كتب - محرر الاقباط متحدون
قال الكاتب أيمن السميري :" هو الشعب دا ندهته النداهة فعلًا.مش فاهم ليه معلقين الكورة مُصرين يتقعروا ويقلدوا التعليق في الدول العربية… ليه مُصرين رغم ضعف ثقافتهم يقلبوا الماتش لحصة نحو وصرف، ويا ريت عارفين نحو وصرف.
مضيفا عبر حسابه الرسمي على فيسبوك :" هو أنت هتموت لو علقت مصري بلهجتنا وطريقتنا اللطيفة اللي الأجيال والمنطقة كلها كبرت عليها، علق مصري يا عم خشجان العلقمي ابن المهلل، علق مصري زي لطيف وزيوار وميمي الشربيني ومحمود بكر وعفت وحماده إمام هاتها مـ الشبكة، علق مصري وبلاش انسحاق ودونية وذوبان في هوية الآخر.
وتابع :" مش عارف يعني إيه (عناصر) الأهلي … اسمهم لعيبة الأهلي عادي يعني، مش عارف يعني ( لفائدة أو لمصلحة عناصر الأهلي) عادي قول ضربة جزاء للأهلي وخلصنا، مش عارف يعني إيه ( أنصار) الأهلي … ما خلاص يا عم خشجان اسمه جمهور الأهلي عادي وبالجيم بالمصرية، مش عارف يعني إيه خارج (الإطار) ماتقول برَّا المرمى .. برَّا التلات خشبات زي ما بكر وزيوار بيقولوها عادي.
كما اضاف :" ما تعلق مصري يا عم .. ماالشوالي وغيره بيقولوا في التعليق برشا وباش وبزاف وشنو هادا وغيرها من الألفاظ المحلية وصاحب المحل ما علقهمش على باب المحطة.
لافتا :" مش كفاية الشارع المصري اتمسخ وبقى بيقول: اتصل عليك.. وبالله عليك.. وميزان حسناتك، مش كفاية ردمنا على المقرئين المصريين وبنسمع قرآن بالخنفان في كل شارع وتاكسي ومحل، مش كفاية المعادلة الفاسدة بقت الحرم ولا الهرم.
كما لفت :" فيه ناس خسارة فيها مصريتها والمفروض تعيش عمرها كله بتأشيرة إقامة وكفالة، حاجات بتبان بسيطة، بس هي كبيسة، بس هي عملية سحب ناعم عشان تغرس في الرمل أكتر وأكتر.، عيش مصري يا خشجان أو قدم على تأشيرة وريحنا من سحنتك.#وللعقل_سلام.
