كتب - محرر الاقباط متحدون
قال الكاتب الليبرالي والباحث سامح عسكر :" هو بعيد عن فكرة إن فوز أردوغان بالرئاسة هو (نصر للمؤمنين) زي ما الإخوان بيدعوا هي فكرة غبية جدا مالهاش أي أساس في الواقع، مضيفا عبر تويتر :
مش هكلمك إن تركيا فيها بيوت دعارة مقننة بينما فرنسا اللي بتقولوا إنها بتحارب الإسلام لا تسمح ببيوت دعارة أصلا، وإن النوع دا من الجنس غير مسموح به كونه تسليع لجسد الأنثى.
ومش هكلمك إن تركيا قوانينها بتساوي بين الرجل والمرأة في الميراث ، وإن هذه المادة التركية أضيفت في عهد أردوغان .
أو إن زوجة أردوغان نفسها من دعاة المساواة بين الرجل والمرأة في الميراث بتصريحات مشهورة في مؤتمر المرأة الباحثة الثاني سنة 2015م
أو إن تركيا تعتبر فكرة إحياء الخلافة ودولة الشريعة (إرهاب ديني) ممكن تصل عقوبته للسجن مدى الحياة..
مش هكلمك إن كلمة "نصر للمؤمنين" يعني تكفير كل اللي انتخب مرشح المعارضة، وإن كل من يرفض إعادة انتخاب أردوغان في أي مكان هو كافر ملحد..أمال بتقولوا على نفسكم (جماعة معتدلة) ليه؟..لو كان دا مش تطرف ديني أمال يعني إيه تطرف ديني عندكم؟...طلعوا أي فارق بين اللي عملته القاعدة وداعش والتكفير والهجرة وبين اللي بتعملوه على السوشال ميديا؟
مش هكلمك إن ممنوع في تركيا وصف المعارض السياسي بأي وصف ديني سواء مؤمن أو كافر، إنت بس اللي بتعمل كدا..!..والعقل بيقول (متكونش ملك أحسن من الملك)..
مش هكلمك إن مرشح المعارضة (مذهبه شيعي علوي) وحصل على 48% وموقف الإخوان الطائفي من الشيعة يجعلهم في مرمى النيران من هذه النسبة خصوصا وإنها نسبة تصويت كافة المدن التركية ومواقع التأثير...
مش هكلمك عن إن أردوغان نفسه بيحكم من 25 سنة ومحصلش نصر للإخوان في أي حتة، بل وضعهم يزداد سوء في كافة دول العالم، خصوصا في الدول العربية اللي تم طردهم منها تماما..يعني حضرتك الإخوان مستفادوش من أردوغان غير بالشعارات والجعجعة والصوت العالي، لكن مشروع ناجح على الأرض أو خطوة عملية إيجابية (مفيش)..
أنا هكلمك في نقطة تانية تماما
وهي إن الإخوان والإسلامجية أعداء نفسهم، والقصة مش في تهديد خسارة أردوغان لمشروعهم الديني في الحكم بل في موقف تركيا الأصيل من وجودهم أصلا..
قوللي حضرتك
مين في تركيا هيحط إيده في إيد جماعة تحالفت مع الجهاديين في مصر بعد ثورة يناير ورفعت أعلام داعش في التحرير؟
أردوغان نفسه معندوش الجرأة يعلن حلفه مع الإخوان وفي كل مناسبة يتبرأ من هذه التهمة ويضطر تحت الضغوط إنه يطرد بعض قنواتهم ورموزهم..
مين في تركيا هيحط إيده في إيد جماعة فاشلة لم تفلح سياسيا في أي دولة عربية وسقطت في زمن قياسي بمصر وخلال 10 سنوات في تونس؟
مين في تركيا هيحط إيده في إيد جماعة مارست الإرهاب والاغتيالات وتفجير أقسام الشرطة ومواقع جيوشهم الوطنية؟.
مين في تركيا هيحط إيده في إيد جماعة كل رصيدها في التاريخ قتل ولعن وتكفير وإرهاب واغتيالات على أساس ديني؟
مين في تركيا هيحط إيده في إيد جماعة تعتبر الشيعة كفار زنادقة بينما 20% من هذا الشعب شيعي، ومرشح المعارضة كان شيعي، وتعتبر الأكراد ملحدين اللي نسبتهم هناك برضه 20% ؟
مين في تركيا هيحط إيده في إيد جماعة رافضة تماما تراجع أفكارها وتراثها الديني وبتحلم بدولة قرووسطية دينية يكون فيها الخليفة صاحب السلطة العليا؟
مين في تركيا هيحط إيده في إيد جماعة تعتبر مرشدها العام أعلى من رئيس دولتها؟
مين في تركيا هيحط إيده في إيد جماعة تعتبر إن أمريكا وروسيا والسعودية وإيران ومصر أعداء، بينما تركيا تقيم علاقات متوازنة بينهم باعتبارهم قوى ومحاور إقليمية مهمة لا يمكن الاستغناء عنها؟
مين في تركيا هيحط إيده في إيد جماعة مش شايفة الواقع بعنيها ولكن بترسمه بقلبها وعقلها وخيالها المريض؟..مين هيضحي ويقف جنب جماعة لا زالت محبوسة في قفص كله أوهام وعداءات وكراهية دينية تاريخية مالهاش أساس ولا دليل ولا مبرر من الواقع؟
قوللي بقى حضرتك: مين هيخاطر في تركيا بالتحالف مع جماعة بالشكل دا ويخسر العالم كله؟..ساعتها تفهم إن وجود الإخوان في تركيا هو مجرد (كارت سياسي) للضغط على العرب ليس إلا.
زي ما أمريكا استضافت فتح الله جولن وجماعته للضغط على تركيا وهم لا يؤمنون بأفكاره ، وإن الكارت السياسي دا (اتحرق في معظمه) ولم يعد يتبقى منه سوى القليل ، اللي بمزيد من جهد الدول العربية وضغطها أردوغان هيطرد كل عناصر الإخوان ويمنع مؤتمراتهم ويعلنهم جماعة محظورة، وهيبطل رفع شعارات الدين اللي من خلالها بيأثر (عاطفيا) فقط في اللي انتخبوه، لكن في الواقع سلوكه علماني صرف في مفارقة مش هيفهمها الإخوان غير ما يقدموا عقولهم على عواطفهم ويغيروا مذهبهم ليصبحوا أول جماعة دينية في التاريخ تصبح علمانية لأن زعيم دولة أخرى أقنعهم بذلك.
