تحدثت الفنانة درة، عن علاقتها بزوجها هاني سعد وبداية تعارفهما، مشيرة إلى أنه لم يكن يتوقع أنه سيتزوج من ممثلة.
وقالت الفنانة درة خلال لقاء تلفزيوني: هاني مبدأيا زي بقية الرجالة مكنش في دماغه إنه يتجوز ممثلة وصعب بالنسبة ليه إنه يتجوز من ممثلة، لكن هو حبني وعرفني، فاطمن أكتر، فخد خطوة الارتباط بيا والزواج مني، لأن لما الراجل بيقرب وبيحب بجد خلاص، ولازم يكون واثق في نفسه وناجح لأن ما ينفعش حد يرتبط بحد ناجح وهو مش واثق في نفسه، وأنا عليا جانب أني أطمنه ويثق فيا، ويبقى عارف مهنة التمثيل عاملة ازاي.
درة: زوجي اتقدملي وإحنا قاعدين في مطعم
وعن تقدمه لها وطلب يدها، قالت درة: اتقدملي وإحنا قاعدين في مطعم قالي تتجوزيني، وضحكت وفكرت شوية، وبعديها بفترة سبنا بعض، وقررنا نفضل صحاب، وبعدين سافرت علشان أنسى روحت تونس وفرنسا، أما رجعت ابتدى يبعت لي، وأنا في المطار لقيت هاني جاي ببوكيه ورد، واتقدم لي بشكل رسمي، وحسيت إحساس حلو واتلغبطت.
وتحدثت الفنانة درة عن رأيها في الزواج قائلة: الزواج منظومة صعبة مش سهلة، ويبقى عندك مسئولية في حياتك، وقبليها كنت بفكر في نفسي، دلوقتي بقيت أفكر في حد تاني معايا، أنا كانت مفاهيمي كلها وردية عن الزواج، واتجوزت متأخر تقريبا.
