محمد محمود
فيه مشهد فى فيلم الاشقياء الثلاثة بطولة شكرى سرحان وسعاد حسني وأحمد رمزى ، حسين اللى هو شكرى سرحان كان شاب فقير من أسرة بسيطة متعقد من فقره وأصله المتواضع ،وكان بيخدع صديقه فتحى ( يوسف فخر الدين) وياخد منه فلوس كتير ويروح يصرفها ويبعزقها على ملذاته ونزواته ، فيه مرة راح فيها كباريه وقعد مع واحدة من بنات الكباريه وفتح لها شمبانيا وويسكى وقعد يصرف كتير ولما سألته ليه البعزقة دى قال لها انا غنى وعندى فلوس كتير حتى بصى .. وقام مطلع لها فلوس ياما من جيبه ...
البنت الخبرة الخبيرة اللى عدى عليها أصناف كتير من البشر ، نظرت إليه نظرة كلها فهم ووعى وقالت له ، انت غلبان محلتكش اللضى وتلاقى الفلوس دى مستلفها من حد غيرك ، وسابته وقامت .
اللى عمله شكرى سرحان ده هو نفس اللى بتعمله دولة قطر فى المونديال ، بعزقة يمين وشمال وبذخ وسفه ومليارات ورشاوى ودعاية وأنا غنى وأنا صاحب هوية واحنا اللى علمنا العالم معرفش ايه واسألوا شارلمان وانا عندى تانى وميهمنيش المصاريف ووو
عاملين زى الطفل الغلبان الفقران اللى اول ما جاله قرشين راح أشترى بهم كل اللعب اللى فى المحل اللى جنبه ولما أصحابه وأصدقاءه جم يزوروه فى بيته قام مطلع لهم كل اللعب مرة واحدة عشان يشوفوا أد ايه هو غنى ويعرفهم إنه زيه زيهم ومش أقل منهم وأحسن منهم كمان
بتخيل لو فرنسا ولا إيطاليا نظمت كأس العالم وضربت فى دماغهم يعملوا الاتى... تخيل حضرتك كدا وغمض عينيك لحظات :
- تركب مكبرات صوت فى الملاعب وحول الملاعب وتذيع أجراس الكنايس خمس مرات فى اليوم
- تعطل بعض المباريات أو تؤجلها عشان تذيع قداس
- توزع على الضيوف ( بكل أدب واحترام برضو ) كتيبات صغيرة فيها تعريف بالديانة المسيحية وبعض اقوال السيد المسيح
- تعلق ملصقات فيها اقوال مأثورة من الكتاب المقدس ومن حكم السيد المسيح
- توقف ناس فى الطريق يوزعوا عليك نسخ مجانية من العهد القديم والجديد
- تستدعى قساوسة ومبشرين من دول كتير وتهيئ لهم قاعات لعمل محاضرات مجانية للضيوف للتعرف على المسيحية وتصحيح الصورة المغلوطة عنها فى العالم الآخر
- تستضيف بلاتيني فى استوديو التحليل ويقعد كل خمس دقايق يكلمنا عن هويتهم الأوروبية المسيحية العظيمة
- تخلى كل المعلقين الرياضيين يشعروا وينشدوا فى فرنسا ولا إيطاليا وعظمتها وتاريخها وانتماءها لحضارة كبرى واننا اللى علمناكم كل حاجة واخترعنا لكم كل حاجة وفضلنا على العالم لا ينسي
قريت، تخيلت ، اتضايقت وزعلت، يا ترى لو حصل ده حضرتك ح تقول ايه ويا ترى رد فعلك ح يكون ايه ؟
مش ح تقول ايه الهبل والخبل ده ؟
ده اعتداء على حقوقنا ومحاولة فرض دين بعينه علينا ؟
مش ح تقول إن ده تبشير مرفوض ودعاية فجة لا نقبلها؟
مش ح تصرخ وتقول فين احترام هويتنا وثقافتنا وفين الحرية الغربية المزعومة ؟
مش ح تقول إن دى مؤامرة على الإسلام واستدراج للمسلمين لتغيير دينهم ؟
ليه مش عاوز تفكر بحيادية وتحترم قيمة الاختلاف و تعامل الآخر زى ما تتمنى الآخر يعاملك انت كمان ؟
ليه دايما مصر إنك تستخدم قيم الحرية والتسامح والانفتاح من جهة واحدة بس ؟
ليه دايما شايف الدنيا بعين واحدة عليلة ؟
مفيش دين فى كرة القدم ، مفيش دين فى العلاقات بين الدول ، مفيش دين فى العلوم والتكنولوجيا والتاريخ ، مفيش دين فى الطهى والمطاعم ، مفيش دين إلا فى مكان العبادة فقط
