استقبل الاقباط مساء اليوم الجمعة، بكاتدرائية ميلاد المسيح، الرئيس عبد الفتاح السيسى بالتصفيق والحب عقب وصوله للتهنئة بعيد الميلاد المجيد، حيث كان في استقباله البابا تواضروس الثاني، بابا الإسكندرية بطريرك الكرازة المرقسية.
وتوجه الرئيس السيسي في بداية حديثه الى الأقباط، معربًا عن أمنياته في أن يكون عام 2023، عام خير وسلام وأمن ومحبة على مصر والعالم أجمع.
وقدم الرئيس عدد من الرسائل الهامة لكل المصريين
- أكن كل الاحترام والتقدير والاعتزاز للبابا تواضروس الثاني، والأمر لم يأتِ من فراغ.
- في كل مرة أسمع حديثًا للبابا تواضروس الثاني، وفي كتابه الذي أصدره، أجد حكمة وبلاغة عظيمة، ولن أنسى قوله في أحد أحاديثه الأخيرة: (الأديان تتوافق ومش لازم تتطابق).
- عشان تفضل محبتنا لبعض بدون تمييز، لازم يجتهد الشعب مصري كله لتتأصل مقولة (الأديان تتوافق ومش لازم تتطابق) في نفوسنا ونفوس الأجيال المقبلة.
- محتاجين نؤكد في كل مناسبة إن إحنا واحد، مفيش أي شكل من أشكال التفرقة بيننا ومينفعش أبدا.
- أنا شايف الناس في مصر قلقانة وخايفة، مش هقول إن ده مش مبرر، لكن لو كلامي يطمئنكم لازم تطمئنوا.
- إحنا مبنخبيش عليكم حاجة، ولو سمحتم يا مصريين متدوش ودنكم لحد أقل ما فيه إنه مش مسؤول.
- أنا سعيد بخوف المواطنين على مصر.. متخافوش لإن ربنا موجود وأعز وأكبر من الكل ويقدر يعمل كل حاجة طيبة لينا، والدولة ومسؤوليها يحاولون تقليل تأثيرات الأزمة.
- الدنيا بعد الأزمة الأخيرة مختلفة عن الدنيا اللي شفناها قبل كده، وهتأثر في دول كتير لو استمرت حرب روسيا وأوكرانيا السنة دي أو أكثر.
- إحنا الحمد لله ماشيين كويس وإن كنا بنعاني، بنعاني آه، لكن منخافش ومنقلقش.
- في ناس متعرفش بتقول خلي بالكم قناة السويس وهنبيع حاجة مبنقولش عليها، لو في حاجة هعملها هقول، هي مصر لو تعبت هنتخلى عنها.
وأكد أن الدولة المصرية حريصة أن تخفف من تأثيرات الأزمة العالمية التي ستغير شكل العالم، وتسير بخطى ثابتة رغم المعاناة الاقتصادية.
وترأس البابا تواضروس الثاني، بابا الإسكندرية بطريرك الكرازة المرقسية، صلاة قداس عيد الميلاد المجيد، مساء اليوم الجمعة، وذلك بكاتدرائية ميلاد المسيح بالعاصمة الإدارية الجديدة، بمشاركة الآباء الأساقفة والكهنة والرهبان.
