كتب - محرر الاقباط متحدون
ضجت منصات التواصل الاجتماعي، بتصريحات للمطرب الشعبي سمسم شهاب لصحيفة الشروق، اعلن فيها اعتزال الغناء .
وقال شهاب بحسب الصحيفة :" قرار اعتزالي الفن ليس بسبب الإسفاف لكن قررت القرب من الله والبعد عن الغناء وأي شيء محرم، وهذا قرار نهائي بدون رجعة".
مضيفا، أنه حارب كثيرا من أجل الفن وترك بصمة مشرفة لجمهوره وعائلته، وتابع :" لا أريد من الحياة أكثر من ذلك، والفترة القادمة ستكون للعبادة فقط فهي اللي هتنفعني عند موتي".
وابدى شهاب استيائه الشديد من الانباء التي تقول انه اعتزل الفن نهائيا كونه يراه حرام، وقام ببث مباشر خلال صفحته الرسمية على فيسبوك، وفيما يلي نص تصريحاته :
فيه واحد صحفي سألني فبيقولي الفن وإلى آخره قلتله اني مش راضي عن الوضع اللي حاصل وحاجات كدة يعني، قال طب دلوقتي انت بتهاجم بتوع المهرجانات ومش حابب الفن ده وبتدعو للفن الكويس والى اخره ، قلتله آه طبعا.
قالي طب ما أنت بتغني في ملاهي ليلية، قولتله أنا بغني مجبر لكن إن شاء الله ربنا يكرمني و أحاول أبعد، فقالي ده حرام قلتله لو هنتكلم عن الحلال والحرام، فيه كتير من الأئمة حرموا الغناء فـ ادعيلي ربنا ياخد بأيدي وابعد خالص وده المشروع المستقبلي اللي انا بفكر فيه الايام اللي جاية.
قالي أنت هتعتزل ؟ قولت ده موضوعي اللي جاي بس عايز أقف على أرض صلبة عشان مرجعش تاني للفن فمبقاش حرقت نفسي، وخسرت ربنا ونفسي وخسرت حاجات كتير جدا.
بعدها قمت من النوم وفوجئت بمواقع كتيرة وكبيرة بتقول إني بعتزل الفن نهائيا،طبعا انا مقولتش هعتزل دلوقتي ، و ده قرار في نفسي ناوي أخده في المستقبل، خلال فترة مش كبيرة.
فيه حاجة في دماغي عايز أعملها عشان لما ابعد أكون واقف على أرض صلبة عشان مرجعش تاني، انتوا شايفين ظروف الحياة صعبة ازاي على الكل.
قلت اعمل لايف عشان اقول ان اخبار اعتزالي الفن نهائيا مش صحيحة، الكلام ده كلام مش صحيح وخبر غير صحيح.
وطبعا زعلان من الصحفي جدا جدا جدا ، مش عارف بصراحة ربنا ليه عمل كده الله أعلم، وواخد على خاطري جدا منه.
مكنتش منتظر كدة أنا بحترم الصحفيين اوي وبتعامل بكل احترام لان ده ما يستحقونه، والمفروض ده يحصل، بس المفروض كمان التصريحات والاحاديث متتحرفش فانا انا زعلان جدا .
وشارك المفكر والطبيب خالد منتصر، عبر حسابه على فيسبوك، تصريحات شهاب، بان قرار اعتزاله الفن ليس بسبب الإسفاف لكنه قرر القرب من الله والبعد عن الغناء وأي شيء محرم، وان هذا قرار نهائي بدون رجعة.
وعلق منتصر ساخرا :" وهل واثقين اننا حنقدر نكمل حياتنا عادي بعد الخبر المزلزل ده ؟؟ أشك لإن الحياة انقسمت نصين ماقبل اعتزال سمسم ومابعد اعتزال سمسم.
وكتب حساب باسم اسامة :" هو في حد يعتزل قبل ما يغني ؟!.
وتساءل حساب :" بتقول الفن حرام وهتعتزل ، طب والفلوس اللي جمعتها من الفن هتعمل فيها ايه طالما شايف الفن حرام !، امثاله بيشتغلوا الشعب المغيب.
كما علق حساب باسم نهى :" إما نشوف بكره فلوسك تخلص وترجع وتقول أصل الغنا مش حرام.
وكان اعلن المطرب الشعبي سمسم شهاب ، عبر صفحته على موقع التواصل الاجتماعي “فيسبوك”، وفاة شقيقه الأكبر.
وكتب :" "لله ما أعطى ولله ما أخذ.. توفى إلى رحمة الله تعالى أخى الكبير الحاج رضا شهاب.. أسألكم الدعاء له بالرحمة وأرجوكم قراءة الفاتحة على روحه فهو فى حاجة لكل ثواب ولكل حسنة فهو الآن يحاسب.. اللهم ارحمه واجعل قبره روضة من رياض الجنة.. إلى رحمة الله يا أخى وأبي وصاحبي وحبيبي وسندى.. جوايا كلام كتير وحزن يكفى العالم لكن إيمانى بالله يجعلني لا أملك إلا الصبر والدعاء والرضا".
