د.امير فهمي زخاري المنيا
تعرف دلال عبدالعزيز.. دلال اكتشفها جورج سيدهم مش سمير غانم..  وهو سبب جوازها لسمير غانم .. جورج كان رافض الجواز قوي.. وشايفه مشروع فاشل.. سمير يقوله اتجوز يا جورج.. لا .. الضيف يقوله اتجوز يا جورج برضه لا.. كان رافض موضوع الجواز نهائيا.. لحد ما وصل لسن الخمسين..
قابل دكتورة صيدلانية اسمها ليندا..

ليندا ست رقيقة وهادية.. الاتنين لقوا ان في بينهم حاجة مشتركة قرروا يبنوا عليها.. واتجوزوا.. وهتلاقي صور نادرة لفرحهم تحت..
 المهم يا سيدي .. جورج مكانش بيفهم في الفلوس .. اي ممثل بينجح بيجيب اخوه مدير اعماله.. محمد رمضان اخوه محمود مدير اعماله.. تامر حسني اخوه حسام مدير اعماله.. وهكذا..

امير اخو جورج متعرفش ايه اللي حصله وقرر ياخد كل فلوس الشركة.. ومش كدا بس جورج كان معاه مسرح .. امير باعه.
ولم كل الفلوس ومشي.. جورج لما عرف الموضوع جاتله جلطة.. الجلطة اثرت على نصفه الايمن.. وبقي لا يقدر يتحرك ولا يتكلم.. اللي بقي لسانه ورجله كانت الدكتورة ليندا.

 الست العظيمة دي اللي مشافتش جورج معافي غير شهور.. فضلت عشرين سنة ام واخت وممرضة وزوجة وابنة.. الست العظيمة دي كانت هي عكازه اللي اتسند عليه جورج لما اخوه اللي من لحمه ودمه باعه..

ليندا دي ست عظيمة.. ولو انت لقيت واحدة زيها اتجوزها علطول...

 بتسمع عن الفنانين اللي اتعموا بعد ما كبروا زي القصري.. واللي اتبهدل واللي طلع عينه حرفيا من اهله.. رغم ان اهل جورج عملوا فيه كدا فعلا .. الا ان ليندا كنت هي الدرع اللي سنده وخليته موقعش.. الايد اللي طبطبت.. وخليته يتحمل صدمة أخوه..

الله يرحم جورج ويصبر ليندا فعلا زوجه وفيه بكل المقاييس...
د.امير فهمي زخاري المنيا