د. أمير فهمى زخارى المنيا
هاتكلم النهاردة عن أضرار التونة المعلبة (المفتتة والقطع) اللى كتير مننا بيعتمد عليها ف نظامهم الغذائي (خصوصا الرياضيين) كوجبة رخيصة وسريعة التحضير مليئة بالمكونات الصحية (بروتين أوميجا 3 فيتامينات الخ الخ)
نخش في المفيد على طول أضرار التونة المعلبة (المفتتة والقطع)
شوف ياسيدى لازم تحط حاجتين ف دماغك عشان ترتاح وانت بتتعامل مع التونة....
أولا.. سيبك م الهري ال كتييييير ال بتقرئه عن فوائد أكل التونة والأكثار منها وأنها مفيدة للجسم وأضرارها صفر والهبل دا كله.
ثانيا.. شيل من دماغك القناعة بتاعت أن الشركة الفلانية تونتها نضيفه عشان غاليه واسم كبير وإعلاناتها مالية التلفزيون إلخ الخ.
دول أكذوبتان تجاريتين وها اتكلم فيهم بالتفصيل
وتعال اشرحلك كام حاجه كدا قبل ما اقولك ليه
1.سمكة التونة 8 أنواع وفي أبحاث بتقسمها ل13
أفضلها وأجودها التونة الحمراء اللحمودي طبعا عمرها ما بتتعمل معلبات
أفضل نوعين من سمك التونة
1.. تونة بلوفاين
2.. تونة ذات زعانف زرقاء (بلو فاين ياباني)
والاثنين دول الكيلو منهم بيوصل مئات الدولارات حرفيا...وأوعى تصدق إنك ها تروح لعم سمير البقال تشتري علبة تونة ب20 جنيه من الأنواع ال فوق دي...
2.. الأبحاث بتقول ان ارخص واسوء سمكة تونة من حيث التشبع بالزئبق هي
سكيب جاك وكاتسو أنوس بيلاميس.
مش محتاج فكاكه عشان أقولك أن الأسمين دول ما فيش غيرهم بيدخلوا مصر.. وصدقني زى ما بقولك...
مش مصدق.. طب قوم أمسك أي علبة تونة من جنبك(مصرية)
“لو لقيت أسم غير ال2 دول هانزلك إعتذار رسمي على صفحتي
3.. الأبحاث برضو بتقول.
بأنها توصي بالبعد عن 3 دول عالميا في استيراد التونة المعلبة
اسوء الدول المصنعة للتونة الـ 3 حسب الترتيب:
1.. تايلاند
2.. الصين
3.. فيتتام
لتشبع أسماكها بالزئبق. وعدم إرتفاع المقاييس الصناعية والرقابة على المنتجات في هذه الدول واستخدام مواد حافظه مضره..
طبعا مش محتاج أحلف لك أن ال 3دول دول هما بس اللي نستورد منهم
وإن 80%من التونة المصرية جايه من تايلاند
وراجع المكتوب على نفس ذات العلبة ال ف أيدك هتتأكد من كلامي
أهم 3 نقاط عن التونة..
1..مشاكلها
2..نستخدمها إزاي
3..اجيب نوع ايه
مشاكل الزئبق في التونة
متشبعة بالزئبق ال يكاد يكون من أقوى المواد السامة على وجه الأرض في جرعاته العالية.. تتكون بها مادة سامة شديدة الضرر أسمها (نيترو آمين) ودي تطلقها الأحماض الأمينية في لحم التونة عند حفظها لمدة طويلة
وزيتها ومادتها الملحية مليئة بالمواد الحافظة الضارة والمدمرة للكبد والكلى.
على فكره الكلام دا مش من تأليفي .. ال بيقول كدا منظمة الصحة العالمية و12 بحث موثق منهم بحث محترم جدا ل الأستاذ الدكتور محمد سعد أستاذ ومدرس الكيمياء الحيوية بجامعة القاهرة
وطبعا الكلام دا كله يطرمخ عليه لأن السوق المصري من أعلى الأسواق عالميا في استهلاك التونة المضروبة .. ونستهلك منها سنويا عشرات الآلاف من الأطنان
أضرار علب التونة فى مصر:
طب ايه ال بيحصل فى مصر
كل واحد معاه قرشين بيخش ع النت.. ويضرب سؤال على عم جوجل ازاى استورد تونه؟؟
وطبعا كل همهم المكسب وبما انه مصري.. بيختار الشركات التايلاندية خاصة أو شركات شرق آسيا عموما لأن سعرها تراب.. وعندها استعداد ترضيه بأي شكل
ويتفق على أداء نوعي سمك سكيب جاك والتانيه دي ال انا قلت أسمها المعقد ونسيته وال بيحصل من الشركة الآتي:
السمكة بتتقسم وتتقطع نصين
نص زباله ال هو البطن والزعانف بالشوك بالجلد بالرأس وتفرم.. وتقدم ليك تحت أسم شيك الـ هو (تونة مفتته داكنة اللون) وانت يا غلبان طبعا مش عارف داكن اللون ومفتت ليه...
أما باقي السمكة (ال هي أصلا سمكه زباله) الظهر بيتقسم حتت تحت مسميات شيك (قطعة أو قطع أو فصوص) ويتباع لك على أنه أفخم الأنواع
عايز تقول ان كل شركات التونة المصرية مضروبة.
الجواب: أيوا للأسف..
وها خليك بنفسك تتأكد من كدا ب3 خطوات صغيره:
1. ..اعمل بحث عن أسوأ دول عالميا في تعليب التونة وقارنها بالمنتجات المصرية.
2. .. أعمل بحث عن أسوأ سمكتي تونة من حيث التشبع بالزئبق وقارنهم بالعلبة ال ف أيدك.
3. .. أعمل سيرش عن سعر كيلو سمكة التونة عالميا مقارنة بالسعر ال انت بتشتري بيه ف مصر(ملحوظة) سعر الكرتونة 7 كيلو تقريبا 8 دولار من بلدها منهم هامش ربح وسعر زيت وعماله ومواد تغليف وربح
انواع التونة في مصر:
يا ترى التونة فى مصر فيها حاجات نضيفه وطعمها كويس..
الاجابه للأسف لا..
ولا تفرق الخامة واحده والسمك واحد وبلد المنشأ واحد
الموضوع بالظبط زي ما تكون قسمت فرخه نصين و2 ستات أتقسمت عليهم
واحده ناصحه وطبيخها حلو.. ووحده عندها خايبه وبوظته..
في النهاية الفرخة الغلبانة ملهاش ذنب.
وعلى فكره
سيبك من موضوع إنك بتاكل التونة عشان هي أعلى مصدر للاوميجا 3
لأن الاوميجا خلال أيام يتحلل في الزيت والمادة الملحية ال ماليه العلبة..
طب يعني ما ناكلش تونة خالص
أنا مقولتش كدا..
حابب التونة وبتتوحم عليها قدامك 3 طرق:
1.. تجيب نوع مش مصري.. (أفضلهم الأوروبي والتونسي) و تتأكد انهم مش من الدول ولا السمك السابق ذكره.
2.. ممكن تأكلها طازه فى البيت زى مانا بعمل وها تكون أوفر وانضف واضمن بكتير ... ولو مالقيتش سمكة التونة تعملها... ممكن تأكل الماكريل او السردين ومش ها تفرق.
3.. اشتري المصري بس بمواصفات خاصة وهي:
1..أبعد تماما عن المفتت.
2..اغسلها كويس بخل ومياه من زيتها ومحلولها الملحي.
3..متستهلكش أكثر من الحد الأقصى منها شهريا ال هو 300 جرام(متوسط علبتين).
4..أحرص على شراء صلاحيات حديثه لم تتعدى ال 6 شهور.
5..ممنوعه للحوامل مطلقا والأطفال لا تصل حتى الجرعة المسموح بها.
6..حاول تشتريها من تاجر الجملة مباشرة بتكون صلاحيات حديثة وسعر كويس.
7..أحكم عليها بالتجربة وابعد عن الأسماء الغالية...
انا ترددت كثيرا من كتابه ذلك المقال .. لكن كتبته لأن صحتكم غاليه عليا وانتوا احكموا بعد كده ... تحياتى
د. أمير فهمى زخارى المنيا
---------------------------------------------------------------------
كثيرا من التعليقات والتليفونات سوف تأتى إليا بعضها بالمدح واخرى بالتشكيك واخرى بالرفض .. واحب اقولهم جميعا شكرا مقدما وإليكم رأى بعض المتخصصين الذين حذروا من لحوم التونه الموجوده فى السوق ...
١- الدكتور محسن صالح، أستاذ ورئيس قسم الاسماك بكلية الزراعة جامعة الأزهر
تحذير.. لا تتناول التونة المفتتة لأنها مليئة بالزئبق.
٢- الدكتور مروان سالم، الباحث في الدواء والغذاء، أكد أن بعض التجار معدومي الضمير، يشتروا أطنان من سمك التونة الملوث بعنصر الزئبق، وهو من العناصر الثقيلة شديدة الخطورة، ويترسب داخل سمكة التونة، ويُعتبر الزئبق هو القاتل الصامت، ولابد عند الشراء من الحذر من التونة المفتتة، لأنها مصنوعه من مفروم لحم السمكة حتى الرأس، وبالتالي يجب شراء التونة ذات اللحم الأبيض "القطعة الواحدة"، أو القطع الكبيرة، لأنها في هذه الحالة، تكون مأخوذة من ذيل السمكة، وهو أقل الأماكن التي يترسب فيها الزئبق.
٣- قال محمد سعد، أستاذ الكيمياء الحيوية بجامعة القاهرة، إن هناك كميات كبيرة من التونة الفاسدة دخلت مصر، لأنها مربحة جدًا للتجار، كما أن التلاعب في تاريخ صلاحيتها شيء سهل، مضيفًا أن مشكلة التونة تكمن في صلاحيتها لأنها تحتوي على الزيت، والماء المضاف له، ومدة صلاحيتها من 8 شهور إلى سنة على الأكثر، وقد يتلف الزيت، مما يؤدي لتسممها.
وأكد التونة الموجودة مع البائعين الجائلين أو على الأرصفة لا تخضع لرقابة من التموين، أو الصحة، أو أي نوع من الرقابة، وبالتالي فأغلبها منتهية الصلاحية، إضافةً إلى أن البعض يلجأ لتقديم عروض لبيع أكبر عدد منها بأقل سعر للتخلص منها.
وتابع أن المادة السامة التي تتكون في التونة، هي "نيتروز أمين"، وهي تتكون نتيجة انطلاق مجموعة الأمين، وتحلل في الأحماض الأمينية الخاصة بلحم التونة، وزيادة هذه المادة يؤدي للتسمم.
وأضاف سعد أن الأشخاص الذين يتسممون من تناول التونة، يكون جسمهم إلى حد كبير نظيف، فكثير من الناس قد يتناولون أغذية بها مواد سامة نتيجة انتهاء صلاحيتها أو تلف في الأغذية، وكثير منهم لا يتأثر بهذا التسمم، لأن جسمه اعتاد على استقبال السموم، بمعنى أن يصبح الجسم متأقلم على استقبال السموم، مؤكدًا أن السموم الموجودة بالتونة لا يمكن اكتشافها عن طريق الطعم.
٤- يؤكد الدكتور مجدي نزيه، رئيس وحدة التثقيف الغذائي بالمعهد القومي للتغذية، أن النصائح التي توجه للرياضيين للاعتماد على التونة المعلبة بشكل كامل في الأنظمة الغذائية هي نصائح فاشلة، ويشير في تصريحه لـ«المصري لايت» أن ذلك يحرم الجسم من فوائد وأغذية أخرى هو في أشد الحاجة إليها.
ويشير «نزيه» أن الزئبق يؤدي إلى الفشل الكلوي، لأنه يُعد معدنًا ثقيلُا مثل الزرنيخ والرصاص والألومنيوم، والتي تسبب نتائج كارثية على الكليتين، لذا فكثرة تناول أطعمة غنية بالزئبق يمكنها أن تسبب تسمم في الأعصاب والرئة.
وينصح بتجنب بعض الأشخاص تناول التونة المعلبة أو الحد منها لما تحتويه من الزئبق، وتشمل الرضّع والأطفال الصغار والنساء الحوامل أو المرضعات أو من يخططن للحمل، إذ يمكن أن يؤثر الزئبق على نمو الجنين وقد يؤدي إلى مشاكل في الدماغ.
