د.امير فهمي زخاري المنيا
- ايه اللي يخلي رسمه لواحدة ست بإبتسامه ونظرات مريبه بالشهرة دي
- هل فعلا عنيها بتتحرك مع اللي يبصلها من أي اتجاه زي ما بيتقال 🙄🙄
- طب هو أصلا يعني ايه موناليزا
»» ركز كده معايا......
لوحة الموناليزا هي اشهر لوحة اترست لشخص على وجه الارض.
كلمة موناليزا هي كلمة ايطالية معناها السيدة ليزا عادي يعني.
اللوحة دي رسمها الرسام الأيطالي ليوناردو دافينشي في القرن السادس.
و كانت ثوره في عالم الرسم عشان لأول مرة استخدم فيها "ليوناردو دافنشي" تقنيه الثري دي 3D او الرسم المجسم ثلاثي الابعاد يعني تقريبا صورة حيه...
قبل كده كانت كل الصور مسطحه.
ده غير انه ابتكر اسلوب تلوين جديد وهو "التلوين الضبابي"
يعني مستحيل تلاقي في الصورة خط صريح إنما هتلاقي الالوان كلها متداخله و مفيش اي خطوط فاصلة بينهم.
*ركز بقى عشان التقيل جاي🧠🧠
اللوحة دي مليانه أسرار هقوللك علي شويه منهم....
=إبتسامة الموناليزا الهاديه دي فيها حاجة غريبه حبتين
لو انت سعيد وبصيت ليها هتلاقي ابتسامتها سعيده وتحسها مبسوطة انك بتبصلها .
ولو انت حزين و مودك كئيب شويه هتلاقي ابتسامتها حزينه و كأن ابتسامتها انعكاس لحالتك النفسيه.
=نيجي بقى لعينيها اللي طلع عليها اشاعات كتير .
مبدئيا كده عنيها مبتتحركش في كل الاتجاهات زي ما بيتقال عنها ولا حاجه.
الموضوع كله تكنيك رسم قدر بيه دافنشي يخلي عيون الموناليزا ممتده بزاويه ٣٠ درجه يعني ايه.
بالعربي كده لو انت واقف قدامها هتلاقيها بتبصلك وده طبيعي جدا بديهيات .
ولو رجعت خطوتين كده واتحركت يمين او شمال هتلاقيها برده بتبصلك
بس لو رجعت اكتر من ٣٠ درجه هتلاقيها ولا بتبصللك ولا حاجه هي مصممه في حيز ٣٠ درجه فقط .
وعلى فكرة اللوحة حجمها صغير مش زي منتا فاكر
طولها "٧٧ سم" وعرضها "٥٣ سم".
في يوم ٢٢ اغسطس ١٩١١ اكتشف زوار متحف اللوفر ان اللوحة اختفت فجأه .. وكان طبعا خبر كارثي بالنسبه لفرنسا و فضلت اللوحة مختفيه لمدة سنتين محدش يعرف عنها اي حاجة
وبعد سنتين من التحقيقات إكتشفو ان كان في عامل زجاج ايطالي في المتحف اسمه فينشينزو استغل قبل الواقعه بيوم ان المتحف مقفول وسرق اللوحه وخباها في هدومه وهرب بيها
فضل مخبيها في شقه مهجورة لمده سنتين كاملين
ولما رجع بلده ايطاليا تواصل مع فنان كبير اسمه الفريد چيري وعرض عليه اللوحة انه يشتريها وان ايطاليا احق بفنها.
يقوم الاستاذ الفريد يكلم الشرطة و يسلم الأفندي ده تسليم اهالي.
الشرطة قبضت عليه وخدو اللوحة حطوها في متحف ايطالي كبير اسمه بڤلجاري.
و بعد مفاوضات عنيفه بين فرنسا وايطاليا استعادت فرنسا اللوحه مره اخري ورجعت لمكانها الطبيعي في متحف اللوفر بس مع شوية احتياطات امان زياده شويه.
طب برده معرفناش مين هي الست موناليزا دي:
في نظريات كتير عن الموضوع ده زي ان الست دي هي أم دافنشي وناس بتقول حبيبته وناس بتقول انها مجرد رسمه من وحي الخيال.
لكن اكتر نظريه غريبة هي ان الست دي هي دافنشي نفسه بس غير في ملامحه شوية ولما قارنو صور دافنشي ب الموناليزا لقو فعلا شوية تطابق.
** لكن النظرية الأقرب للصحه **
هي ان الست دي اسمها ليزا چيوكوندو وهي زوجة تاجر ايطالي كبيراسمه فرانشيسكو ديلچيوكوندو
وده كان صديق ليوناردو وطلب منه انه يرسمها احتفالا بزوجته.
وفضل دافنشي يرسم في الصوره كذا سنه يقال انها وصلت ل ١٠ سنين...
و في النهاية اخدها معاه وهو مسافر فرنسا ومسلمهاش لچيوكوندو ولا مراته.
وبعد فتره اهدى دافنشي اللوحة لملك فرنسا وعلقها عنده في القصر بتاعه ومنها لمتحف اللوڤر في باريس..
طبعا الكلام ده مش من دماغي...
ده من المؤرخ چورچيو ڤاساري اللي كتب السيرة الذاتيه لداڤنشي
و بالمناسبه هو اللي سماها موناليزا مش داڤنشي.
بس يا سيدي شفت الموضوع بسيط ازاي...
تحياتى للجميع ومعلومة عيسى والمؤرخ جورجي...
د.امير فهمي زخاري المنيا
