كتب - محرر الاقباط متحدون
كشف تقرير مصور لفضائية (العربية) عن ان حالة من الغضب الكبير اجتاحت المنصات الاجتماعية، وهذا الغضب أثاره فيديو لأحد العاملين في مطعم شهير بالغردقة وهو يلقي كسر زجاج في مياه البحر بشاطئ مجاور للمطعم .
وذلك ليمنع السياح من استخدام تلك المنطقة والسباحة فيها.
وصف تصرف العامل بانه استهتار بالارواح، وهو التصرف الذي دفع محافظة البحر الاحمر للتحرك بسرعة وتشكيل لجنة للتحقيق في الواقعة .
وبتوجهها للمطعم أنكرت إدارته صلتها بمنفذها، لكن بالتحقيق تبين انه يعمل بالمطعم بالفعل بعد العثور على ملابسه التي ظهرت في الفيديو بإحدى غرف المطعم وتم القبض عليه تمهيدا لعرضه على النيابة العامة .
محافظ البحر الاحمر امر بتشكيل لجنة مكبرة لفحص موقف المطعم محل الواقعة حرصا على ردع المخالفين ممن يروعون المواطنين والسياح ويعرضونهم لاي اضرار جسدية او نفسية.
واستنكرت الواقعة "أون تي في" وكتبت عبر صفحتها الرسمية على فيسبوك : امبارح بالليل متأخر فيه فيديو انتشر لشخص ما أثناء ما كان بيرمي كسر زجاج، وزجاجات فارغة في مياه البحر في الغردقة جنب أحد المطاعم!.
مضيفة :" فيديو مؤسف ومثير للإشمئزاز وتصرف بيأكد إن الشخص ده معندوش أدنى إحساس بالمسؤولية!.
لافتة :" تخيل لو حد حصلت له إصابة بسبب كسر الزجاج اللي اترمى في البحر!.. أكيد كارثة.. كان الموضوع يفوت أو يعدي لو مفيش في مصر جهات رقابية بترصد وتتابع أى مخالفة لحظة بلحظة.
موضحة :" عشان كده ومن كام ساعة تم تحديد هوية الشخص ده وتبين إنه بيشتغل عامل في أحد المطاعم وتم القبض عليه والتحفظ عليه لحين عرضه على النيابة وهيتحاسب بالقانون.
كما لفتت :" الخبر العظيم ده هو جزء من سلسلة إجراءات سريعة بتحصل بشكل دوري ومش هنبالغ لو قولنا يومي في السنين الأخيرة هدفها محاسبة أى شخص يفكر يخرج عن القانون ويعرض غيره للخطر.
مؤكدة :" إجراءات رادعة بتأكد إن عندنا في مصر داخلية قوية رجالتها صاحية ليل نهار، ومسؤولين محترمين بيتحركوا بسرعة وحسم لردع أى شخص يعمل تصرف يضر غيره أو بلده.
وفيما يلي بعض التعليقات الغاضبة من تصرف العامل :
-دة لازم يتحكم عليه أنه ينضف الشواطئ لمدة سنة ومطلوب منه يوميا 10 شكاير من الزجاج والمخلفات اللي في البحر ولما يخلص أن شاء الله ينضف الشط من برة من الزلط وبواقي البطاطس واعقاب السجاير .
-مش مصدقة إن بحياتنا نوعيات زي جزار عمود المونوريل وده للدرجة دي مش حاسين بقيمة بلدهم.
-ما هو لو مش موجودين مكنش ده بقى حال البلد وكنا بقينا دولة متقدمة بس الوضع اللي بنعيشه هو انعكاس للشعب وتصرفاته و رقي افعاله وطبعا الواحد اول ما يخرج ويلاقي الناس كلها بترمي القمامة في الشارع ومبيحترموش اي قواعد للمرور بيعرف الشعب ده ليه بقى كدة رغم الحضارة والماضي العريق ,, احنا بنعيش مع اسوأ جيل في تاريخ مصر.
-لازم يتحاكم.
-الفهلوة. اللامبالاة. سمة الكثيرين.
-قبل ما يتحبس ينزل ينضف اللي عمله.
-ايوه كده خلي البلد تنضف من الاشكال دي ،،تحيا مصر بموًسساتها وحكومتها وجيشها وشرطتها وعلي راًسهم فخامة ألرئيس السيسي موًسس نهضة مصر الحديثه.
-للأسف مصر محتاجة إعادة ضبط سلوكيات واخلاق.
-حسبنا الله ونعم الوكيل فيه ليه كده تئزي الناس حرام عليك.
-نماذج سلبية من العالم الباردة و قليلة الوعي و الدين اللي غايب عنهم إن عزل الأذى و النظافة فى البر و البحر من الإيمان.
-ياريت تتعمل اعلانات توعيه للناس دى واللى بيرموا طوب على القطارات واللى بيقطعوا كراسى القطارات والناس اللى بترمى زبالتها فى الشوارع يجب محاسبتهم.
