د. أمير فهمي زخارى المنيا
بمناسبه صوم يونان هنالك بعض الاستفسارات أحب أوضحها لكم وهى:
1. مين هو يونان النبى وامتى عاش وكان عايش فين؟
2. هو النبى يونان هرب من فين؟؟؟ وفين ترشيش دى؟؟؟
3. ليه السيد المسيح له المجد قال "رجال نينوى سيقومون في الدين مع هذا الجيل ويدينونه"(مت 12: 41) ...؟؟!!
4. إزاى نينوى مدينه عظيمه مع أن عدد سكانها 12 ربوه بس؟؟؟!!!
5. أمتي بنصوم صوم يونان ومين أول واحد صامه؟؟؟
6. هل فعلا فيه أنبياء تنبأوا عن خراب نينوى؟؟ وتنبأوا قالوا ايه؟؟؟
يونان النبي (النبي يونس)
"أين أذهب من روحك ومن وجهك أين أهرب" (مز139 :7)
أسئلة واجابتها بمناسبه صوم يونان...

1. مين هو يونان النبى وامتى عاش وكان عايش فين؟
- اسمه يونان ابن أمتاي ...أمه الست الأرملة اللى من بلد صرفه صيدا اللى استضافت إيليا النبى وقت المجاعة والله بارك الزيت والدقيق اللى عندها فلم يخلص أبدا طوال مده المجاعة ... ولما توفى يونان وهو طفل ... صلى إيليا النبى الى الله، فرجعت روحه له تانى ...الكلام دا هتلاقيه في سفر ملوك أول اصحاح 17... يونان عاش في بلد اسمها جت حافر على بعد 4 كم من الناصرة... ودا كان قبل مجيء المسيح له المجد بحوالي 800 سنه ... وعاش أيام عاموس النبى ... وتنبأ أيام الملك يربعام الثاني ملك السامرة اللى كان ملك شرير وبعيد عن ربنا ( 2 ملوك 14)...

2. هو النبى يونان هرب من فين؟؟؟ وفين ترشيش دى؟؟؟
- النبى يونان ركب من ميناء يافا اللى في فلسطين ... وترشيش دى بلد في جنوب أسبانيا حاليا ... طبعا الحوت رجعه الى نينوى في العراق.

3. ليه السيد المسيح له المجد قال "رجال نينوى سيقومون في الدين مع هذا الجيل ويدينونه"(مت 12: 41) ...؟؟!!
- أقولك ليه ... يونان النبى مجرد جمله واحده قالها لشعب نينوى ... نينوى ستنقلب.. يعنى هتولع بالنار خلال أربعين يوم ...!! تابوا كلهم من صغيرهم لكبيرهم حتى الملك لبس المسوح...!! والسيد المسيح له المجد فضل 3 سنين يدعوا اليهود للتوبة وهما ولا هما هنا ..!! مع ان السيد المسيح أعظم من يونان لأنه كان يتكلم بسلطانه هو وليس رساله أخذها من الله كيونان ... لكن برضه لم يتوبوا ..!! علشان كدا يوم الدينونة ربنا هيجيب شعب نينوى لكل اليهود اللى رفضوا قبول السيد المسيح فاديا ومخلصا ويبقوا بتوبتهم حجه على اليهود الرافضين للمسيح ... فهمتم المعنى...

4. إزاى نينوى مدينه عظيمه مع أن عدد سكانها 12 ربوه بس؟؟؟!!!
- هو أنتم فاكرين الربوة عدد قليل.. الربوة دى يعنى 10,000 انسان.. يعنى عدد سكان نينوى كان 12.000 نسمه ... ودا عدد سكان كبير وقتها ... وكمان مدينه عظيمه بسبب انها كانت بلد تجارى من الدرجة الأولى مش بس عدد السكان كبير ...

5. أمتي بنصوم صوم يونان ومين أول واحد صامه؟؟؟
- دايما صوم يونان بيكون قبل الصوم الكبير بأسبوعين ... وكنيستنا القبطية الأرثوذكسية صامت يونان أيام البابا ابرآم ابن زرعه (البابا 62).. واللى تنيح سنه 979م. البابا دا كان سرياني (يعنى سوري الأصل) ... وفى سوريا كانوا بيصوموا الثلاث أيام الخاصين بيونان... لما المعلم إبراهيم (اللى بعد كدا بقي اسمه البابا ابرآم) بقى بطريك وضع الصوم دا في كنيستنا.. والشعب القبطى أحب الصوم دا جدا ومن يومها وأحنا بناخد بركه الصوم دا ...يعنى من 1000 سنه تقريبا.

6. هل فعلا فيه أنبياء تنبأوا عن خراب نينوى؟؟ وتنبأوا قالوا ايه؟؟؟
- أيوه فيه.. ناحوم النبى.. قبل المسيح له المجد ب 700 سنه، تنبأ عن خراب نينوى (ناحوم 3: 1-7) ... وسماها مدينه الدماء وملآنة كذبا.. أدى النبوة:
 (1) - وَيْلٌ لِمَدِينَةِ الدِّمَاءِ. كُلُّهَا مَلآنَةٌ كَذِبًا وَخَطْفًا. لاَ يَزُولُ الافْتِرَاسُ.
(2) - صَوْتُ السَّوطِ وَصَوْتُ رَعْشَةِ الْبَكَرِ، وَخَيْلٌ تَخُبُّ وَمَرْكَبَاتٌ تَقْفِزُ،
(3) - وَفُرْسَانٌ تَنْهَضُ، وَلَهِيبُ السَّيْفِ وَبَرِيقُ الرُّمْحِ، وَكَثْرَةُ جَرْحَى، وَوَفْرَةُ قَتْلَى، وَلاَ نِهَايَةَ لِلْجُثَثِ. يَعْثُرُونَ بِجُثَثِهِمْ.
(4) - مِنْ أَجْلِ زِنَى الزَّانِيَةِ الْحَسَنَةِ الْجَمَالِ صَاحِبَةِ السِّحْرِ الْبَائِعَةِ أُمَمًا بِزِنَاهَا، وَقَبَائِلَ بِسِحْرِهَا.
(5) - «هأَنَذَا عَلَيْكِ، يَقُولُ رَبُّ الْجُنُودِ، فَأَكْشِفُ أَذْيَالَكِ إِلَى فَوْقِ وَجْهِكِ، وَأُرِي الأُمَمَ عَوْرَتَكِ وَالْمَمَالِكَ خِزْيَكِ.
(6) - وَأَطْرَحُ عَلَيْكِ أَوْسَاخًا، وَأُهِينُكِ وَأَجْعَلُكِ عِبْرَةً.
(7) - وَيَكُونُ كُلُّ مَنْ يَرَاكِ يَهْرُبُ مِنْكِ وَيَقُولُ: خَرِبَتْ نِينَوَى، مَنْ يَرْثِي لَهَا؟ مِنْ أَيْنَ أَطْلُبُ لَكِ مُعَزِّينَ؟».

نينوى دى كانت عاصمه الإمبراطورية الأشورية ... كانوا بيهجموا على البلاد اللى حواليهم وياخدوا الناس أسرى ... يقطعوا أنوفهم ويفقعوا عيونهم ويقطعوا أيديهم ويعرضوهم في بلادهم للتشفي والسخرية.. وعاش أهل نينوى في فساد ما بعده فساد.. وكذب في المعاملات التجارية.. وزنى ... عموما.. النبوة دى تحققت وفعلا نينوى خربت سنه 612 قبل الميلاد..
نكمل باقي الأسئلة وأجوبتها في المقال التالى. تحياتي.
د. أمير فهمي زخارى المنيا