كتب - محرر الاقباط متحدون
وصف الفنان المصري محمد فؤاد السعودين باعظم شعب على الارض، وذلك وهو يحيي حفلا غنائيا ضخما هناك في اطار حفلات موسم جدة 2023.
وقال فؤاد موجها حديثه للجمهور السعودي :"حلم والله حلم اننا نغني لأعظم ناس على وجه الأرض اه والله.
وتابع :" السعودية ساكنة قلب كل واحد في الوطن العربي، شعبها الطيب الخلوق اللي علم الدنيا يعني إيه أخلاق وكرم، بحبكم جدا وممكن أبطل الغناء بعد الاستقبال ده .
واثارت هذه التصريحات غضب عدد كبير من المصريين الذين راوا فيها تقليل من وطنه مصر، وقالوا انها تشبه تصريحات للفنانة السورية اصالة اساءت خلالها لمصر حيث قالت فيها انها تدين بالفضل للسعودية وانها فقط لها الفضل في تاريخها الفني، في انكار واضح لفضل مصر عليها والتي صنعت نجوميتها.
وكتب الكاتب وائل شفيق عبر حسابه على فيسبوك :" واضح إن الأوبيج اللي خده الفنان محمد فؤاد في حفلة جدة كان كويس لدرجة إنه قال إن السعوديين أعظم جمهور في العالم وإننا اتعلمنا منهم الكرم والأخلاق! .
وتابع :" لما سمعت الكلمتين دول افتكرت الشاعر الكبير عبد الرحمن الشرقاوي لما قال :الكلمة نور وبعض الكلمات قبور..بس لما فكرت شوية لقيت إن بعض الكلمات لا تشبه القبر المظلم ولكن تشبه البكابورت المعفن.
ونرصد في السطور المقبلة بعض تعليقات رواد التواصل :
واحنا إللى زعلنا من اصالة .... والله عيب كده اني اجامل الناس حاجة والكلام إللى يمووع النفس ويقل القيمة ده حاجة تانية .
-تخيل معايا الاجيال اللي جايه اللي غالبا مش هيختلفوا عن الجيل الحالي بس هتبقى ثقافته سمعية بصرية بحته اكثر من دلوقتي…مش هيبقى قاري ولا عارف تاريخه وهيعرف مصر ومكانتها من على منصات نتفليكس وامازون برايم والتواصل الاجتماعي واليوتيوب هيشوف مكانة بلده وارثه الثقافي عامل ازاي؟! تخيل العربي هيشوف مصر ازاي بعد ٢٠ سنه؟ لما يلاقي الفضاء الالكتروني بيمده بذكريات فن منبطح يلهث وراء الريال ويتنازل عن كل اصيل في مقابل مدح الممول…من احنا اللي اتربينا على مصر والخلق ينظر كيف تبني قواعد المجد وحدها وفيروز لمًا غنت ان الحضارات هنا مهدها …نوصل لكده…مع كامل احترامي ومحبتي للشعب السعودي واعجابي بنهضة المملكة العربية الاقتصادية والثقافية…الا ان بعض الفنانين في بلادي ولن اعمم يحتاجون اعادة تثقيف وتعليم وفهم اعمق لمكانة وطنهم الام ليعرفوا تماما كيفية الموازنه بين المدح والاعتزاز بالوطن والنفس…لو عاوزين البلد دي تقوم لها قومه..بدل مايطلعلك جيل مطموس الهوية والانتماء…ورقة في مهب الريح بينتزع منه ميراثه التاريخي والثقافي حته حته.
-الريالات بتزغلل العيون.
-كم انت عظيم ايها الريال السعودي.
-هو كل حد فيكم يروح السعودية يغير رايه هو فيه ايه ولا ده غسيل مخ لما توصلوا مع احترامي للفنان محمد فؤاد انا من اشد معجبينه يس صراحة اندهشت من كلامه.
محمد فؤاد : السعوديين أعظم ناس على وجه الأرض، علمونا يعني ايه كرم وأخلاق !!!!!!!!!!!!!!
-ملعونة "الحوجة" اللي تخلي الواحد ينافق على حساب كرامته وشرفه وتاريخه من اجل حفنة ريالات في شوال.
-زمان في التسعينيات كان عندنا في المنطقة الخلايجة بيأجروا شقق كتير في الصيف ، فكنت بشوف كل يوم تمشي في الشوارع فرقة أشبه بفرقة حسب الله طبل وزمامير ويعملوا دوشة بحيث الساكن الجديد واللي مش عارف يطلع يستفهم ويشوف فيه ايه بيحصل في الشارع من دوشة وطبل ، فالفرقة دي يشوفوا اللي طلع في البلكونة لابس خليجي هو وأسرته في البلكونة فيروحوا يقفوا تحته مباشرة و يهتفوا بصوت عالي على أنغام الطبل : سلام كبير أوي للامارات ولما ميلاقوش أي تفاعل منهم يهتفوا وسلام أكبر للكويت وعمان و السعودية ويقولوا كل أسامي البلاد العربية لحد ما تظبط معاهم البلد اللي الأسرة منها اللي أول ما يسمعوا اسمها يتفاعلوا معاهم ويبادلوهم التحية والاطفال تفرح فيتفهم انهم من البلد دي فيركزوا عليها مثلا السعودية أجمل بلد في الدنيا بلد الحرمين بلد الملك فلان أحسن ناس السعوديين أهلها أهل كرم ومحبة ، ويفضلوا يثنوا ويمدحوا بطريقة مقززة في كل ذرة تراب في البلد وأهلها اللي الخليجي منها لحد ما يبعتلهم فلوس أو يحدفهالهم في حاجة ويفرحوا جدا بيها وياخدوا بعضهم ويمشوا ، والحقيقة اللي عملوا المدعو فؤش هو أكثر عهرا من اللي الناس دي كانت بتعمله على الأقل هما كانوا محتاجين وغلابة.
