كتب - محرر الاقباط متحدون
قال الكاتب نبيل اندراوس :" هناك رسم عمره حوالي ٣٥٠٠ سنة من مقبرة لواحد من جدودنا في البر الغربي الأقصر ... دي بنت مصرية من جداتنا بتساعد بنت زميلتها بتخرج شوكة دخلت في رجلها و هما بيعملوا في جني الثمار و المحاصيل ... من ٣٥٠٠ سنة كانت البنت المصرية تعمل في الحقول و المزارع مثل الرجل تماما .
مضيفا عبر حسابه على فيسبوك :" من ٣٥٠٠ سنة البنت المصرية كانت ترتدي بنطلون و بلوزة زي ما انتوا شايفين ... اول بنطلون أرتدته امرأة في بقية العالم بعد البنطلون ده ب ٣٤٠٠ سنة ... المرأة المصرية منذ ٣٥٠٠ كان عندها training suit عملي وبكم طويل كمان تشتغل به و تعمل به و كمان لونه بينك فاتح طبعا ماكانش لسه نساء مصر ألبسوهم السواد ... جداتنا كانوا عندهم بنطلونات وبلوزات و ازياء عملية علي آخر موضة عصرية ضروري كان عندهم مصممين ازياء محترفين و خياطين ترزية مهرة في زمن كانت أغلب البشرية تغطي عوراتها بفرو الفرائس أو اوراق شجر التين أو مجرد نسيج بدائي يلف علي الجسم فقط لتغطيته .
لافتا :" الإبداع في ازياء المصريات منذ آلاف السنين خرافي و مذهل ازياء للمناسبات و الافراح و ازياء للحقل و ازياء للعمل شئ فوق العقل و طبعا تنوع الألوان هو من نتاج الحضارة العظيمة و مكانة المرأة التي كانت في أعلي مرتبة و قيمة و لم تتكرر ثانية في تاريخنا الطويل الحزين و أيضآ دليل أنهم كانوا شعبآ سعيدآ يحبون الحياة و البهجة و الفرح ... طبعا ماكانش فيه تحرش و لا قلة ادب و لا واحد متخلف مأفون مريض ضايقها و قال شايفين البنطلون هي السبب ... وطبعا و لا واحد من الرجال العاملين معهما في الحقول تحرش بهما و لا ضايقهم ماكانش عندهم الكلام ده ... مصر المراة كانت في غاية الإحترام و القيمة و المكانة .... مصر كان فيها اخلاق و تربية و أدب و ضمير و احترام المرأة ... مصر كانت مصر .
