كتب: محرر أقباط متحدون
شارك الشاعر أمير طعيمة في حفل تكريم الموسيقار هاني شنودة ، وأكد على فرحته بهذا التكريم في حياته، وتذكر قول لزوجة الشاعر صلاح جاهين بعد وفاته عندما رأت حب الناس له وتمنت لو رأى ذلك في حياته.
وكتب "طعيمة" "و انا صغير لما اتوفى الشاعر الكبير صلاح جاهين التلفزيون عمل حلقة و سجل مع بعض النجوم اللي اتعاملوا معاه و اللي كلهم اتكلموا عن موهبته و عبقريته و قد ايه كان مؤثر في حياتهم و عبروا عن حبهم له، بس صلاح جاهين ما سمعش كل ده لانه كان اتوفى.
و مش هنسى جملة زوجته قالتها: يا ريته كان سمع الكلام الحلو ده في حياته مكانش مات مكتئب.
نجوم كتير ايه ما عرفناش قيمتهم الا بعد رحيلهم، و نسينا نقولهم قد ايه بنحبهم و نسينا نعرفهم قد ايه هم أثروا فينا و في حياتنا.
كان ليا حظ اني قضيت وقت طويل مع الفنان هاني شنودة قبل و بعد حفل تكريمه، الراجل كان حاسس انه في حلم و خد جرعة حب من الجميع اعتقد ان كان محتاجها و الاهم انه يستحقها عن جدارة.
الجميع يعلم مدى حبي و تقديري لصديقي الغالي معالي المستشار تركي ال الشيخ ، الراجل بقاله شهور شغال على الحفلة دي عشان تطلع بالشكل ده و لك ان تتخيل انه كان رايح جاي على بروفات الحفلة طول الوقت عشان يطمأن ان كل حاجة مظبوطة و على اكمل وجه رغم ان معاه جيش يقدر يقوم بالدور ده، و كان الهدف انه تتعمل حاجة غير مسبوقة تليق بمشوار فنان كلنا بنحبه.
انا في قمة السعادة و حاسس اني انا اللي كنت بتكرم و فرحان لفرحة استاذ هاني، عايز اشكر كل النجوم اللي ما بخلوش بمشاعرهم و فرحوا استاذ هاني من قلبهم، سواء اللي غنوا في الحقل او الحضور اللي جه مخصوص عشان يشكر الاستاذ علي مشواره الرائع.
و اخيرا المملكة العربية السعودية بعتت رسالة واضحة وضوح الشمس بمدى حبها و تقديرها و احترامها للفن المصري.
بجد كان يوم تاريخي.
