كتب - محرر الاقباط متحدون
علق المفكر والطبيب خالد منتصر على تغريدة بنصها "ليه الهالويين الجاي ما نعملش مبادرة ان الستات و البنات كلها تنزل الصبح من غير ميكاب ولا تعمل شعرها .. و نحاول نخض بعض و يبقي التحدي هل هتقدر تتعرف علي زميلاتك في اليوم ده ولا لأ ؟؟#بدون_مكياج_افضل #الهالويين_المصري.
وكتب منتصر عبر حسابه على فيسبوك :" ليه الراجل المصري بيعتبر نفسه هو الان ديلون العالم ، وعنتر شايل سيفه الذي تتهافت عليه الشقراوات ؟؟! ياريت بلاش تريقة سخيفة ،وكل واحد يبص لنفسه في المراية وبس .
وتابع :" البنات المصريات قمرات ،وأيام ما البنات راحت استاد القاهرة لحضور مباريات بطولاتنا الافريقية ، شفنا كرنفال جمال حقيقي وبدون ماكياج ، وعلى فكرة الماكياج مش عيب ولا جريمة وجزء من ملامح الحسن والجمال ، ده فن متوارث من زمن المصريين القدماء ،ولولا الهجمة الصحراوية التي غسلت دماغ بعضهن، وخلتهم يعتبروا الجمال خطيئة، لكنت قد شاهدت كرنفالات جمال أضعاف كده بكتير.
واضاف :" فأرجوكم بلاش تنمر واستظراف على بنات بلدكم، وكفايه انهم مش عارفين يمشوا في شارع يحترم خصوصيتهم ، ولا يركبوا مواصلات ما تنتهكش ادميتهم ،ولا يمارسوا حياتهم بشكل طبيعي يقدر انسانيتهم، مسحت اسم كاتب التويته لان ما يهمنيش الشخص ولا غرضي الشخصنة لكني باتكلم عن اتجاه عند رجال كتير يمارسون تلك السخرية الفجة والاستعلاء العجيب.
