تحدث الفنان محمد سليمان عن مشهد المواجهة بينه وبناته خلال أحداث الحلقة الـ 24 من مسلسل وبينا ميعاد، والذي يُعرض حاليًا عبر قناة DMC محققًا نجاحًا كبيرًا منذ بداية عرضه.
وقال محمد سليمان عن مشهد المواجهة في تصريح خاص لـ القاهرة 24: مشهد المواجهة من أصعب المشاهد اللي عملتها في المسلسل ومشهد مهم جدًا لأنه بيتكلم على نقطة جوهرية وهي الصحة النفسية للأولاد في علاقتهم مع الأب والأم.
وتابع محمد سليمان أن مؤلف العمل اهتم بالعلاقة بين الأب وابنته، موضحًا: المؤلف هاني كمال كان بيركز على تفصيلة العلاقة بين الأب وبنته لدرجة إنها كانت بتشتكي إنها مش عارفة تتكلم مع أبوها، ودي تفصيلة مهمة لأننا بيتهيئ لنا إن أهم حاجة لولادنا إننا نوفرلهم الأكل والمسكن والملبس والتعليم والعربية أكتر ما نوفرلهم حالة نفسية سليمة.
وأضاف: المشهد بيتكلم على الفراغ اللي بيتسبب فيه الأب بعدم وجوده، وكل بنت فيهم شافت هتعوض غياب الأب وتتغلب على المشكلة دي إزاي، ومتكلمناش في المشهد على حالات غياب الأب بس، إحنا اتكلمنا حتى عن حالة الأب الموجود في حياة ولاده بس مش مهتم بتربية ولاده وميعرفش إزاي يتعامل معاهم، إحنا مكناش شايفين نفسنا إحنا كنا حاسين بس بالمشهد.
مسلسل وبينا ميعاد
مسلسل وبينا ميعاد من بطولة: شيرين رضا، صبري فواز، بسمة، مدحت صالح، وفاء صادق، خالد أنور، محمد سليمان، نادية رشاد، داليا شوقي والعديد من الوجوه الجديدة، من تأليف وإخراج هاني كمال.
