زهير دعيم
بخَبّي طيفِك بِعيوني
لَوْ شو ما صار
وبأقلَع مِن فِكري ظْنوني
وبحرقها بنار
يا عدرا يا حَنوني
يا ورد وغار
ابنِك حُبّي وجْنوني
وأحلى الأنسام
+++
خُدي بإيدي وعدّيني
بحر الآلام
وعند يسوعي خلّيني
اركع بسلام
انتِ أحلى ياسميني
بتلّ الأحلام
وزهرة حلوي عَ جْبيني
على الدّوام
+++
الطُّهر بتباهى فيكي
ومن الفرحة طار
ما بيغفى تَ يهديكي
شال وزنّار
انت الفرحة وعليكي
الشَّعب المُختار
مستنّي لمس إيديكي
طول الأيام
+++
ابنِك غَمَر ليالينا
بنور وضَيْ
وزرع فينا وحوالينا
وعَ طْراف الحيّ
محبّة تَ يخلّينا
ما إلنا زيْ
نوصل لعند المينا
بعزّ وسلام
