كتب: محرر أقباط متحدون
قال الإعلامى أحمد سالم موجه حديثه للمواطن اللى بيعلق أخطاء الغير ويقول "غلبان" بمعنى اللى يسرق غطاء بلاعة نقول عليه غلبان وسواق التوك توك اللى بيشرب ويخبط اطفال غلبان واللى....الخ.
وقال "سالم" عبر حسابه على موقع التواصل الاجتماعي فيسبوك "عزيزي المواطن اياه أوعدك اني هسكت خالص ولما تحصل مصيبة هعمل مش آخد بالي بس بشرط، لما ابنك يغرق في بلاعة مجاري ماتبقاش تزعل عليه عشان اللي سرق الغطا كان غلبان مش لاقي ياكل، ولو اتكهرب من عامود النور المكشوف مش مهم أصل اللي فتح العامود كان بيسرق كهربا عشان غلبان.
ولما حد يغتصب بنتك ماتشيلش في نفسك اوي وسامحه عشان ده أكيد غلبان معهوش يتجوز، لما عربية البضاعة بتاعتك تتقلب علي الطريق وتلاقي قرية كاملة بتسرقها ما تنطقش عشان دول غلابة و محتاجين ولما سواق توكتوك او ميكروباص يدوسك ويكسرك ١٠٠حتة ماتكبرش الموضوع لأنه غلبان و أكيد كان مبرشم عشان ينسي الهم ، لما الموظف الفاسد يطلب منك رشوة ادفعله بحب وادعيله كمان ربنا يباركله عشان ده غلبان ومحتاج
ولما القطر يعمل حادثة واهلك يموتوا محروقين استعوض فيهم ربنا عشان السواق غلبان وضارب ترامادول برضه ، ولما سايس الموقف يغزك بمطواه خليك فريش وعيش اللحظة عشان ده غلبان علي باب الله.
ولما تعمل حادثة بعربيتك وتلاقي ناس بدل ماتنقذك بتسرقك قول لهم قلبي وربي راضي عنكم عشان انتوا اكيد غلابة، بس افتكر ان الله لا يغير ما بقوم حتى يغيروا ما بأنفسهم.
