كتب: محرر الأقباط متحدون
قضية شائكة تحدث فيها بعض المتنورين، ولكن تم الهجوم عليه لأنهم طالبوا بأن تأخذ البنت ميراثها كامل من أبيها ، وذلك ماجاء في جميع الأديان.
ومن هذا المنطلق قال الإعلامى أحمد سالم يجب وضع قوانين تلزم الأخ والعم الذين يحصلون على الميراث يلزمهم الانفاق على الابنة مدى الحياة ودفع المصاريف الخاصة بها، وذلك لتغير الزمن وقد كان الهدف الأساسى من شرع الله توطيد العلاقات الأسرية.
وقال "سالم" عبر حسابه الشخصي على موقع التواصل الاجتماعي فيسبوك " بعيدا عن ان الكرة الأرضية كلها بما فيها من اديان و شرائع و بمافيها المسلمين الشيعة حكموا بتوريث البنت كامل ميراث ابيها و ان محدش اتكلم عن التعصيب و ميراث العم وابنه و حفيده من حق الغلبانة اليتيمة غير المسلمين السنة_ رغم عدم وجود آية قرآنية صريحة تقر ذلك_،
وبعيدا عن ان الفاروق عمر بن الخطاب الغي او عطل او أوقف سهم المؤلفة قلوبهم احد مصارف الزكاة المذكورة في القرآن لتغير الظروف و ان علماء الأزهر أقروا ما يسمي بالوصية الواجبة بما لا يتفق مع أحكام المواريث المتفق عليها طيلة ١٤ قرنا، أيضا لتغير الظروف،
لكن خلينا نقول ان
طالما الأخ بيورث ضعف أخته و العم بيورث معاها لو ملهاش اخوات ذكور ،
و طالما شرع الله يهدف الي توطيد العلاقات الأسرية و ان العم والأخ مسؤولين عن الابنة،
و طالما اخوات و أعمام اليومين دول اختلفوا عن دوكها بتوع زمان،
طيب ليه مانعملش قانون يلزمهم بالإنفاق عليها وتحمل كافة مصاريفها مدي الحياة _من ميراث ابوها_ لتحقيق المقصد الشرعي الأصلي من التقسيم الإلهي ؟
و ياريت محدش يبرر بالتفسير البشري الساذج بتاع ان المرأة بتورث اكتر من الرجل في ٥٠ حالة لأن القياس خاطيء تماما وما ينفعش نقارن حالة مباشرة زي ميراث البنت الوحيدة او البنات بدون أخ ،
بحالات البنت بتورث فيها اكتر من ابن ابن عمتها و نهلل و نقول شايفين يا جدعان الحلاوة و ازاي العلمانيين بيضللوكم،
الموضوع ملوش علاقة بالعلمانية خالص زي ما بيخوفوكم،
الموضوع مرتبط بشرع الله اللي أكيد مش هايكون فيه أعدل منه بس التفسيرات الذكورية هي الخطر الأكبر ، و خصوصا مع انتشار ظاهرة المرأة المعيلة و الابنة المعيلة مبقاش ينفع نطبق الحكم منقوصا و الرجل اللي مش قوام علي نسائه و متكفل بمصاريفهم لازم يشعر بتقصيره.....
بجد مفيش عقل ولا منطق يقبل ان بنت لسة ما اتجوزتش تورث نص أملاك ابوها و يجي ابن ابن عمها من آخر الدنيا يورث معاها و يخلع ،الزمن غير الزمن و دلوقت البنت مش عارفة اصلا تستلم النص ميراث بتاعها من اخوها عشان نتخيل انه هايصرف عليها كمان ،
الأم او الزوجة اللي ربوا و شقيوا مع المرحوم عمرهم كله ياخدوا السدس والثمن و يتسولوا ثمن الدواء و غيرهم ياخد الورث ويجري؟؟؟
انتم متخيلين ان الميراث ممكن يكون بيت صغير عاشوا فيه طول عمرهم و فجأة يجي عمهم يطردهم منه؟؟؟
و عشان كدة لازم القانون يلزمه بالإنفاق عليهم ولو في حدود نصيبه في الميراث و في المستوي المناسب لها وإلا يسيبلها القرشين تستر نفسها بهم و يشتغل هو ويشقي بدل ما يورث عالجاهز ،
يا نطبق شرع الله كامل بمقاصده يا تتحملوا عقابكم خزي في الدنيا و عذاب يوم القيامة....
أَفَتُؤْمِنُونَ بِبَعْضِ الْكِتَابِ وَتَكْفُرُونَ بِبَعْضٍ فَمَا جَزَاءُ مَنْ يَفْعَلُ ذَلِكَ مِنْكُمْ إِلَّا خِزْيٌ فِي الْحَيَاةِ الدُّنْيَا وَيَوْمَ الْقِيَامَةِ يُرَدُّونَ إِلَى أَشَدِّ الْعَذَابِ وَمَا اللَّهُ بِغَافِلٍ عَمَّا تَعْمَلُونَ (85)
أهلا بالنقاش الموضوعي ويلا نبدأ الشتيمة من الدراويش اللي وجودهم أخطر علي الإسلام من الملحدين ....."
