كتب - محرر الاقباط متحدون
عرضت فضائية (العربية) مقطع فيديو، عن متحرش تلقى درسا قاسيا لن ينساه على يد فتاة مصرية، بعدما حاول التحرش بها في شارع الجلاء.
وقالت الفتاة عبر حسابها على فيسبوك ، انها قررت عدم السكوت، حينما حاول شخص التحرش بها، حيث لم تتركه رغم محاولات البعض وانكاره لما فعل .
تقول الفتاة :" اظافري اتخلعت في وجهه ومحستش بنفسي غير وهو تحت ايدي وبيصرخ ، وتتمنى الفتاة ان تفعل كل فتاة تتعرض للتحرش في الشارع مثل تصرفها.
وجاء بنص منشور الفتاة :"
عارفه انه مش موقف بطولي بس انا مبسوطه اني اتصرفت كده.. ضوافري دي اتخلعت ف وش واحد متحرش قذر اتعرضلي انا وصاحبتي ومحستش بنفسي غير وهو تحت ايدي بيصرخ فرمته وهو مش بيقول غير انا مجتش جمبك،جبان وقذر .
وجاتلي بنوته من السما كده متعرفش في اي ومسكته معايا ووجبت معاه باحلي ضرب تحت الحزام برجلها وناس كثير اتجمعت بهدلته بس .
الجانب السييء من الحوار ان رجاله كبيره بتقولي عيب ده راجل كبير خليه يمشي!!! ده بجد! عيب عليا انا يعمو! وبقوله هاخده ع القسم وده يقولي عيب هتتبهدلي انتي وهتركبي بوكس ما اركب يوكس ولا اركب فلوكه انت مالك .
مبسوطه ان في ولاد مسكوه ضربوه وخلوني اضربه واتف عليه بس زعلانه ان منزلش دم و المصيبه انه قد ابويا وماسك طلابات بيت واظن عنده اسره واكيد مخلف.
انا ف عز م بضربه قلبي محروق وبقوله ترضي يحصل ف عيالك كده و حسبي الله ونعم الوكيل فيه وف اللي زيه واتمني اي بنت يحصلها كده متسكتش وربنا ياخدنا علي خير عشان احنا ف ايام كبيره".
واشاد عدد كبير من رواد التواصل الاجتماعي بتصرفها، وكتب حساب باسم وفاء النيل :" ياريت كل الفتيات يفعلو ما فعلته حينها ستقل او تنتهي هذه الظواهر الاجتماعية الدخيله علينا.
وعلقت منار فاروق :" يستاهل، اما ميرفت فكتبت :" برافو."
وعلق ايضا حساب باسم الاء :" لو على الحوار اللي حصل في شارع الجلاء ف انا شوفتك وفخوره بيكي.
وكتبت شمس :" برافو عليكي انا لو مكانك كنت عملت اكتر من كده، كما اشاد بتصرفها حساب باسم رضوى :" بنت ابوكي والله يابنت جدعه.
ومن ضمن التعليقات التي اشاد اصحابها بتصرف الفتاة :
جدعه بجد براڤو عليكي ربنا يبعد عنك اي شر يارب.
اشطر واحده في الدنيا والله.
جدعة
جدعه و لا يصعب عليكي ... ابقي انزلي بالكتريك بعد كده.
كوين والله
كل الدعم حقيقي كل الدعم.
جدعة يا حبيبتي ايوة كده كل البنات تعمل زيك.
اقسم بالله جدعه برافو عليكي.
جدعه و كوين والله مبسوطه بيكى جدا.
نزلي صورته ف كل جروبات أسيوط خليه يتفضح اكتر علشان كل الناس تعرف انه متحرش.
والله يابنتي كوين حسبي الله ونعم الوكيل ف القرف اللي بنشوفه كل يوم دا ف شغل او ف شارع محدش بقا يتقي ربنا ف حاجه ربنا يرحمنا بجد ويحمينا هو اللي عالم بحالنا الحمدلله انك بخير.
