د. أمير فهمى زخارى المنيا
من أشهر الأمراض الموجودة، القولون العصبي
لكن في الحقيقة ليس مرض بمعنى الكلمة
ولكن كأنه زيادة حساسية للقولون ليس أكثر كما هو الحال مع الشخص الحساس !
((يعني قصته بسيطة جدا وبلاش توتر نفسك زيادة معاه))
* ومن أشهر أعراضه:
- الأصوات الكثيرة بالبطن والآلام وتحسنها بعد إخراج ريح أو بعد دخول الحمام.
- ومنها الانتفاخات.
- ومنها تبادل عادة الأمعاء فمرة إمساك والأخرى إسهال !
وغالبا تكون الأعراض منذ فترة طويلة مع المريض !
(لكن أهم نقطة هنا إن القولون العصبي مهما كان لا يسبب نقص في الوزن ! ولو لقينا نقص بالوزن مع أعراض شبه القولون يبقى لازم نفكر في أ تشخيص تاني غير القولون العصبي زي الداء الزلاقي أو سيلياك أو القولون التقرحي ... وهكذا ! )
وارتجاع المريء هو الإحساس بالحرقان والحموضة في منتصف الصدر بعد الأكل وبعض الأوقات ولا علاقة له بالأكل وخاصة في الحالات المزمنة
💥 ولكن لا علاقة له بالمجهود أو الجري أو المشي !
لأنه في هذه الحالة وخاصة لمرضى السن الكبير أو مرضى الضغط والسكر، الأفضل مراجعة طبيب القلب لتشابه الأعراض بين ضيق الشريان التاجي وبين ارتجاع المريء !
وأساس العلاج هو تنظيم الأكل والشرب وهو أصل العلاج وقد يكون له نسبة 90 % من تحسن الحالة أو تدهورها !
ويمكن التعود على هذا النظام البسيط، تدريجياً، لأكون صادقاً معك ولتكن صادقاً مع نفسك وحتى لا تشعر بالاكتئاب والملل عند ترك ما كنت تشتهي !
💥❌ أولا: الممنوعات:
1. الشطة الحارة.
2. الفلفل الحار.
3. البصل والثوم (خاصة خارج الأكل مع تقليل كميته داخل الأكل).
4. الوجبات السريعة المحتوية على كميات كبيرة من الدهون (البرجر والشاورما ...).
👈📝 ثانياً: الإقلال قدر الإمكان من: (ولو تقدر تمنعها امنعها)
1. الشاي (أقصاها 3 كوب باليوم).
2. القهوة والنسكافيه والشيكولاتة البنية.
(كلها تقوم بعمل ارتخاء الصمام الحاجز بين المعدة والمريء مما يزيد حالة الارتجاع ... يعني بتعمل ارتخاء للصمام)
3. الغازيات (الأفضل الاستغناء عنها تماما).
4. الحمضيات (الليمون والبرتقال).
5. الطماطم.
6. الكاتشب.
👌🍱 ثالثاً: النظام الغذائي اليومي:
1. وجبات خفيفة متكررة. (ودي أهم نقطة).
2. مضغ الأكل جيدا.
3. سوائل بكثرة بكل أنواعها
(وأفضل نظام للسوائل عموما هي كميات صغيرة متكررة) والنعناع واليانسون والكمون يفيد في الآلام والانتفاخ....
والحلبة مفيدة في علاج الإمساك.
4. عدم الجوع الشديد.
5. تنظيم مواعيد الأكل.
(ولكن ليس بالساعة ! لأن من أسباب الوقاية من دهون الكبد والسمنة عدم تناول الوجبات في نفس الوقت وهذا ما أثبتته الدراسات الحديثة ... يعني يبقى فيه وجبة في فترة الصباح وفترة الظهر وفترة المغرب وهكذا ... لأن فيه ناس تبقى طول اليوم من غير أكل وتجي بالليل تاكل أكل اليوم كله !!!).
6. الاعتدال في أكل الخضروات والفواكه (لا تزيد عن 3 ثمرات يوميا في المجموع الكلي للفاكهة).
7. الأفضل تقشير الفواكه مثل التفاح والكمثرى.
8. الشوفان قد يفيد في علاج الانتفاخات والغازات والإمساك (وله فوايد تانية كتيرة جدا).
9. الرياضة وتقليل القلق والتوتر . (الرياضة هنا بتحسن كتير جدا من آلام البطن مع القولون ... وطبعا الناحية النفسية هي الأصل في القولون وبما إن الرياضة بتحسن الناحية النفسية فبالتالي هتحسن أعراض القولون كتير).
10. الأدوية الخاصة بالقولون تؤخذ مع الأعراض وتترك عند زوالها.
++ الألم والمغص:
ومن أفضلها ما تحتوي على مادة الميبيفيرين وهي تخفف بإذن الله من آلام القولون ولها أسماء تجارية كثيرة (زي الدوسبتالين ريتارد والفيرين أو الكولوفيرين د أوالكولونا ... أو اسم تجاري فيه نفس المادة الفعالة)
(وجرعة العلاج هنا غالبا كل 12 ساعة قبل الأكل بنصف ساعة لحد ما الألم يتحسن ويبقى وقت اللزوم)
++ ومادة السيمثكون تساعد على تقليل الانتفاخات مثل الديسفلاتيل أو الفلاتيديل أو غيره من الأسماء التجارية
(والجرعة هنا: 2 حبة مضغ 3 مرات قبل الأكل أو وقت اللزوم)
++ ومن الممكن استخدام الفحم النشط eucarbone لعلاج الانتفاخات زي نيوكاربون neocarbone
(وجرعة العلاج هنا: 2 حبة (بلع مش مضغ) 3 مرات بعد الأكل أو وقت اللزوم)
++ وفي بعض الحالات قد يضطر الطبيب لوصف بعض الأدوية النفسية لعلاج القولون
مثل مادة الأميتريبتالين
(يعني لما تلاقي دكتور كاتب لحضرتك علاج مهديء أو نفسي، بلاش تنزعج لأن ده هو الطبيعي مع أعراض القولون المزمنة)
++ وفي دول الغرب ينصحون بجلسات الاسترخاء ... وهكذا !!!
11. قد يستخدم المريض بعض الملينات (مثل سينا لاكس أو دولكولاكس Dulcolax أو أي علاج فيه مادة (بيساكوديل) لعلاج الإمساك إن كان هو الغالب بخلاف بعض المرضى فالغالب هو الإسهال وخاصة بعض الأكل مباشرة. (الحلبة ممكن تفيد بإذن الله في علاج الإمساك مع كثرة السوايل الأخرى)
(((ممنوع نهائي شراب الدوفلاك أو اللكتيلوز لعلاج الإمساك لأن ده بيعمل انتفاخ وهيتعب القولون أكثر وأكثر))).
12. عدم النوم بعد الأكل (على الأقل 2 إلى 3 ساعات بعد الأكل).
13. تقليل النشويات والسكريات عموما قد يفيد جدا في تحسن الانتفاخ ووجوده. (وممكن نستخدم سكر الدايت كبديل كويس بيحسن الأعراض في قصة الانتفاخات كتير)
(يعني لما تقلل السكريات والنشويات درجة هتلاقي الانتفاخ بيتحسن مع حضرتك كتير جدا بدون أي أدوية).
14- بالنسبة لارتجاع المريء والتهابات المعدة (طبعا بعد ما يتم تشخيصها) هيكون العلاج حاجة زي البنتالوك 40 مجم أو بنتازول 40 مجم أو نيكسيوم 40 مجم أو أي علاج من نفس المجموعة، حبة قبل الفطار بنصف ساعة لمدة 4 أسابيع ! مع نظام الاكل السابق وتقليل الوزن الزائد خاصة في حالات الارتجاع !
لأن تقليل الوزن هنا هو أهم شيء في حالة الارتجاع أو فتاق الحجاب الحاجز.
15- ممكن نكرر الجرعة مرة تانية لو رجعت الأعراض بتاعت الارتجاع أو التهاب المعدة ! ولكن لو مفيش تحسن يبقى الأفضل هنا نعمل منظار علوي !
16- السن الكبير لو حصل معاه ارتجاع أو آلام جديدة بالمعدة بدون تفسير (يعني مفيش مسكنات أو علاج بيتعب معدته والأعراض جديدة وليس معتاد عليها من فترة وهكذا) يبقى الأفضل نبدأ بالمنظار قبل أي شيء !
17- الجرثومة ملهاش علاقة بقص الارتجاع نهائي ! لكن ممكن تعمل مشاكل على مستوى المعدة سواء التهاب أو قرحة !
18- انسى المسكنات نهائي علشان مشاكل المعدة والقرح ... ولو ضروري تاخد مسكن يبقى ابدأ بمادة الباراسيتامول زي البنادول أو النوفالدول أو البارمول وهكذا !
19- أخف المسكنات على المعدة هو البنادول ومجموعته وبعد كدة نوعا ما البروفين (لكن وقت اللزوم بس مش على طول) ... لكن من أعنف المسكنات على المعدة هو أي علاج يحتوي على مادة الكيتوبروفين زي الكيتوفان وباي ألكوفان ... وهكذا !
يبقى بشكل عام بلاش مسكن ! لأنه مش لبان ولا شكولاتة !
20- أهم من اللي فات كله: إن لما حضرتك تتعب أول حاجة تعملها تدعي ربنا يشفيك لأنه هو الشافي... وتهدى نفسك..
تمنياتى لكم بالصحه والعافيه...
د. أمير فهمى زخارى المنيا
