كتب - محرر الاقباط متحدون
علق المفكر والطبيب خالد منتصر على انتشار شائعة بيع قناة السويس، وكتب منتصر عبر صفحته الرسمية على فيسبوك :
#اشاعات_بيع_قناة_السويس_كوميديا_سوداء #عادي_العقل_اللي_ضحك_عليه_الريان_يضحك_عليه_الاخوان.
بالبلدي ومن غير فذلكة مصطلحات ..انت لما يبقى مرتبك ميت ألف جنيه وغني كده بس عارف ان الزمن غدار ومابيضحكش طول الوقت مش لازم تدخر حاجة على جنب في بنك أو في صندوق ، ولا تصرف كل مافي الجيب ليأتيك مافي الغيب ؟؟.
أكيد لو عاقل حتدخر أنا يا أعزائي كنت أعمل في قناة السويس أصلاً والصندوق ده موجود للطوارئ ومش اختراع !!!سأعطي لك مثالاً لماذا هذا الصندوق موجود ؟ افرض حادث غلق القناة بسفينة ايفر جيفن ظل سنة متواصلة ماهو الحل ؟ هل مانقبضش مرتبات للعاملين في الهيئة ؟؟! ، هل مرشد الهيئة حيمد ايده لمرشد الاخوان ويقول له اعطني مما أعطاك الخليفة أو التنظيم السري؟؟! .
ده مجرى ملاحي معرض لتقلبات مناخية وسياسية ولازم يعمل حسابه لها ،والصندوق موجود بالاحتياطي الزائد وده كيان اسمه الصندوق له مبنى ومكاتب وأصول لو قرر يبيعها له الحق يبيعها لكن مش من حقه يبيع القناة ولا مبنى الارشاد ولا كراكة ولا رصيف …الخ ، أمال ليه اتعرض على مجلس النواب؟ ده لأن الصندوق حيبقى شخصية قانونية مستقلة ولها ذمة مالية مستقلة فلازم تبقى بقانون او بموجب قانون.
أنا مش فاهم ازاي المعلومة البسيطة دي مش واصله للناس ؟؟! وازاي اشاعات الاخوان قدرت تاكل الأدمغة بالسهولة والبساطة دي ؟؟! هل اللي ضحك عليه الريان مش عجيب ولا غريب انه يضحك عليه الاخوان !!!؟كل الحكاية اننا لازم نتعلم نشرح ببساطة وباختزال واختصار للناس.
