كتب - محرر الاقباط متحدون
قال الشيخ خالد الجندي، عضو المجلس الأعلى للشؤون الإسلامية :" أي أب بيدفع فلوس في بيته الفلوس دي تنقسم إلى قسمين فلوس ظاهرة وفلوس مستترة.
مضيفا خلال تقديم برنامج "لعلهم يفقهون" المذاع عبر فضائية dmc، :" أولادك بيشوفوا الفلوس الظاهرة.
موضحا :" يعني الفاكهة اللي بتدخل بيها البيت، اللحمة ، الفراخ، الهدوم الجديدة، إنما ولادك مش بيشوفوا فلوس الكهربا والمياه والضرائب ومصاريف المدرسة اللي انت بتدفعها .
لافتا :" من النادر لو لقيت حد من ولادك بيشكرك لانك دفعت فلوس الميه، انا مسمعتش واحد من ولادنا بيقول متشكر يابابا لانك دفعت فلوس المياه أو الإيجار أو مصاريف المدرسة.
وتابع :" انما لو اشتريت له ساعة هيشكرك ويبوس على راسك كذلك لو جبت له أكلة كويسة او حلوى او ملابس هيفرح جدا لان دي فلوس ظاهرة.
واضاف :" الإنفاق المستتر أكبر بكتير من الإنفاق الظاهر، وهي دي مشكلة الدولة أنها بتدفع أموالا باهظة رهيبة ومليارات علشان توفر لينا بنية أساسية فيها كل الخدمات زي الصرف الصحي اللي موجود في بيتك ولولاه لكانت البلد اتدمرت.
كما اضاف :"الطرق والكباري اللي مش عاجبة بعض المرتزقة وبعض العملاء وبعض الخونة وبعض المأجورين وبعض ضعاف العقول والله لو مكانتش اتعملت في هذا التوقيت لكنا أصبنا بحالة تجمد.
موضحا :" هو انت كان عندك طريق سليم او كوبري عدل ، اتعملت الكباري والطرق والشوارع والناس لسة دماغها في حلة الشوربة وحتة اللحمة.
وتابع :" طبعا اللحمة مهمة والشوربة والعيش انما فيه حاجات لها أولوية، يعني لازم نلجأ ليها والا كنا غرقنا ، شبكة الكهرباء كانت متهالكة، وكنا وصلنا لحال اننا هنستخدم اللمبة الجاز تاني ، من كثرة انقطاع التيار، وتلف الأجهزة، دلوقتي محطات الكهرباء بها فائض يتم تصديره.
ورأى :" بيهدروا كل مجهود الدولة بالحديث عن المعاناة من ارتفاع الأسعار، ولازم حد يقول كلمة الحق ويتحمل حتى لو وصفوه أنه بيطبل لبلده .
وواصل :" قول بكل فخر نعم أنا بتطبل لبلدي، وهو انا هخاف منكم، اتكلم على المستشفيات والمدارس وشبكة الميه اللي بتوصلك في الحنفية فتلاقي ميه نضيفة تشربها.
وأثارت تصريحات الجندي غضب عدد كبير من رواد مواقع التواصل الذين يعانون ارتفاع الاسعار ،حيث ليس كل من ينتقد سياسات الحكومة خائن او إخواني.
وعلق حساب :" هو أي حد معترض يبقى مرتزق وخاين وداخلت في النية يا شيخ .
فيما يلي ابرز التعليقات الغاضبة :
مفيش مشكلة البنية الاساسية مهمة للغاية لكنها ليست بديلا عن فقر وجوع الناس انظر الي القضية برمتها لانه لايكفي ان تلبس بدلة شيك جدا دون بنطلون.
احنا عيشتنا هباب وزفت الزفت كل حاجه غاليه وكل التجار بتسرق الناس جهاز الطرف الصناعي الذي يساعد المعاق على المشي ارتفع ثمنه إلى الضعف .
خلاص ف رمضان نفطر ع ضاجن اسفلت وقالب طوب .
مشكلة الحكومة انها سالفة المليارات دي و بتسددها من جيوب الناس .
صح بدليل ٢٠ مليار جنيه بتروح للازهر.
مش انت اللي طلعت في برنامج وحللت لحم الكلاب والحمير في الظروف اللي احنا فيها دي.
