تبرع مطعم قصر الكبابجي، للعاملين بمطعم كبدة البرنس بعد إغلاقه من قبل الجهات المختصة، بمبلغ 100 ألف جنيه.
وقالت الصفحة الرسمية لقصر الكبابجي: "كبدة البرنس مش مجرد مطعم ده أيقونه و هرم كبير و تاريخ مشرف للمطاعم المصرية كلها و الاكل الشرقي في العموم".
وأضاف: "عشان كده الدعم ليه واجب علينا كلنا و الدعوة لتقنين الاوضاع مع المحافظة بما يناسب سكان المنطقة اولاً ولا يضر العمل في المطعم ثايناً لازم يكون اولوية عند الجميع".
وأكد: "بما إن المطعم مفيهوش اي مخالفات طبية او بيطرية او من ناحية التراخيص فلابد من اعادة فتح المطعم داخلياً على الاقل في اقرب وقت لان في أسر كتير تعتمد في رزقها على العمل في المطعم و كمان محدش يرضى بخسارة غير مبررة لاصحاب العمل و العاملين فيه و ذويهم".
وتابع: كلنا جربنا فترة الاغلاق اثناء الكورونا و كلنا عرفنا قد ايه الموضوع بيبقى صعب على العاملين و اصحاب الاعمال و عشان كده بنتمنى من الحاج ناصر البرنس يقبل مننا دعم مادي بسيط 100 الف جنيه تعويضاً للأسر العاملة عن فترة الاغلاق واللى احنا متأكدين ان الحاج ناصر مش بينساهم و لكن حابين نشارك معاكم و نبقى على قلب رجل واحد لحد الـزمة ما تعدي على خير و نرجع كلنا نستمتع بواحد من أهم معالم الطعام المصرية في العصر الحديث".
ومنذ أيام أعلنت محافظة الجيزة، شن حملات مكبرة في عدد من مدن وأحياء المحافظة، كان لها سبب في إغلاق عدد من المطاعم، لتعديها على حرم الطريق العام، وافتراش أرصفة المشاة، بموائد الطعام ومقاعد للجلوس وأفران لتجهيز المأكولات، من بين تلك المطاعم المغلقة، كبدة البرنس في منطقة إمبابة، وحواوشي الربيع.
دعم الفنان محمد هنيدي، ناصر البرنس، صاحب محلات "كبده البرنس" الشهيرة، بعد إغلاقها منذ أيام.
ووجه هنيدي رسالة للبرنس قائلا: "صلح أخطاءك يا ناصر، وإن شاء الله تفتح قريب، إنت بقيت علامة من علامات القاهرة السياحية".
وتابع هنيدي: "بس أول ما ترجع طلع 3 آلاف ساندوتش كبدة هدية للجمهور، وعينلي منابي على جنب، ألفين ساندوتش من 3 آلاف".
بينما رد ناصر البرنس على الفنان قائلا: "حبيبي عم هنيدي ابن إمبابة اللي مشرفها إن شاء الله هنفتح وهتعدي بدعوات الناس الحلوة، وهنفرح ونفرح مصر كلها معانا".
وكان ناصر البرنس، مالك محل كبدة البرنس، بمنطقة إمبابة، قد كشف عن تفاصيل وأسباب إغلاق مطعمه.
وقال البرنس، في تصريحات لبرنامج الحكاية، الذي يقدمه عمرو أديب: "جات حملة من المحافظة وأغلقت المطعم بسبب إشغال الطريق".
وأكد مالك محل كبدة البرنس، إنه منذ 30 سنة يفرش في الشارع أمام المحل، ولو أنه أخطأ فمن المفترض أن تزيل أجهزة محافظة الجيزة المخالفات، وليس غلق وتشمع المطعم.
وأضاف، أن المطعم الآن مغلق، وأنه يصعب عليه أسر العاملين به، بسبب وقف الحال الذي حدث لهم بسبب غلق المحل.
وتابع: "كل شيء في المحل بتاعي اتشالت باللودر.. وعندي مخالفة بالغاز وبعالج الآن ذلك وبعمل على إنهاء المخالفة".
وأشار مالك محل كبدة البرنس، بمنطقة إمبابة، إلى أنه أخطأ بسبب فرشه في الشارع ومعترف بذلك، وأنه عليه أن يلم نفسه، على حد وصفه، وألا يكرر المخالفة مرة أخرى، مطالبا بتطبيق روح القانون، بتطبيق المخالفات ولكن دون إغلاق المحل.
وكشف البرنس أنه سيفتتح فرع جديد في أكتوبر بسبب ضيق المطعم الموجود في إمبابة.
