كتب - محرر الاقباط متحدون
قال الاعلامي احمد سالم :" من واقع متابعتي لعدد كبير من جروبات المشاكل الاجتماعية كنت عايز اقول كلمتين ، عزيزتي أم العريس لو بتحبي ابنك بجنون و بتغيري عليه يبقي خليه جنبك بدل ما تطلعي عقدتك علي بنات الناس، لو ابنك عنده مشاكل نفسية او جنسية مفيش حاجة اسمها يتجوز عشان ينصلح حاله لأن الجواز عمره ما كان علاج لحاجة ده لو مكانش هو نفسه بيجيب المرض (الجواز).
وتابع عبر حسابه على فيسبوك :" لو ابنك فاشل و مش بتاع شغل ياريت بلاش تداري علي خيبته قدام نسايبه عشان الموكوس موكوس ولو اتحط علي راسه فانوس و هتفضلي تصرفي معاشك عليه و علي عياله، لما ابنك يطلق بلاش تسخنيه زيادة و تشجعيه يذلها و يبهدلها هي و ولاده عشان ربنا هايردهالك في بناتك او فيك انتِ شخصيا و هتخسري أحفادك اللي أكيد بيحسوا بكل حاجة.
كما اضاف :" لما تحصل أي مشكلة بين ابنك وبين مراته ياريت قبل ما تحددي موقفك تسألي نفسك سؤال واحد بس ،لو بنتك اللي حصل معاها كدة هتنصحيها بإيه؟؟، مش شرط تبقي موافقة علي قرارات واختيارات مرات ابنك لأن ده مش دورك في الحياة و كل واحد فينا مش بيعجبه إلا دماغه.
واختتم :" لما ابنك يشتم مراته او يضربها أوعي تقولي ده راجل ومن حقه يأدب مراته عشان لو بنتك جتلك مضروبة مش هتقولي كدة ابدا و ممكن الموضوع يتطور و الغلبانة تموت في ايديه و ابنك يترمي في السجن و نلتقي في بوست قادم عن نصايح الزوج و الزوجة و أم الزوجة.
