د. أمير فهمى زخارى المنيا
اولا معنى كلمه أيقونه:
هى أيقونة icon (من اليونانية εἰκών, eikōn, "صورة" وإنجليزية: Icon) هي منظر أو صورة أو تمثيل; وهي رمز أو تشبيه لشيء بالإشارة إليه أو تمثيله أو بالتناظر معه. وفي الاصطلاح الكنسي (الطقسي) تعني صورة دينية مدشنة ومخصصة.
نيجى بقه للأيقونة دى اللى مع البوست لأنها تعتبر من أقدم الأيقونات القبطية لمعمودية السيد المسيح والأيقونة ببساطة بتشرح عمل المعمودية فى حياتنا بشكل رائع...
أولاً : وضع اليدين بتوع المسيح تلاحظوا إنه نفس وضع الدفن عند القدماء المصريين علشان الأيقونة تقولنا إن المعمودية دفن مع المسيح يعنى موت وقيامة مع المسيح «مَدْفُونِينَ مَعَهُ فِي ٱلْمَعْمُودِيَّةِ، ٱلَّتِي فِيهَا أُقِمْتُمْ أَيْضًا مَعَهُ بِإِيمَانِ عَمَلِ ٱللهِ، ٱلَّذِي أَقَامَهُ مِنَ ٱلْأَمْوَاتِ.» ( كو ٢ : ١٢ ) يعنى فى المعمودية بيدفن الإنسان العتيق وبنقوم مع المسيح خليقة جديدة وإنسان جديد مخلوق حسب الله فى البر وقداسة الحق
ثانياً : السيد المسيح فى المعمودية دايس على تعبان
وكأن الأيقونة بتقولنا إن المعمودية هى إبطال لعمل الشيطان وجحد لسلطانه علينا وأننا فى المعمودية ننال القوة التى بها ندوس الحيات والعقارب وكل قوات العدو وعلشان كده قبل المعمودية فى طقس إسمه جحد الشيطان اللى بنعلن من خلاله تحررنا من قبضته وإنتصارنا عليه
ثالثاً : تلاحظوا إن المياه فى الأيقونة فيها سمك حى وده علشان الأيقونة بتقولنا إن المية دى حية فيها حياة وتفكرنا إن زى ما السمك بيتولد فى المية إحنا كمان بنتولد ولادة جديدة فى المية وإن إحنا فى المعمودية بنتولد فى المسيح خليقة جديدة وإن المية دى فيها قوة الحياة الجديدة فى المسيح
« لَا بِأَعْمَالٍ فِي بِرٍّ عَمِلْنَاهَا نَحْنُ، بَلْ بِمُقْتَضَى رَحْمَتِهِ- خَلَّصَنَا بِغُسْلِ ٱلْمِيلَادِ ٱلثَّانِي وَتَجْدِيدِ ٱلرُّوحِ ٱلْقُدُسِ » ( تى ٣ : ٥ )
رابعا : تلاحظوا على شمال الأيقونة صورة حمل وعلى يمين الأيقونة صورة شجرة لكن موضوع فى أصلها فأس من تحت
ودول بيعبروا عن كرازة يوحنا المعمدان بالسيد المسيح وبالتوبة
الحمل لما قال « وَفِي ٱلْغَدِ نَظَرَ يُوحَنَّا يَسُوعَ مُقْبِلًا إِلَيْهِ، فَقَالَ: «هُوَذَا حَمَلُ ٱللهِ ٱلَّذِي يَرْفَعُ خَطِيَّةَ ٱلْعَالَمِ » ( يو ١ : ٢٩ )
والكرازة بالتوبة لما قال
« وَٱلْآنَ قَدْ وُضِعَتِ ٱلْفَأْسُ عَلَى أَصْلِ ٱلشَّجَرِ، فَكُلُّ شَجَرَةٍ لَا تَصْنَعُ ثَمَرًا جَيِّدًا تُقْطَعُ وَتُلْقَى فِي ٱلنَّارِ ».( لو ٣ : ٩ )...
شفتم جمال الأيقونة القبطية....
شكرا للصديق سهام أسيوط....
د. أمير فهمى زخارى المنيا
