د.امير فهمي زخاري المنيا
طول عمري اسمع إن المنطقة دي مشهورة ببيع القماش و قطع غيار العربيات و الخردة .. لكن ايه علاقتها بالبلح؟
بص يا سيدي 😀
زمان كانت بتيجي المراكب في النيل من اسوان فيها كل انواع البلح و المنطقة دي كانت وكالة البلح الكلام دا سنة 1880 تقريبا
التجار كانوا دايما بيجيبوا معاهم اقمشة زي الكتان والصوف من جنوب الصعيد وتوصل بولاق ابو العلا "كانت ميناء زمان" وبالتالي الارتباط بين البلح والقماش إنهم جايين من الصعيد....
بعدها الإنجليز لما مشيو من مصر ، الجيش الانجليزي ساب معدات وادوات كتير جداً لان تكلفة رجوعها لانجلترا تاني كانت تكلفة مهولة وعملية معقدة جداً...
فا الانجليز وهما ماشيين باعوا كل حاجة (بمعنى كل حاجة) ملابس، بطاطين، معدات، ادوات منزلية، اجهزة كهربائية...
المهم الحاجات دي في منها اللي يصلح للاستخدام "شغال" و في منها اللي مش شغال بس المعادن دي في حد ذاتها "حديد، فولاذ، نحاس، المونيوم" ليها قيمة كبيرة ودي بقت تتباع على اساس انها خردة، و من وقتها و بقت (كار) زي عبد الغفور البرعي كدة في مسلسل لن اعيش في جلباب ابي👳🏼♂️ مع الوقت مفهوم الخردة بدأ يشمل العربيات وقطع غيارها وبالتالي بقت سوق لقطع الغيار كمان...
وبالمناسبة قصة عبدالغفور البرعي يا إما حقيقية او تتشابه احداثها مع قصة حصلت فعلا لواحد غلبان في الوكالة كان بيسترزق فعلا من الشغل مع تجار الخردة، لحد ما اشترى طيارة واكتشف بعد كدة إن العدادات بتاعتها فيها كمية كبيرة جداً (كيلوات) من البلاتنيوم وقطع كتير في العداد كانت من الذهب (بيستخدم كموصل ممتاز للكهرباء) وتخصص في شراء الطيارات دي "قبل ما الموضوع يتعرف" ومن هنا تحول لتاجر كبير جدا جدا و ربنا فتحها عليه من واسعة وبقى عنده اكتر من محل وعمل اعلانات عملت ضجة في التلفزيون وقتها ولحد النهاردة محلاته موجودة ...
التجارة في الوكالة قامت على بيع ملابس (لجيش بحاله) عاش في مصر حوالي 70 سنة طبعا كمية ملابس مهولة، و كلها طبعا حاجات انجليزي ما بين ملابس رجالي وحريمي وملابس اطفال عالموضة وقتها، وطبعا مكانش في انترنت ولا تلفزيون ..
فا هي دي اخر موضة وقتها، وبما إن المراكب دي كانت بتيجي من الصعيد بقى اغلب تجار الوكالة صعايدة واغلبهم عائلات كبيرة، تلاقي منهم عضو مجلس شعب، عمدة في الصعيد او معلم صاحب تجارة تقدر بعشرات الملايين...
موضوع تجارة الملابس دي بقى موطنها وكالة البلح بناء على القصة دي وبردو دي بقت تجارة التجار في المنطقة، وبعد سنين كتير طبعا الملابس الانجليزي خلصت ولسة الزبون بيجي بيسأل عليها .. قام التجار عملوا بزنس مستمر لحد يومنا هذا اسمه تجارة "البالة"
تحياتى للجميع...
د.امير فهمي زخاري المنيا
