كتب: محرر الاقباط متحدون
أقامت جميع الكنائس الأرثوذكسية في مصر اليوم قداس برمون عيد الميلاد المجيد ، ولكن ماذا يعنى برمون الكثير منا يصوم دون أن يعرف ذلك، فقد قامت كاتدرائية رئيس الملائكة الجليل ميخائيل بأسوان بتفسير هذه المناسبة.
 
كل سنة وانتم طيبين النهاردة الجمعة  برامون عيد الميلاد المجيد .. يعنى ايه برامون ؟ وليه بنصومه ؟ وليه مرة نصوم البرامون يوم ومرة يومين ومرة تلت ايام ؟؟ وامتى بنصومه ؟ 
وهل كل الأعياد ليها برامون؟ 
 
- اولا برامون هى كلمة يونانية من براموني يعني يمكث أو يستمر فوق العادة والمقصود بيها استعداد فوق العادة للعيد .. أو المكوث أو الاستمرار في الصوم والصلوات استعدادا للعيد ..
 
- طيب ليه كنيستنا القبطية الأرثوكسية العظيمة علمتنا نصوم البرامون ؟ 
علشان الكنيسة عاوزانا نمارس تقشف ونسك فوق العادة فى اليوم اللى قبل العيد علشان نشعر بقيمة العيد الروحية وفيه ممنوع أكل السمك وفيه صيام انقطاعى .. والكنيسة وضعت الصوم ده من قرون مضت واتكلم عنه ابن العسال فى المجمع الصفوي فى القرن ال 13 .. وتشاركنا كل الكنائس الرسولية فى صوم البرامون . . 
 
- طيب سؤال .. ليه بنصوم البرامون مرة يوم ومرة يومين ومرة تلت ايام ؟ 
ببساطة كده علشان الموضوع يكون سهل وبسيط .. 
 
فى البرامون لازم نصوم يوم انقطاعى حتى وقت متأخر ولأننا مش بنصوم انقطاعى يوم السبت لعدم تشبهنا باليهود ولا بنصوم الأحد لأنه يوم فرح بقيامة السيد المسيح له كل المجد . 
فلو جه العيد يوم السبت زى السنة دى يبقى نصوم البرامون يوم واحد وهو الجمعة انقطاعى وممنوع أكل السمك ،
 لو جه العيد يوم الاثنين يبقى نصوم الجمعة انقطاعى والسبت والأحد بدون صوم إنقطاعى وال ٣ أيام  ممنوع فيهم السمك وهكذا لو جه العيد يوم الأحد يبقى نصوم البرامون يومين الجمعة بدون سمك وانقطاعى حتى وقت متأخر والسبت ممنوع فيه السمك ولايوجد صيام انقطاعى .
 
طيب لو جه العيد التلات او الأربع او الخميس او الجمعة او السبت يبقى البرامون يوم واحد فقط  اليوم اللى قبل العيد مباشرة  .
- طيب امتى بنصوم البرامون ؟ وياترى كل الأعياد قبلها برامون ؟ ولو اه ليه .. ولو لأ ليه ؟ واشمعنى عيدى الميلاد والغطاس بس هما اللى ليهم برامون ؟؟ 
اولا صيام البرامون هو صيام من الدرجة الأولى يعنى بيصام فيه انقطاعى لفترات طويلة وممنوع فيه اكل السمك .. وكنيستنا علمتنا اننا قبل الأعياد السيدية الكبرى ( السيدية اى الخاصة بالسيد المسيح له كل المجد والكبرى اى اللى ليها دور رئيسى ومباشر فى خلاصنا وفدائنا ) 
 
و نصوم البرامون قبل عيدى الميلاد والغطاس المجيد لأننا قبل عيد الميلاد بنكون صايمين صوم الميلاد وهو صوم من الدرجة التانية ويسمح فيه بأكل السمك وقبل عيد الغطاس بنكون فاطرين. 
 
- طيب ليه عيد القيامة وبقية الأعياد السيدية الكبرى ( عدد الأعياد السيدية الكبرى 7 اعياد ) مالهومش برامون؟ 
لأن فى عيد البشارة وعيد دخول السيد المسيح اورشليم ( احد الزعف ) بنكون صايمين الصوم الكبير وهو صيام من الدرجة الأولى وممنوع فيه أكل السمك والصيام الانقطاعى بيكون لوقت متأخر ..
وفى عيد القيامة لأننا بنكون صايمين أسبوع الآلام قبل العيد وفيه ايضا صيام من  الدرجة الأولى وممنوع فيه اكل السمك والصوم الانقطاعى لفترات طويلة  ..  فيعتبر الصوم الكبير واسبوع الآلام كله كبرامون أو استعداد قبل الفداء والقيامة.
 
وفى عيدى الصعود والعنصرة وهما من الأعياد السيدية الكبرى وليس لهم برامون على الرغم من اننا بنكون فاطرين قبلها .. طيب ليه ؟؟ اشمعنى ؟؟ 
 
لأننا بنكون بنحتفل بفرحة وبهجة قيامة السيد المسيح له كل المجد من بين الأموات فى فترة الخماسين والفترة دى مافيهاش اصوام نهائى ولا ميطانيات ..
 
- طيب سؤال كمان ليه بالأمس الخميس  مافيش تسبحة كيهك ؟؟ 
لأننا يوم الجمعة برامون وفى طقس الكنيسه فى أيام البرامون بنصلى بالطقس الصيامى ( شبه الحان الصوم الكبير ) وتسبحة كيهك بتقال بالطقس أو اللحن الكيهكى ..