د.امير فهمي زخاري المنيا
تقريبا معظم الشعب عنده جرثومة المعده وميعرفش
ما هى جرثومة المعده وكيفية علاجها والوقايه منها 🌹💮✌
س - إيه هيا جرثومة المعدة ؟
- ج - دى عبارة عن بكتريا تدخل الجسم عن طريق الاكل والشرب وتفضل عايشة جوه القناة الهضمية بتاعتك . بيسموها الميكروب الحلزونى او جرثومة المعدة ( H.pylori ) ...
س - هل منتشرة بين الناس ولا محدودة فى ناس معينة ؟
ج - منتشرة جدا بينا كلنا .. تخيل مثلا لو عددنا ١٠٠ مليون فيه ٧٠ مليون معرضين للإصابة بيها ( حوالين تلتين السكان ) ..
س - طيب هل تعمل قرحة مع كل الناس ؟
ج - لا غالبا مش بتعمل مشاكل مع كل الناس لكن الناس اللى عندهم مشكلة فى المعدة زى التهاب هتعملهم قرحة ...
س - طيب بتدخل الجسم ازاى ؟
ج - بتدخل مع الأكل والشرب ..
- الأكل اللى مش نضيف او اللى مش مطبوخ كويس يعنى ني شوية ولذلك بتيجي لمعظم الناس اللى بياكلوا من المطاعم خصوصا لو مطعم مش نضيف او الأكل مش مطبوخ كويس ...
- الشرب طبعا اللى مش نضيف وطبعا المية بتكون مليئة بالبكتريا في بعض الأماكن عشان نظام الصرف ممكن يكون داخل مع الرى ومع الشرب ...
- الاتصال المباشر مع لعاب الشخص المصاب...
- الاتصال المباشر مع براز أو قئ الشخص المصاب...
س - طيب دخلت خلاص ها وبعدين بتعمل ايه فى المعدة ؟
ج - ممكن تفضل سنين فى جسمك بدون مشاكل وطول الفترة دى واحدة واحدة تبدأ تهاجم بطانة المعدة والأمعاء وتعمل تآكل فيها زى جرح كده فلما المعدة بتاعتك تفرز حمض ال HCL اللى بيهضم الأكل يقوم يروح على المناطق المجروحة دى ويعمل قرحة معدة ...
س- هى ممكن تصيب الأطفال؟
ج- تعد جرثومة المعدة عند الأطفال هى الأكثر انتشارا وأصبحت مصدر قلق للأمهات والأباء..
- من الملاحظ أنه غالبا تكتسب العدوى خلال الخمس سنوات الأولى من عمر الطفل لعدم اكتمال الغشاء المخاطى المبطن للمعدة ...
- ومن خلال لعاب الطفل المصاب نتيجه وضع لعب الأطفال فى الفم او عن طريق براز او قئ الطفل او أدوات الأكل الملوثة او الذباب ...
س- ممكن تنتقل عدوى جرثومة المعدة بين أفراد الاسره؟
ج- طبعا وبكل سهوله.
س - طيب لو انا عندى قرحة نتيجة جرثومة معدة هحس بإيه ؟
ج - هتلاقى عندك ألم فى بطنك ومعدتك فاضية وانت جعان ولما تاكل الألم يخف شوية ويرجع يجى تانى بين الوجبات ..
- دايما عندك انتفاخات وغازات ..
- دايما عندك تكريع ...
- هتحس بغثيان وممكن ارتجاع ..
- وزنك هيقل فجأة بدون سبب ...
- رائحه الفم الكريهة...
- نقص ملحوظ فى الشهيه...
س - ايه العلامات اللى اخاف منها (الخطيرة) ؟
ج - لو فيه دم فى الموضوع ..
- سواء دم فى البراز احمر او البراز لونه اسود ..
- او لو رجعت دم ..
- او لو الالم على طول مش بيروح او حاسس بتعب شديد وتوهان ..
س - طيب إزاى اتأكد ان عندى جرثومة المعدة ؟
ج - باالتحاليل اعمل تحليل H.pylori سواء فى الدم او البراز ..
او الطريقة التانية بالمنظار ..
س - طلعت موجوده عندى ايه العلاج ؟
س - غالبا العلاج بيكون ١٤ يوم
بتبدأ .. بالعلاج الثلاثى ..
اوميبرازول ٤٠ مجم حبة قبل الفطار وقبل العشاء
مترونيدازول ٥٠٠ مجم صباحا ومساءا بعد الاكل
كلارثرومايسين ٥٠٠ مجم صباحا ومساءا بعد الأكل
كمل ١٤ يوم بنفس الجرعات
بعد ١٤ يوم كمل على الاوميبرازول بس ..
💐🌸وفيه حبوب هيليكيور بردو لعلاج الجرثومه وممتازة.
س - امتى اعمل تحليل اتأكد راحت ولا لأ ؟
ج - بعد شهر من العلاج ..
س - طيب هل فى ادوية بتأثر على نتيجة التحليل ؟
ج - ايوه المضاد الحيوى لو بتاخدوا ورحت عملت تحليل هيطلع سالب عشان كده قبل ماتروح لازم توقف المضاد الحيوى اسبوعين على الاقل قبل ماتروح ...
س - إزاى احمى نفسى وولادى من جرثومة المعدة ؟
ج - النظافة ثم النظافة ثم النظافة ...
- لما تدخل الحمام اغسل ايدك كويس وانت خارج ..
- قبل ماتاكل اغسل ايدك كويس ...
- الاكل يستوى كويس بلاش أكل نى وبلاش اكل مطاعم ..
- بلاش تشربوا من مية الحنفية او اشترى فلتر فى بيتك ينقى الميه ..
- بلاش عصبية او ضغط عصبى او تدخين او خمرة ...
س - طب ايه الاكل اللى ياكله مريض جرثومة المعدة ؟
ج - الصبح حليب بالعسل او ميه بالعسل على الريق ..
- وجبتك يكون فيها خضروات وفواكة وحبوب كاملة ...
- بالليل عشاء خفيف فيه علبة زبادى ...
- بلاش تاكل كتير مرة واحدة وكل وجبات صغيرة اكتر من مرة ..
- بلاش فواكة حمضية زى الليمون واليوسفى والبرتقال ..
- بلاش مقليات بزيادة او اكل مسبك بزيادة وملان دهون ...
- بلاش بهارات او حراق بزيادة
- بلاش شاى او قهوة خصوصا علي معدة فاضية ...
اتمنى اكون جاوبت على كل التساؤلات اللى بتدور فى ذهنكم ..
متنسوش الرجوع لمختص قبل البدء بالعلاج.
دمتم بصحة وعافية...
د.امير فهمي زخاري المنيا
