كتب - محرر الاقباط متحدون
استنكرت الكاتبة والشاعرة فاطمة ناعوت، منشور متطرف عنصري منسوب لحساب باسم "هبة احمد" وجاء بنصه "يعني احنا مقعدين المسيحيين معانا مش هنقعد السودانيين اللي هما اصلا مسلمين"
وكتبت ناعوت عبر صفحتها الرسمية على فيسبوك :" عادة الشخص المتطرف بيكون عنده جهل بالتاريخ؛ وهي دي المصيبة:حين يجتمع "الشر" مع "الجهل"، بيكون الناتج كارثي مخيف، زي تعليق الأخت "هبة" اللي لو كان عندها بربع جنيه معرفة بتاريخ مصر "الحقيقي" مكنتش كتبت الكلام العبيط ده، وكانت عرفت إن المسيحيين هم سّكان مصر الأصليين قبل المسلمين، وكانت عرفت كمان إن جد جدها كان مسيحي في لحظة ما قبل ما يسلم، وإن جد جدها ده لو مكنش مسيحي، فده معناه إنه كان "وافدًا عربيا وليس مصريا أصيلا". يبقى مين اللي مستضيف مين يا "هبة" أفندي؟!.
مضيفة :" مش نعقل كده ونركز ونفكر في الكلام قبل ما نهبد ونضحّك الناس علينا يا أخ "هبة"؟! ، دائما أقول للشرير: "تثقَّف وتعلّم، حتى لا تجمع بين الشر والجهل، لأن في اجتماعهما كارثة محققة. كفاية حاجة واحدة: إما الشر وحده، أو الجهل وحده، فمن الممكن علاج كل منهما على انفراد، لكن مع بعض، صعب جدا.
كما اضافت :" وطبعًا يا ريت نكف عن الشر والجهل معا، ونبقى بني آدمين طيبين متحضرين عشان ربنا يرضى عنّا ويرفع عنّا مقته وغضبه. صباح الخير على الطيبين والأشرار ربنا يساعدهم على ما ابتلاهم به فاطمة ناعوت ، ملحوظة:هبدة "هبة" دي فكرتني بمقال قديم كتبته أيام أحداث "كنيسة الماريناب" أسوان؛ عنوانه: "الأقباط الغزاة".
