د.امير فهمي زخاري المنيا
١- رضعي طبيعي.
٢- بلاش أعشاب.
٣- بلاش بيبي درينك.
٤- بلاش جلوكوز.
٥- ڤيتامين "د" من أول يوم ٤ نقط ڤي دروب .
٦- تطعيم ڤيروس بي أول ٢٤ ساعة حتى في أيام الجمع و العطلات الرسمية .. في الوحدات الصحية و أقسام النساء في المستشفيات الحكومية.
٧- ما تربطيش حاجة على السرة.
٨- ممنوع الحفاضة تغطي السره.
٩- نظفي السره بالكحول من ٤-٧ مرات يومياً .
١٠- للمره التانيه بقول رضعي طبيعي ..بس.
١١- للمره التانيه بلاش بيبي درينك..اتمنع من وزارة الصحة.
١٢- تحليل الكعب من اليوم الثالث للسابع يوم السبت والثلاثاء في كل الوحدات الصحية..
١٣- حديثى الولادة إنسان وبيحتاج النظافة .. وبيستحمى عادي.
١٤- ممنوع بوس الطفل من الفم.
١٥- بلاش بوس أحسن ..بينقل أمراض.
١٦- تطعيم الدرن "حقنة الكتف" ..في أول شهر ما تتأخريش.
١٧- مفيش في السبوع غربلة ..الغربلة=نزيف في المخ .
١٨- تكحيل الطفل بالبصل ممنوع..عينه هتضيع.
١٩- نقط مطهرة للعين روتين في أول أسبوع.
٢٠- ورق مهم و هتحتاجيه شهور :
كراسة.التطعيمات.منحنيات النمو تشمل الوزن والطول ومحيط الرأس.
٢١- ركزي مع وزن طفلك ساعة الولادة ..احفظيه، الطبيعي من ٢.٥ الى ٣ كيلو.
٢٢- ٦٠٪ من المواليد بيصفروا ..صفرا طبيعية حميدة ما تقلقيش.
٢٣- الصفرا عايزة رضاعة ومتابعة أو حضانة وعلاج ضوئي مش عايزة نيون ولا ڤيتامين.
٢٤- المولود إنسان .. إحساسه بالجو زينا..بلاش بطاطين كتير فى الشتا ..هيفطس.
٢٥- الزغطة والخنفرة والحزقة ظواهر طبيعية هتقل مع الوقت.
٢٦- ظواهر تقلقك : الطفل رافض الرضاعة أو مش قادر يرضع ، لونه بيزرق، نفسه فيه نهجان ، مدروخ و مش بيصحى.
٢٧- اهتمي بنفسك وصحتك عشان تقدري تهتمي بمولودك..كلي أكل صحي ومتوازن ، بلاش أدوية من غير داعي، اشربي لبن ..كتير، وبلاش اكل حراق أو بيعمل انتفاخات .
٢٨- حديثى الولادة بينام كتير بس متقطع..نومك هيتلخبط ..بترضعي وتغيري وتدلعي وتنيمي.
٢٩- حديثى الولادة بيسمع من وهو جنين ف اخر شهور الحمل..لو مفيش فزع أو خضة من الصوت العالي تقلقي .
٣٠- لازم طفلك يعمل براز في أول ٢٤ ساعة ..لو معملش استشيري الطبيب.
٣١- أنماط الإخراج مختلفة عند حديثي الولادة..فيه طفل بعد كل رضعة يعمل براز وطفل يعمل مرة في اليوم .
٣٢- النوم على البطن ممنوع ..إلا بعد الرضاعة للتجشؤ وانتي صاحية .
٣٣- غيري الحفاض من ٣-٤ مرات يوميا و نشفي كويس. و ادهني زيت زيتون..هتحميه من التسلخات.
٣٤- لو بنت اتأكدي من وجود فتحة المهبل..لو ولد حسي الخصيتين وشوفي فتحة القضيب في مكانها و لا لأ..
٣٥- الأب:فينك ؟! ..واحشنا و الله.
٣٦- أول ما فترة النفاس تخلص شوفي وسيلة منع حمل مناسبة ما تنسيش .. طفلك محتاج رعايتك قبل ما تعمليها تاني وصحتك هتروح.
٣٧- طفلك بيعيط كتير .. عليكي تخمني السبب ومع الوقت هتفهميه.
٣٨- جعان رضعيه ،، شبعان ومنفوخ كرعيه،، عنده مغص دلكيه ،، عايز حد يشيله شيليه ..ما تسيبيش طفلك يعيط عشان ما يتعودش على الشيل..هو إنسان وعايز اهتمام والاهتمام ما بيطلبش .
٣٩- السخونية والكحة في حديثي الولادة مش طبيعية ومش حميدة .. لازم دكتور وتحاليل.
٤٠- حبي طفلك ..ولد أو بنت..أسمر أو ابيض ..سليم أو مريض ..ده قطعة من روحك ما تخليش حد أبدا يصنفه.
٤١- مع نهاية الشهر الأول الطفل بيبدأ يبتسم لو لاعبتيه ..لو بيعيط واتكلمتي معاه هيهدأ ..
اتعاملي معاه على إنه إنسان محتاج غذاء وحب و عناية.
خالص تحياتى للجميع ..
د.امير فهمي زخاري المنيا
