كتب - محرر الاقباط متحدون
انفعل النائب فريدي البياضي، بسبب طلب وزير النقل كامل الوزير الموافقة على قرض بـ2 مليار يورو لتنفيذ مشروع القطار الكهربائي.
حيث تستفحل معاناة المصريين بسبب هذه القروض وانخفاض قيمة الجنيه ، في ظل الارتفاع الجنوني للسلع، فاسعار اللحوم والدواجن ارتفعت في مصر بشكل جنوني، فكيلو هياكل الدجاج طعام الفقراء وصل لاكثر من ٥٥ جنيه.
وقال البياضي خلال مناقشة القرض في حضور وزير النقل :" جايين نتكلم على قرض بأكثر من من 2 مليار يورو، يعني ٦٦ مليار جنيه مصري .
وتابع :" هي خلاص الأولويات راحت وبنتكلم دلوقت عن مشروع القطار الكهربائي تاني وقروض تاني .
مضيفا :" ياسيادة الرئيس الحكومة خنقتنا وخنقت اللي خلفونا واللي خلفناهم واللي هيخلفوهم بعد كدة، الاجيال اللي جاية بتتحمل بالقروض دي هتدفعها من دم قلبها .
وتساءل :" فين الأولويات؟! هو فين الصرف هو المواطن هيأكل قطر الكهرباء هيعيش بالقطر الكهربا ؟! .
لافتا :" الجيل الجديد هيدفع هو ثمن هذه القروض ، اسمع عن ميزانيات وزارة النقل وتريليونات اللي بتتصرف فيها بعكس اننا في جمهورية تانية دي مش نفس الجمهورية اللي عايشين فيها.
كما لفت :" النهارده الدستور بيوقف عند وزارة النقل ومفتوح ونيجي عند التعليم والصحة وننتهك الدستور .
مؤكدا ان الشعب قد ضاق ذرعا من هذه الحكومة بقوله :" كفاية كفاية كدة الشعب بيقول كفاية، من ٣ سنين وقفت هنا لوحدي وقلت كفاية ولازم الحكومة تستقيل .
وتابع :" النهارده انا مش لوحدي انا ومعايا نواب كتير والشعب بيصرخ ويقول كفاية كفاية كفاية الحكومة دي لا تحكم ولا تستطيع ان تحكم وغير مؤهلة للحكم .
وبعد هذه الجلسة كتب البياضي عبر صفحته الرسمية على فيسبوك :" عندي كام كلمة عايز اقولهم :
١-أشكر كل الأصدقاء اللي كتبوا أو اتصلوا؛ و شجعوني بعد كلمتي امبارح في المجلس في مواجهة وزير النقل و الحكومة و اعتراضي على قرض تمويل القطار الكهربائي.
٢-عايز اطمن كل الناس اللي أعربوا عن قلقهم عليّا ، سواء من الكلام اللي قلته او من انفعالي الشديد اللي شافوه في الڤيديو ، و باعتذر عن أي قلق سببته ليكم.
الوضع كله متأزم و موضوع القرض دا كان في منتهى الاستفزاز ، خصوصاً انه نزل فجأة في الجلسة! و كان بعد التقرير البائس و المستفز و المرفوض للحساب الختامي للموازنة ، وفعلا كنت مضغوط و أثر عليّا صحياً بعد كدا، لكن الحمد لله انا دلوقت أحسن.
٣- عايز اقول اني مقدر تعليقات الناس اللي مش مصدقة ان الكلام دا حقيقي و مش باتفاق ولا موافقة من اي جهة، و عندكم حق لان الوضع العام؛ يخلي اللي ما يعرفنيش شخصياً؛ لازم يشك في كدا.
٤-باعتذر للناس اللي غضبانة لان القرض في الآخر تمت الموافقة عليه. للأسف انا أملك فقط ضميري و صوتي ، لكن القرار في الآخر بيكون لصالح تصويت الأغلبية اللي وافقت . أنا قلت رأيي اللي مقتنع بيه و اللي يمليه عليّا ضميري و عارف اني ممكن أدفع ثمن دا ، و مستعد لكدا.
٥- أما اللجان اللي بتدخل تشتم او تهدد. فأفضل عدم الرد عليهم، يا رب أنصر مصر و انصف المصريين .
واشاد عدد كبير من رواد التواصل برفض البياضي القرض الجديد ، وفيما يلي عدد من التعليقات :
-أحسنت معالي النائب بس مين يسمع.
-عند حضرتك حق.فعلا..الاولي تتصرف علي الناس اللي دخلها قليل .الحكومة لازم تتغير. مفيش تفكير..واللي حارق دم الناس اكتر وقف البناء. اللي وقف حالهم وحال كتير من الفئات زي المهندسين والفنيين والبناءيين وتجار الخشب والحديد والرمل والأسمنت.وغيرهم كتير.. احنا اقتصادنا تعبان. مش لازم نخلي شوارعنا وبيوتنا زي برة..لما نقف علي رجلينا الأول..والكلام ده بوجهه للسيد وزير التنمية المحلية.
-يسلم لسانك معالي النائب المحترم.
-الله يقويك كلنا بنقول اللي انت قلته ده كفااايه الصرف يجب ان يكون في الاولويااات كفااايه غرقونا.
-الكلام في الصميم شكرا لحضرتك معالي النائب.
-ما شاء الله تبارك الله ربنا يحفظك يا رايت كل السادة النواب يتكلموا زيك ربنا يحفظك ويبارك فيك وفي المحافظة الا انتي منهارجل محترم وكلام محترم.
-أحسنت يا سيادة النائب المحترم. ربنا يحميك ويحفظك.
كما وجه له مواطن رسالة :" ارجوا من معاليك وكل النواب المصريين رفض كل ما يمس المواطنين والموافقة علي كل ما يفيد المصريين ويكون سبب في تخفيف المعاناه وإيقاف غلاء الأسعار الذي نعيشه كل مصري يوميا ... كل يوم الحاجة اللي بيشتريها اي مصري بتزيد جنية كل يوم طيب وبعدين فين رقابة معاليكم كيف ستواجهون مواطني دوائركم كيف نوقف هذا الانفلات في الأسعار والتجار رجاء يكون هذا شغلكم الشاغل هذه الفترة ربنا يبارك فيكم.
