كتب: محرر الاقباط متحدون
أكد الكاتب راجى عامر أن من يتضايق من انتشار مظاهر الكريسماس والتى تعطى فرح وسعادة هو الشخص الذي تقول له صباح الخير يرد بلوم وعتاب وعليكم السلام ورحمه الله وبركاته.
واضاف عامر " أن هذا الشخص يريدك أن تحترم صيامه ومتاكلش.
وقال "عامر" عبر حسابه الشخصي على موقع التواصل الاجتماعي فيسبوك "اللى بيتضايق من مظاهر الفرح والسعادة بالكريسماس واستقبال السنة الجديدة هو نفسه اللي لما تقوله (صباح الخير) يرد عليك بنبرة لوم وعتاب (وعليكم السلام ورحمة الله وبركاته) كأنك شتمته بأمه مش بتتمنى له يوم جميل.. وهو نفسه اللي بيدخل على فيديوهات الأغاني على يوتيوب لما يلاقي الناس مبسوطة بيها علشان يكتب لهم يفكرهم بعذاب القبر.. وهو اللي يبقى قاعد في القطر مشغل أدعية بصوت عالي ومش فاهم إن فيه اختراع اسمه سماعة وإنه المفروض يحترم خصوصية كل واحد..
وهو نفسه اللي لازم تحترم صيامه ومتأكلش أو تشرب قصاده حتى لو جعان أو مريض أو بتاخد أدوية علشان مشاعره بتكون مرهفة لأنه غالبا بيكون مقتنع إنه صايم علشانك مش علشان يهذب نفسه..
وهو اللي تلاقيه حاشر مناخيره في حياة الناس ومصمم يراقبهم ويتدخل في نمط حياتهم، وحيائه يتخدش لو شاف واحدة لابسة قصير لكن حيائه مش بيتخدش خالص لما بيتحرش بيها أو يأكل ميراث إخواته البنات أو يقهر مراته.. والكائن ده بيكون غالبا مقهور من صغره ومتداس على وشه لغاية ما بقى في المجتمع عامل زي "الدمل".. عدو للفرحة والسعادة.. يزعل لو لقى الناس مبسوطه.. ويتقهر لو حس أن الناس ممكن تبتسم أو تضحك أو تحب أو تشوف أن بكرة فيه خير وأمل.. متشغلوش بالكم بيهم وزينوا الشجر وافرحوا وانبسطوا مع حبايبكم وكل سنة وكلنا بخير وسنة جديدة كلها فرح وسعادة بعيد عن ولاد الكئيبة دول
راجي عامر : اللي بيتضايق من مظاهر الفرح والسعادة بالكريسماس والسنة الجديدة هو نفسه اللي بيزعل من تحية (صباح الخير) وحاشر مناخيره في حياة الناس ودا زي "الدمل" عدو للفرحة والسعادة
