... فواحد قافل بخشب وواحد كريتال، وثالث ألومنيوم!!!!
زمان لما كان راجل البيت يرجع من شغله ويتغدى مع عياله ويدخل يريح شوية ويصحي علي المغرب ويقول لمراته اعمليلنا كوبايتين شاي وتعالي نقعد في البلكونة شوية.
**- تقوم ام العيال تعمل كوبايتين الشاي التمام وتجري وراه على البلكونة علشان تتتمتع معاه باحلي وقت يقضيه زوجين مع بعض لما يقضوه في الحكايات والضحكة اللي من القلب
مكانش فيه بقي لا نت ولا فيسبوك ولا اي حاجة تخلي طرف من الاتنين قاعد مشغول عن التاني ولا بيسمعله وهو مركز في حاجة تانية.
**- تصدق كان ممكن يلاعبها كوتشينه او عشرتين طاولة، كان في راجل بيعد الساعات علشان يقعد مع مراته ساعة العصاري يتسامروا ولا اجدع صحاب.
كان في ست بالنسبة ليها القعدة الحلوة دي هي كل حياتها ما هو راجلها هو كل ما ليها.
**- قعدة بسيطة وكوبايتين شاي بس بالدنيا وما فيها، قعدة بسيطة تلاقي فيها الكلمة الحلوة واللمة الحلوة والضحكة اللي من القلب وارتباطهم ببعض بيتحول لصداقة قوية لدرجة ان بعد عمر طويل لو حد فيهم مات التاني بيتعب ويجيله اكتئاب علي فقد شريك حياته اللي قضي معاه كل حياته.
**- دلوقتى محدش فاضي لحد
محدش رايق يسمع حد، الكلمة بتطلع بالعافية، الضحكة بتطلع صفرا ومخنوقة، مفيش وقت، مفيش نفس، المزاج متعكر، زمان كانت حياة بسيطة بس السعادة من القلب.
إتغيّرنا ..... وهجرنا البلكونة، فهجرنا الجمال!!!
عايزنا نرجع زي زمان؟ قول للزمان إرجع يا زمان!!! تحياتي للزمن الجميل.
