بقلم : رامي كامل
طبعًا أنت داخل عايز تعرف إيه هي اللي حمرا ؟ أقولك يا سيدي
الحمرا هى ليالي الثوار اللي بيقضوها في أحضان الإخوان وعلى مضض بيزعلوا منهم ويعملوا مسيرات ضدهم على اعمل أنهم يرجعوا بيت الطاعة الاخوانى، وكل حركة ثورية تلاقى عدلها مع سي السيد الاخوانى أو السلفي.
طب أنت بتقولهم كده ليه مش عيب ؟
لا أصل أنت مش واخد بالك، لما كنا بنندهس في ماسبيرو خرجت القوى الإسلامية كلها تهاجم الأقباط الوحشين اللي بيهاجموا على الجيش وطبعا كلنا تابعنا تصريحات قيادات الإخوان وشيوخ السلفية وفتاويهم وفيديوهاتهم وجه بعدها على طول الانتخابات البرلمانية، ولقينا المفاجأة المفزعة القوى الثورية اللي دوشت دماغ أهلنا بالقصاص من قتلة الشهداء بتمد أيدها للإخوان " الوكيل الحصرى للمجلس العسكري قاتل الشهداء" وبيعملوا قوائم موحدة وتنسيق واسع لدرجة انه بقى مبهواء " من الفعل بهوئة" وبعدها على طول في محمد محمود كان الشباب ببقع زي الحمام برصاصة الداخلية والحربية و ما بينهم والإخوان والسلفيين في البرطمان أبو دقن بيقولوا علينا ضاربين ترامادول وعيال قابضة وأجندات، وذكرت لي الزميلة سالي توما حديث لها مع احد قيادات الإخوان قالها " بتترموا فى الزبالة عشان مكانكم مزبلة التاريخ " ده لما كانت جثث الشهداء بتترمى في الزبالة.
طيب أنا بحكي ده كله ليه ؟ لان بعد ده كله القوى " الثورية الحمرا " كانت بتحالف بمنتهى القوة مع الإخوان ويكفى إنهم قادوا حملة المليون لانتخاب محمد مرسى مرشح الإخوان لرئاسة مصر " بغض النظر عن انه أصبح رئيس لأهله وعشيرته وبس ".
بعد ده كله وكل الخيانة دى من الإسلاميين للثوار مازال "ثوار الغبرة" يتحالفوا مع الإسلاميين وأوعى تفكر لحظة أن اللي بيحصل دلوقت هدفه حاجة غير الضغط على الإخوان لتفويت حاجة للقوى الثورية من تحت الترابيزة، لكن لما يبقى فى حلفاء طبيعيين للثوار بعد تغيير حقيقي في الشارع المصري زى حملة شفيق وحملة عمرو موسى أو حتى الكتلة اللي كانت ورا ابو حامد "بغض النظر عن أي خلاف مع الرجل لا أتذكر أن شخص كان يدافع عنا ونحن فى جحيم محمد محمود سوى هذا الرجل " يتقال عليهم فلول ولازم يخرجوا من الميدان المقدس " ميدان التحرير" وأنا اقدر تماما قدسية ميدان التحرير للثوار والإخوان لأنه بمثابة غرفة النوم للرجل وزوجته لكن إلى متى يا معلمين تستمر مهزلة استبعاد المصريين بحجة أنهم فلول؟
أدركوا أن عهد حسنى مبارك رحل بلا عودة ونحن الآن في عهد مرسى مبارك، القادم بكل ما هو شرير ولا يمكن استبعاد قوى مصرية من الساحة تحت اى مسمى وأنا مستعد امضيلكم على بياض أن مبارك مش هيرجع لان الإخوان أدوا العسكر خروج أمن من دم الشهداء والعسكر مش هيرجعولهم مبارك، لكن المصريين دول لحد امتى هيفضلوا مطاردين بحجج فارغة المستفيد الوحيد منها هو الإخوان ؟
.jpg)
