كتب - محرر الاقباط متحدون
قال الكاتب الليبرالي والباحث سامح عسكر :"
الجميلة "منى فاروق" نشرت بوست عن معاناتها من قلة شغلها في التمثيل،.. محدش راضي يشغلها، والكل يبصلها باحتقار، لدرجة البنت أصيبت باكتئاب ولم يعد في مقدورها دفع إيجار البيت أو الوفاء بمتطلبات المعيشة، مضيفا عبر حسابه على تويتر :
مُنى غلطت واعتذرت فكان درس قاسي ليها ولكل شابة في سنها.. استغلها مخرج مشهور وابتزها في نقطة ضعفها وهي حبها للتمثيل.. مشكلة منى إنها طلعت بعد الفضيحة تعيط لمجتمع قاسي مايجيش غير على الضعيف ، مجتمع يُحمل المرأة كل بلاوي الجنس حتى الاغتصاب والتحرش والابتزاز.
المخرج رجع يشتغل ولا كأن فيه شئ وهي لا زالت تعاني منذ سنوات، الراقصة دينا معيطتش بل طلعت بمنتهى الجرأة حطّت صوباعها في عنين كل من يذكر ماضيها،. وعادت دينا نجمة مرة أخرى وأهيل على تاريخها التراب ، وذهبت فيلمها لمجاهل النسيان.
رسالة لكل المنتجين والعاملين في الحقل الفني، مُنى بتعشق التمثيل فليه متستغلوش هذا العشق في أعمال درامية صعبة ؟..ليه طاقة البنت بدل متطلع في العياط والقهر تطلع في الإبداع والإصلاح؟...ليه منحوٌلش حياة إنسانة من جحيم لجنة أو على الأقل تعيش حياة طبيعية..؟ رسالة دعم وحب لمنى، إذا كان ربنا بيسامح فالمجتمع لازم يسامح وينسى، وخليكي جريئة أكتر وصممي تشتغلي في مجالك اللي بتعشقيه، وكوني على ثقة إن ربنا هيساعدك لأنك صادقة وعايزة ترجعي بثوب جديد يعيد للفن قيمته ويمحي ذكراه السيئة بين السطور.
