د. أمير فهمى زخارى المنيا
"من جوف الهاوية صرخت وبالمراحم سمعت الصوت" (يونان 2: 2)
أسئلة واجابتها بمناسبه صوم يونان...
في الجزء الأول جاوبنا على الأسئلة التاليه:
1. مين هو يونان النبى وامتى عاش وكان عايش فين؟
2. هو النبى يونان هرب من فين؟؟؟ وفين ترشيش دى؟؟؟
3. ليه السيد المسيح له المجد قال "رجال نينوى سيقومون في الدين مع هذا الجيل ويدينونه"(مت 12: 41) ...؟؟!!
4. إزاى نينوى مدينه عظيمه مع أن عدد سكانها 12 ربوه بس؟؟؟!!!
5. أمتي بنصوم صوم يونان ومين أول واحد صامه؟؟؟
6. هل فعلا فيه أنبياء تنبأوا عن خراب نينوى؟؟ وتنبأوا قالوا ايه؟؟؟
وفى الجزء الثاني نكمل باقي الأسئلة وهى:
7. هل فعلا يونان قعد ثلاثة أيام وثلاث ليالي في بطن الحوت؟؟
8. ليه اليوم الرابع في صوم يونان بنسميه فصح يونان ؟!!!ايه علاقة خروف الفصح بيونان النبي؟؟!!
9. إزاى حوت يقدر يبلع انسان ويقعد في بطنه ثلاثة أيام من غير ما يقرمشه بأسنانه أو يتخنق جوا بطن الحوت؟؟؟
10. إزاى الحوت ألقى يونان النبي في نينوى ومعروف أن نينوى ملهاش شاطئ أصلا...!! (أنظر الخرطة مع المقال).. ولو قلت إن الحوت ألقى بيونان على ضفة نهر دجله في العراق اللى على بعد 1كم من نينوى، أحب أعرفك ان الحيتان لا تسبح في الأنهار اطلاقا ...!!! هل دا يعنى ان قصه يونان غير حقيقيه وإنها أسطورة؟؟؟!!!!
ونكمل باقي الأسئلة وأجوبتها في الجزء الثاني:
7. هل فعلا يونان قعد ثلاثة أيام وثلاث ليالي في بطن الحوت؟؟
- وايه المانع؟؟ عموما ...طريقه اليهود في حساب الوقت مش زى طريقتنا الحالية ... إزاى؟؟ أقولك... لو مثلا شخص يهودي سافر لبلد يوم الخميس وقضى هناك ساعتين ورجع بلده ... حسب النظام اليهودي هو كدا قضى الخميس كله بنهاره وليله ...!!! علشان كدا ال 36 ساعة اللى قضاهم رب المجد في القبر بنحسبهم ثلاث أيام وثلاث ليالي...جزء من الجمعة حسبناه اليوم الكامل الأول والسبت كله بنهاره وليله حسبناه اليوم الكامل الثاني وجزء من الأحد حسبناه اليوم الكامل الثالث... لازم تفرق بين طريقه حساب الوقت دلوقتى والطريقة اللى كانت متبعه في العهد القديم ومن 2000 سنه...
8. ليه اليوم الرابع في صوم يونان بنسميه فصح يونان ؟!!!ايه علاقة خروف الفصح بيونان النبي؟؟!!
- كلمه فصح هي نفسها بصخه" Pass over "...ومعناها "عبور"... الملاك المهلك كان بشوف الدم على بيوت العبرانيين، فيعبر عنهم ولا يقتل أبكارهم ... وبهذا عبروا ..يعنى خلصوا من حكم الموت اللى كان عليهم ... نفس الأمر مع أهل نينوى ...كان محكوم عليهم بالموت علشان فسادهم ... وصاروا في ضيقه عظيمه ... بتوبتهم ...عبر .. عد.. الموت عنهم ولم يمسهم.. عبروا من الضيقة اللى كانوا فيها.. فهذا بالنسبة لهم فصح.. عبور.. وأيضا يونان النبى نفسه كان في ضيقه عظيمه وفى بطن الحوت.. صلى فأنقذه الله وقبل توبته عن عصيانه.. فعبر هو أيضا من الضيقة.. ونجا من الموت ... لذلك هو فصح ليونا ولأهل نينوى...
9. إزاى حوت يقدر يبلع انسان ويقعد في بطنه ثلاثة أيام من غير ما يقرمشه بأسنانه أو يتخنق جوا بطن الحوت؟؟؟
- مش كل الحيتان لها أسنان ... الحيتان الضخمة جدا ومنها الحوت الأزرق ملهاش أسنان ...! ومش بس ممكن يبلع شخص واحد، دا ممكن يبلع كذا شخص ويقعدوا في جوفه كمان... وعلى فكره يونان قعد في جوف الحوت مش في منطقه الجهاز الهضمى ...ولو برضه لسه مش مصدق انه ممكن حد يقعد في جوف الحوت ولا يموت خد القصة دى ... واحد بحار في الأسطول الإنجليزي أسمه جيمس بارتلى.. كان بيصيد ... وقع في الماء.. بلعته سمكه من نوع RT.. وملائه طاردوا هذه السمكة لمده يومين.. وفى النهاية صادوها بقنبلة.. فتحوا السمكة لقيوا جيمس بارتلى جواها على قيد الحياة بس مغمى عليه ... أخذوه مستشفى وفاق هناك وبقي تمام.. الموضوع دا تم عرضه في جرايد بريطانيا وفرنسا تحت أسم "يونان القرن العشرين" وبعيدا عن العلم متنساش أن الموضوع معجزه من عند ربنا ...
10. إزاى الحوت ألقى يونان النبي في نينوى ومعروف أن نينوى ملهاش شاطئ أصلا...!! (أنظر الخرطة مع المقال).. ولو قلت إن الحوت ألقى بيونان على ضفة نهر دجله في العراق اللى على بعد 1كم من نينوى، أحب أعرفك ان الحيتان لا تسبح في الأنهار اطلاقا ...!!! هل دا يعنى ان قصه يونان غير حقيقيه وإنها أسطورة؟؟؟!!!!
- من ناحية أن نينوى تقع في محافظه الموصل بالعراق وملهاش شواطئ اطلاقا.. دى حقيقه ... ومن ناحيه أن الحيتان لا تسبح في الأنهار دى حقيقه أيضا ... ولكن ...مين قال لك أن الحوت ألقى يونان على شاطئ مدينه نينوى أصلا؟؟!!
شوف كدا معايا الكتاب المقدس بيقول ايه ... "وأمر الرب الحوت فقذف يونان إلى البر"(يونان 2: 10) ...البر مش الشط.. يبقى من فين جبيت حكاية شاطئ نينوى دى؟؟؟ وبعدين ربنا كرر ارسال يونان مره أخرى الى نينوى.. شوف كده.. " ثم صار قول الرب الى يونان ثانيه قائلا: "قم اذهب الى نينوى المدينة العظيمة، وناد لها المناداة التي أنا مكلمك بها".. ثانيه.. قم واذهب.. يعنى يونان مكانش في نينوى بدليل ان ربنا أمره مره أخرى أنه يروح ... ويونان نفذ الأمر بسرعه.. "فقام يونان وذهب الى نينوى بحسب قول الرب.."(يون 3:3).. ذهب الى نينوى.. كلاااام واضح.. يعنى تقريبا الحوت رجع يونان تانى من طريق ترشيش (اسبانيا) الى ميناء يافا بفلسطين.. ومن يافا سافر برا الى نينوى مسافة 1000كم ... سواء مشيا أو عن طريق السفر بخيول ... يعنى.. أنت بنيت فكرتك على خطأ...
وللحديث بقيه ... تحياتى..
د. أمير فهمى زخارى المنيا
