كتب - محرر الاقباط متحدون
يواصل الشيخ التكفيري وليد إسماعيل، دعوته بانه لا يجوز تهنئة المسيحيين بأعيادهم واصفا اياهم بالكفار ، في تحريض صريح ضدهم وفي مخالفة لمبادىء الدولة المدنية .
وكتب إسماعيل عبر حسابه على تويتر :" كل من يبارك ويهني النصارى باعيادهم الدينية فهو سبب في استمرار ضلالهم عن طريق الحق.
وبعدها استقبل اسماعيل الكثير من التعليقات التي من المؤكد انها اصابته بالإحباط، حيث رفض اخوة مسلمين دعوته ، وراحوا يتقدمون بالتهنئة للاخوة الاقباط بمناسبة عيد القيامة المجيد، وفيما يلي تعليقاتهم:
فارس الشهابي :" هشششش..! فصح مجيد و قيامة مباركة لسيدنا المسيح عليه السلام.
د.نسرين :" تويته كل عيد توكل ع الله محدش فاضي لكلامكم اصلا و كل سنه و هما طيبين و ربنا يديم المحبه بين مسلمين و مسيحين مصر ليوم الدين و بجعلنا ف رباط الي يوم دين.
امل المصري الصعيدية :" دي نجع حمادي بلدي واللي في الكنيسة دول أخواتي كل سنة وأخواتنا بخير عيد قيامة مجيد لكل المصريين.
الكاتب الليبرالي احمد عرفات "وليد إسماعيل". كتب الكلمتين دول على حسابه في تويتر ! المهم "كل وأغلب التعليقات كانت تهنئة من مسلمين. وكلام جميل ولطيف عن مشاركتهم لأصحابهم المسيحيين أعيادهم ومناسباتهم. ومسحوا بيه الأرض حرفياً عشان يتعلم يكون إنسان - عاش ليكم وبالشفا يا إسماعيل.
محمود :" شارع 30 مارس بنجع حمادي يجمع بين الكنسيه والمسجد ومن العلامات البارزه ولنا فيه الكثير من الذكريات الجميله تجد هناك الاخوة والمحبه تجمع بين الجميع لا تفرق بين هذا او ذاك.
خالد :" كل سنه واصدقائي المسيحيين بكل وصحه و سعادة.
عبد المجيد:" كل سنه واصدقائي من كل الاديان بخير وسلام وطمأنينة.
ام محمد :" واذا هنيناهم بنكون ضالين كمان ارحمو البشر من هالفكر المتخلف.
الموسيقار خالد حماد:" كل عام و أهلنا و أخوتنا المسيحيين بخير و صحة و سعادة.
الباحث والمفكر سامح عسكر :"راجع نفسك ياشيخ وليد، الموضوع مش مستاهل هذه الغضبة.. الرئيس والأزهر والإفتاء وآلاف من الشيوخ الأجلاء بيهنوا عادي، والقرآن أمرنا بالبر والإحسان لغير المسلمين، يعني الموضوع فيه خلاف وأدلة معتبرة بتقول بالجواز، ولو وضعتها مع أدلة التحريم وفكرت بطريقة جديدة واثق انك هتغير رأيك.
محمد :" تغريدتك هذه سوف تحدث جدلا واسعا علما بأن تهنئة غير المسلمين بأعيادهم من باب المجاملة وحسن الجوار .ليس بحرام لعدم وجود نص قرآنى لكم دينكم ولى دي، وقولوا للناس حسنا.
عمر :" نهنئ ويا رب يجعل أيامهم فرح هاقولك على حاجة والله حصلت معي من ١٠ ايام انا مدمن قهوة اتأخرت ف الشغل للساعة ٤ وفضل معاي عم مجدي وتعبت ف الطريق وقعدت ف الشارع فضل معاي وكان عايز يروح معاي البيت ورن علي بعد الفطار طاب ده لو ماقلتلوش كل سنة وانت طيب اقول لمين كل _سنة وانتم طيبين.
ريم : وهل يجوز أن تغرد من موقع تويتر !؟ لعلمك صاحبه نصراني والعياذ بالله.
مو ياسين :" كل سنه واخواتي حبايبي المسيحيين بخير ودايما في القلب يا ولاد الرب.
ايمان سامي :" ياااه أنا تهاني أعياد المسيحيين دي بتغسلني من جوه....ده أنا باستنى أعيادهم من السنة للسنة عشان أهنيهم.
عماد شاربل :" حضرتك HR السّماوات؟.
إخواتنا وأصدقائنا المسلمين بيعيدوا علينا بكل حب ورأيك بالنسبة لهم لا وزن له ولا قيمة. كل الحب.
شوفت كل الردود عليه من مصريين ومن دول مجاورة وعرب بصراحة حاجة أخر عظمة والواحد فرح اوووي وانا لو مكانه كنت دفنت نفسي.
طيب أنا هحكي حكايه أنا ماما متوفيه من سنتين و كنت عايزه اعمل حاجة العيد الحلويات و أنا معرفش فسألت واحدة من الجيران غير مسيحيه المهم ساعدتني فعلاً بس يوم العيد و أول مرة تعمل كده رفضت أنها تاخد مني شئ من الحاجات العيد و قالت لي أنا بحبك بس أنا الشيخ قالي حرام تاخد من النصارى حاجه في العيد علشان كده معناه أن مصدقين في كلامهم إللي هو غير كلامنا الإسلامي ... أنا مزعلتش خالص منها أنا زعلت علشان الناس دي بتفرق بينا و للعلم أن الست دي انسانه طيبه بس مش متعلمه و إللي بيقولوا لها الشيوخ بتعمله.
سامي فاروق :" المعايدة علي الناس لاتعني بالضرورة حتميه الايمان بما يؤمنوا..انما هي من قبيل المجاملات الاجتماعية الراقية...والتعامل بذوق وشياكه مع الاخرين..وهكذا تستمر الحياة ببساطة ومحبه ورقي واخاء....مصر جميلة بناسها الحلوين...كل عام وجميعنا بخير وسلام.
كل اصحابي المسلمين عيدوا عليا بمنتهى المحبة حقيقي احنا محظوظين ان لينا ناس حلوه بتعرف المحبة برغم الاختلاف.
